1Iesu a paare ngali xan no tsi asasing, â No xonkonon biaa naba ta xaalame ngali xosaraa no inaman ngali di ba xosaraa namaang tsaxa. Oro xariin xirabas sin aia taamat ta le tali abia xonkonon sin xa!2Na ba suk axaau ngali xa na pistali xa xariin xaat sin inan ma na lii laangen ia lalon laman xoskos maxet ngali naba xap xosaraa xa ina abala no tsi dokdok na xol lalon namaang tsaxa.3Lowas, gim na xoxo sin gim tsaa. â Nawe num taamat a xosaraa namaang tsaxa, u na imii ia ma nawe a puxisbal u na adodolii xan no namaang tsaxa.4Nawe a xosaraa no namaang tsaxa apaasaalua susum sin leng ta xuuk ma xan inamula xaalame sangaam apaasaalua sebula ma ga paare, â Iaa puxisbal sin nugu no namaang tsaxa iaa ta xosaraa susum.â U na adodolii abia xan no namaang tsaxa.â5No aposal di asaaiti Orong, â U na aloti nagiem tinaalnge.â6Orong ga xisi di, â Nawe nagim tinaalnge adokdok mu malen xalitsa ina tsupa, gim pupua ngali asaaiti ilawaa ie xaso, â U na ruplii iu tsaa ma u na soxaa iu tsaa talaa lau,â ma naba lolong amusili gim.7â Nawe xa ina gim, xan untutule a laa pulis lalon uma ma ga tilaamamil sin no sipsip. Biaa untutule ta mula xaal lalon uma, naba pupua ngali asaaiti ia weaatalaa, â Xaalame ma u na le tsotso ngali angen?â8Asuk xap, naba sebula tulen, â U na laa sisil, taxaaturungi nugu luxaal ma u na tabali iaa ngali iaa ben angen ma nun, o mil nawe iaa se xap, iu soro.â9U we, iwaa manmanel naba putsangi axaau sin untutule amuina ta xosaraa abia no tinaxaa malen ta asaaiti ngali xosaraa? A suk xap.10Gim bula, biaa gim ta se xosaraa no tinaxaa malen Moroaa ta asaaiti gim, gim ba paare weaatalaa, â Giem no untutule gomsaa mu, giem taxaa puaa mu nagiem no tinaxaa.â â â
Iesu atoaa sangaul ina minet basbas
11Iesu a eses labatina prowins Samaria ma Galili ngali laa Jerusalem.12Biaa ta es tsiga lalon biexa xobel, asangaul no taamat di ta ie minet basbas, di sabasue ia. Di tiltil palpalaa tsaa,13di ga ilei lot, â Orong, Iesu, u na ie biirbirum sin giem!â14Biaa ta lasi di ma ga asaaiti di, â Gim laa asen no isuaan gim sin no unsausawit.â Biaa di es laa, di suk tuo sin abia maramase.15Iexa ina di, biaa ta lasi we a se tuo, asuk es mula laa sangan Iesu, ga xuup paipaʼii Moroaa.16A xaalame ma ga le sage putput sangan no xaden Iesu, ga putsangi axaau laa sin. Ia taan ina prowins Samaria.17Iesu ga atsura, â Iaa tii se atoaa sangaul ina taamat, o inaabi biexaal?18Asuk xap xa bula na mula ngali le paʼii Moroaa, iwaa taan Samaria mu.â19Ga paare ngali ia, â U na tapaas laa, num tinaalnge a se atoaa iu.â
Xaxaalame ina xan Maradaan Moroaa
20Biexaa Paarasi, di atsuraa Iesu, â Langisa so xan Maradaan Moroaa naba xaalame?â Iesu ga xisi di, â Xan Maradaan Moroaa naba xap xaalame sin gim ta liliis ma atsotsoxo ngali.21No inaman di ba xap we, â Lasi, balawaa se,â o â Biliaa se,â amuina xan Maradaan Moroaa bia lalon nagim no butsa.â22Mil ga asaaiti xan no tsi asasing, â Leng biaa naba ta xaalame biaa gim ba saan buxa ngali lasi xa leng ta xuuk, xan aia Xan Tsi Taamat, oro gim ba xap pupua ngali.23No inaman di ba asaaiti gim, â Iliaa se!â o â Ilawaa se!â Oro, gim nangaam amusili ma taltaalnge sin di.24Amuina Xan Tsi Taamat naba tsap malen tsilatsila ta atsilangi balalangit araraa.25Oro naba setauan alet sosong sin no daan maarang ma no inaman sin abia no utmilmil di ba palolii ia.26â Sin leng Xan Tsi Taamat naba ta mula, naba suk malen mu xan no leng Noa. Biaa mu uk maarang naba tsap.27No inaman di tii lo angangen ma nunun ma di tii emaxise til sin leng Noa tii tsiga lalon mono, o xariin tuun ma langit ga tsap ma ga suk aliaani no inaman araraa.28â Naba malen bula xan leng Lot. No inaman di tii lo angangen ma nunun ma di tii uulul ma sune taman no maarang, ma di tii soksok uma ma di tii tumtumar anua.29O sin abia leng Lot tii papaalii Sodom, ie mii no xaat lelep ausa xaal balalangit, ma ga suk tuun amantei no inaman araraa.30â Naba suk weaatala, sin abia leng Xan Tsi Taamat naba ta mula. No inaman di ba xap muun taxaaturung.31Sin abia leng nawe taamat a manman papan unga ina anua, o xan no maarang balaa naanua, naba xap pupua ngali tsuul ngali adi no. Naba malen bula taamat ta manman lalon uma naba xap pupua ngali mula laa lalon anua.32Adodomi samaarang tii tsap sin xan tubu Lot.33Nawe saa ia ta wena xonon ngali taxaariti xan tino, naba xosorlii xan tino, ma nawe sa ia ta tali xan tino ngali iaa, naba adi tino laaliu.34Iaa asaaiti gim, sin abia bing no taamat alua delu ba matul arie papan uk ibe, axuuk Moroaa naba giwaa, ma iexa naba manman mula.35No aina alua delu ba iesei tapiok arie, Moroaa naba giwaa xa ma naba papaalii iexa.â37Di ga atsuraa, â Orong, itaa abala maarang naba tsap?â Ga xisi di, â Nawe xa pakpak a met, ga xapul, sin abia xolot mu no xotkot di ba le exumule.â