Jon19ncf_wbt

Pailat a paare ngali ataxiwaa Iesu

1Mil Pailat tii ga tali Iesu sin no unmakmaxil ma di tii ga ririiti.2No unmakmaxil di xosaraa bungwal taman no suen xoxon ma di ga tsoben papan xuan ma di ga alen tali uga disdista de sin ia.3Di ga es laa sangan, di rereti, â Iu xadi king no Jiu!â Ma di ga tamtabaii ia sin no paartsen matan.4Pailat tii sebula mula laa sangan no Jiu, ga paare, â Gim lolong, iaa ba gii xaalamengen sangan gim, ngali gim tsaa, gim ba lasi malen iaa xap tatanginai xa muina ngali ilawaa taamat naba til nan ininte.â5Biaa Iesu tii es tsuul taman bungwal ta xoxor papan xuan ma uga disdis ta de, di tii alen tali sin, Pailat paare ngali di, â Lasi, iwaa taamat se aila.â6Biaa no lalaamua ina no unsausawit ma no unxoxo ina Xan Anua Moroaa di ta lasi ia, di suk xuup lot, â Ataxiwaa papan tongol! Ataxiwaa papan tongol!â Oro Pailat ga xisi di, â Gim tsaa, gim na giwaa ma ataxiwaa papan tongol. Amuina iaa xap tatanginai xa muina ngali ataxiwaa ia.â7No Jiu di xiis apopogoroi, â Giem ie lo bula, sin abia lo iwaa taamat na met amuina ta paare we, ia xan tsi Moroaa.â8Biaa Pailat tii alongen abia totore, asuk mataa buxa.9Atsiga mula laa lalon xariin anua, ga atsuraa Iesu, â Iu in itaa so?â oro Iesu tii ga xap xisi.10Pailat asaaiti Iesu, â U palo ngali paare mii iaa? O u xap xilalaa iaa, we iaa ie banam ngali aleiwaa iu ma ngali ataxiwaa iu?â11Iesu ga xisi, â A xap num ka banam ngali atilngi iaa nan ininte nawe Moroaa nii xap tali sin iu. Sin abia, iwaa taamat tii tali iaa papan no limaam, xan namaang tsaxa a lot buxa sin num namaang tsaxa.â12Amuina sin Iesu ta paare, Pailat asuk xonon ngali aleiwaa Iesu. A xap pupua ngali xosaraa amuina no Jiu di xuupkup, di ga we, â Nawe iu aleiwaa aila taamat, a xap turan iu Sisa. Saa ia ta we ia king, a epuske mii Sisa.â13Biaa Pailat tii alongen abia, asuk gii atsuulngi Iesu laa lokobel. Pailat tii ga xale papan xan niaan xalkale ina ininte. Iesan abia niaan xalkale, â Sal Xaat ina Esesâ (sin totore in Ibru, di putsangi taman â Gabbataâ ²).14A se atat ngali tail sin leng ina taxaaturung ngali leng ina Esliwaa.Giwaa laa, giwaa laa, ataxiwaa ia! (Jon 19:1-16) Pailat asaaiti no Jiu, â Ilawaa se nagim king.â15No Jiu di tii xuup mula, â Giwaa laa, giwaa laa, ataxiwaa ia!â Pailat atsuraa di, â Gim saan ngali iaa na ataxiwaa nagim king?â No lalaamua ina no unsausawit, di xisi, â A xap nagiem xa king bula, Sisa ta xuuk mu.â16O sin abia, Pailat a tapaas maaba ma ga tali ia papan no liman di, ngali di ba ataxiwaa papan tongol. Iesu a taxiu papan tongol (Metiu 27:32-44; Mak 15:21-32; Luk 23:26-43) O no unmakmaxil di ga giwaa Iesu laa.17Iesu tsaa atsaxei xan tongol ma ga es tsuul laa lalon xolot ina Barang (sin totore in Ibru, di putsangi taman â Golgaataâ ²).18Tia Golgaata, di suk ataxiwaa ia papan tongol. Di ataxiwaa bula no taamat alua mii ia, iexa sin papel lima mua o iexa sin lima xaiaar o Iesu lolobet ina delulu.19Pailat atalaa biexa inesaait ma di ga ataxiwaa papan xan tongol Iesu. Biaa inesaait a paare weaatala: â Iesu in Nasaret, xadi king no Jiu.â20Xuduxudu ina no Jiu di xoxoti abia inesaait amuina biaa xobel Iesu ta taxiu sin aman atataaen abia inaman laba. Was bula, Pailat atalaa abia pu inesaait taman no mat laxen totore a tuul: Ibru, Latin ma Grik.21Lalaamua ina no unsausawit di lasi abia inesaait ma di ga xap taton ngali. Di tapaas ma asaaiti Pailat, â Nangaam atalaa we, â Xadi King no Jiu,â oro u na atalaa, ilawaa taamat a we ia xadi King no Jiu.â22Pailat a xisi di, â Samaarang iaa ta se atalaa, biaa mu. Iaa se atalaa.â23Mulina no unmakmaxil di ta se ataxiwaa Iesu papan tongol, di adi xan no uga disdis ma di ga exasen no lolobet ina di sin no nabuk ta et. Taamat axuuk adi xan nabuk. Uga disdis a manman tsaa. Di adi uga disdis, biaa di ta ili xaal lapalaa laa pupua lapula, biaa di ta xap tsik xaili todomien lolobet.24Ma di ga epaare engen di, â Gita na xap tatari abala uga disdis, oro gita na uraura ngali saa naba adi.â Balawaa atsap ngali taxaawiti Inaatel Pat ta paare we,
â Di exasen nugu no uga lolobet ina di,ma di uraura ngali nugu uga disdis iaa ta alalen.âBalawaabi no unmakmaxil di tii ga xosaraa abala no maarang.25Biaa di, di tii tiltil sangan xan tongol Iesu: xan nagaa Iesu tsaa, tawaneina, xan nagaa, Maria xan tubu Kolopas, ma Maria Magdalin.26Biaa Iesu ta lasi xan nagaa ta tiltil, mii iwaa xan tsi asasing, ta xaa suk titii buxaai, a paare ngali xan nagaa, â Aina, num tsi aia.â27Ma ngali aia tsi asasing a we, â Num nagaa aia.â Sin abia leng, iwaa tsi asasing a giwaa xan nagaa Iesu ngali laa manman tatan.

