1Leng a se atat ngali Luxaal ina Tsoki ta xap xa Iis, di putsangi Luxaal ina Esliwaa.2O no lalaamua ina no unsausawit ma no unaasasing ina lo di lo nanen ngali xa sal ngali di ba sas amantei Iesu, oro di mataatina no inaman.3Mil Saatan ga tsigaii Judas, biexa iesan Iskariot, ia ina abia xan no tsi asasing ta sangaul ma ga laa lua.4Ma Judas ga se laa sangan no lalaamua ina no unsausawit ma no unxoxo ina Xan Anua Moroaa, ga papaare mii di ngali sen sal naba amusili ngali naba babel tali Iesu.5Di suk taton ma di ga engit ngali di ba tali xaa xuxute sin.6Ga siir ma ga nanen tsalei xa sal biaa ta xap xa malep tia.
Xapkap ina Luxaal
7Leng a se tsap ngali Luxaal ina Tsoki ta xap xa Iis. Balawaa leng ina Esliwaa di ba tsutsungit tali xa sipsip dokdok malen tinabel.8Iesu a tulen Pita ma Jon, ga paare, â Gulu laa taxaaturungi Luxaal ina Esliwaa ngali angen sin gita.â9Delu atsuraa, â U saan ngali itaa gelu ba laa taxaaturungi luxaal?â10Ga xisi delulu, â Nawe gulu se tsiga lalon inaman laba, taamat ia naba ta sabasue gululu ta atsaxei sobuk daan. Gulu na amusili laa lalon abia anua naba ta tsiga lalon.11Ma gulu na asaaiti aia tapkina anua weaatalaa, â Unaasasing atsura, inaabi xadi xabin no inawut, ngali iaa ba le ngani Luxaal ina Esliwaa lalon mii nugu no tsi asasing?â12Naba asen gululu taman xariin xabin biaa ta manman lapalaa lalon abia anua mii no mat maarang araraa ta se manman. Gulu na laa taxaaturungi luxaal atia.â13Delu poroklii di ma delu ga laa tatanginai abia no maarang malen Iesu ta se asaaiti delulu tsaa. Ma delu ga taxaaturungi Luxaal ina Esliwaa.14Biaa aua a se tsap o Iesu mii xan no aposal di se xale ngali angen.15O ga asaaiti di, â Iaa suk saan buxa ngali ngani abala Luxaal ina Esliwaa mii gim setauan o mil iaa na adi xariin sosong.16Iaa asaaiti gim, iaa ba xap ngani bula abala Luxaal ina Esliwaa pupua sin ta tatanginai abia ta se taxaa puaa no lalon xan Maradaan Moroaa.â17Iesu adi sobuk taman waain ma ga putsangi axaau laa sin Moroaa ma ga we, â Gim na adi abala ma gim na exasen labatina gim.18Iaa asaaiti gim, iaa ba xap nun waain bula pupua sin xan Maradaan Moroaa naba ta xaalame.â19Iesu adi tsoki, ga putsangi axaau, atsabaxi ma ga tali sin di, ga paare, â Balawaa isuaaga, iaa ta tali sin gim. Gim na xosaraa abala ngali adodomi iaa.â20Sin abia uk sal mulina luxaal, a adi sobuk, ga paare, â Balawaa sobuk ina nugu dal, ngali xuxubu uul, a tamkabare ngali gim.21Oro biaa liman aia xa, iwaa naba ta babel tali iaa bala mii iaa papan ibe angangen.22Xan Tsi Taamat naba met malen Moroaa ta se xubatsi. Oro xariin xirabas sin aia xa ta babel tali ia sin no matenkorot.â23O di ga etiirik engen di, â Saa so labatina gita naba xosaraa abala namaang morokon?â
Saa suk lot buxa?
24Mil biexa mamaet asuk tsap labatina di ngali saa so ina di asuk lot buxa.25Iesu ga paare sin di, â Xadi no king no Gentail di orong papan di, o biaa di ta ie banam papan di, di putsangi di tsaa no untamtabiel.26Oro gim nangaam malen di. Oro, iwaa ta suk lot buxa labatina gim, na xosaraa adokdoki malen tsi dokdok, ma iwaa ta lalaamua na malen iwaa untutule mu.27Saa suk lot buxa, iwaa xa ta xale papan ibe angangen o iwaa untutule? Iwaa xa ta tsotso ma angangen papan ibe. Aso abia? Oro iaa manman labatina gim malen xa untutule.28Gim abia no inaman gim tii til mii iaa sin nugu no xonkonon.29O iaa ba tali Maradaan malen nugu mom tii tali sin iaa,30ngalibi gim ba angen ma nun mii iaa papan nugu ibe angangen lalon nugu Maradaan ma gim ba tsotso lalon no xalkale ngali ininte sin sangaul ma ga laa lua ina xan no matenbung Israel.â
Pita a ulislii Iesu
31Ga paare, â Saimon, Saimon, Saatan a se atsura ngali gisi iu malen wit.32Oro iaa se sawit ngali iu ngali num tinaalnge naba xap met. O biaa u ba ta se mula, u na awatwati num no taamat.â33Oro a xisi, â Orong, iaa taxaaturung ngali laa lalon anua lodo ma ngali minet!â34Iesu a xisi, â Iaa asaaiti iu, Pita, puraa naba xap mager teng, ma u ba uliis nanaatuul we u xap atii iaa.â
Alua no tetel
35Mil Iesu ga tiiriki di, â Biaa iaa tii tulen gim ngali laa baais taman Inesaait Mamainaang, gim tii xap adi xa paakpaak o xa tutuel ma xa bubut. O gim tii muun tsaa ngali xawas?â Di ga xisi, â Asuk xap!â36Ma ga paare ngali di, â O nawe xa ina gim a ie xa paakpaak ma xa tutuel bula, u na adi. O nawe xa a xap xaka tetel ngali sas, na sune taman xan uga disdis ngali uuli xaka.37Iaa asaaiti gim, sawe Inaatel Pat ta paare taman ngali iaa, â O di ga xoxot tali mii no unlaklaxei lo;â ma asaaiti gim balawaa naba taxaa puaa malen no propet di tii paare taman iaa. Iou, sawe di tii atalaa taman iaa, naba se tsap so.â38Xan no tsi asasing di ga paare, â Orong, no tetel bala ta lua.â O ga xisi, â A se pupua.â
Iesu a sawit papan Buk ina no Olip
39Iesu a sebula es laa papan Buk ina no Olip ma xan no tsi asasing di ga amusili.40Biaa di ta se tsap nan abia xolot o ga paare ngali di, â Gim na sawit ngali gim ba xap xol lalon no xonkonon.â41Ga papaalii di, ga laa palpalaa dokdok mu, ga sage putput ma tii ga sawit,42â Mom, nawe u siir, u na adi abala sobuk sin iaa. Oro nangaam amusili nugu sirsiir, u na amusili num sirsiir tsaa.â43O angelo in balalangit a le asemat sin ma ga awatwati ia.44Ma ga saaen xariin mamaet papan ma ga suk sawit watwat. O xan malangitsa ga suk tuul malen dal sin no isuaan ga xol papan pula.45Biaa ta tapaas ga mula laa sangan no tsi asasing, ga tatanginai di, di ta se urange met taman lolbiir.46Atsuraa di, â Ngalisa gim ta urange? Gim tapaas ma gim na sawit ngalibi gim ba xap xol sin no xonkonon.â
Di se tsiili Iesu
47Biaa Iesu ta lo papaare tsaa, biaa malep di suk tsap mii iwaa taamat di ta putsangi Judas, ia ina abia sangaul ma ga laa lua, tii laamuangen di. A le tsap sangan Iesu ma ga nguri ia.48Oro Iesu ga atsuraa ia, â Judas, u babel tali Xan Tsi Taamat taman u ta nguri?â49Biaa no tsi asasing di ta lasi samaarang naba ta tsap o di ga paare, â Orong, axaau ngali giem ba sas taman nagiem no tetel?â50O iexa ina di ga adi xan tetel ma ga ritlii talinga mua ina xan untutule unsausawit lapalaa.51Oro Iesu ga xisi, â Nangaam xosaraa bula abala,â ma ga taxaanai talingan ma ga atoaa ia.52Mil Iesu ga paare sin abia no lalaamua ina no unsausawit ma no unxoxo ina Xan Anua Moroaa ma biaa no xusaak, di ta xaalame ngali tsiili, â Iaa laamungen xa inesas biaa gim ga xaalame taman no tetel ma no bom?53Sin no daan leng iaa xaa manman mii gim lalon no xolot ina Xan Anua Moroaa o gim ga xap muun tsiili iaa. Oro nagim aua a se bala biaa lodo naba ta ie banam.â
Pita a uliis we a xap atii Iesu
54Mil di ga tsiili Iesu ma di ga giwaa ia laa lalon xan anua unsausawit lapalaa, o Pita ga lo es amamil palaaen di.55Oro biaa no inaman di ga taangi ie labatina biexa xolot lokobel ina xan anua unsausawit ma di ga xale exumule, Pita tii se le tsotso mii di.56Iexa tsaana untutule a lasi Pita ta tsotso tia sangan abia ie ta rarar ma ga nen axaautsi Pita, o ga we, â Ilawaa taamat bula tii manman mii ia.â57Oro Pita ga uliis. A paare, â Aina, iaa xap atii ia.â58Manman dokdok, iexa taamat a sebula lasi Pita ga we, â Iu bula ina di.â Pita ga xisi, â Taat, iaa a xap.â59Nap dokdok mu, iexa taamat a paare watwat, â Asuk so maase, ilawaa taamat mu tii manman mii Iesu. Ia in Galili.â60Pita ga sebula xisi, â Taat, iaa xap atii samaarang abia u ta totore taman!â O biaa ta lo papaare tsaa, puraa asuk teng.61Orong a putsi ma ga nanen laa tutiik sin Pita. Mil Pita ga suk adodomi xan totore Orong tii ben paare taman. â Puraa naba xap mager teng talaawaa o u ba paare nan a tuul we, u xap atii iaa.â62Ma ga tsuul laa lokobel ma ga suk teng lolbiir.
No unxoxo di rereti Iesu
63Biaa no taamat di ta xoxo sin Iesu di tore reret ma di ga ririiti ia.64Di ngaati no matan taman laplap ma di ga atsuraa weaatala, â U na asen we iu propet. Saa ina giem a pantsi iu?â65O di ga lii no mat papaare tsaxa sin ia.
Iesu a til lalon xadi ininte no lalaamua ina no Jiu
66Biaa ta se tampanek, no xusaak ina no inaman mii no lalaamua ina no unsausawit ma no unaasasing ina lo, di tsap esuei araraa o di ga giwaa Iesu ngali le til laamuaan di.67Di paare ngali, â Nawe iu Karisito, u na asaaiti giem.â Iesu a xisi, â Nawe iaa asaaiti gim, gim ba xap taltaalnge sin iaa,68ma nawe iaa atsuraa gim, gim ba xap xisi.69Oro atiltsoli atalaa xan tsi taamat naba tsotso sin papel lima mua sangan Moroaa iwaa Belaba.â70Di araraa di ga atsuraa, â Aso abia iu Xan Tsi Moroaa, ngaa?â Ga xisi, â Gim paare tutiik we, iaa iwaa xa.â71Mil di ga suk paare weaatalaa, â Gita na xap ilei xa taamat bula ngali le paare leng taman ia. Gita se alongmen xan no totore, ia tsaa ta se paatina.â