Xan minet Iesu

28Iesu a se atii we xan no tinaxaa araraa a se xap, malen xan Mom ta tulen ngali le xosaraa. O ngali taxaawiti Inaatel Pat, Iesu ga paare, â Iaa marua!â29Sobuk taman waain manuul a manman mu tia sangan di, di adi xoltin ututesma di ga iwaa lalon abia waain manuul, di ga pis tali sin laxe ina isop, ma di ga tsulen laa sin no bulina Iesu.30Biaa Iesu ta nonopi ga xonmen araraai abia waain manuul, ga paare, â A se xap.â Mil ga atudungi xuan ma ga poroklii xan tino.31Sin abia leng ina taxaaturung ngali leng Saabat sin leng papan o no Jiu di ga palo ngali abia tuu ilua na taxiu lapalaa papan no tongol sin leng Saabat.Biaabi no Jiu di ga atsuraa Pailat ngali di ba pan xudili no xaden abia tuu taamat detuu ta taxiu lapalaa papan no tongol. Di atsuraa ia amuina di saan ngali di ba met isagaa, ngali di ba saali di laamuaan Leng Saabat.32Sin abia, no unmakmaxil di setauan laa ma xudili no xaden abia lo taamat delu ta taxiu mii Iesu.33Biaa di ta xaalame sin Iesu, di le tatanginai Iesu ta se met. Biaabi di ga xap xudili no xaden.34Oro, iexa unmakmaxil a laa ma tsoxaa Iesu sin xan baralus taman bili o dal ma daan ga rue tsuul xaal lalon no isuaan.35Balawaa papaare leng axaal sin taamat tii lasi abala no maarang taman no matan. Biaa no maarang ta paatina aso ma ga atii we a paare taman so, ngali gim bula, gim ba taltaalnge.36Balawaa no maarang atsap ngali taxaawiti Inaatel Pat ta paare, â Naba xap xakaa tuen naba tamkudil.â37Ma biexa xolot bula lalon Inaatel Pat ta we, â No inaman di ba nanen sin iwaa di ta tsoxaa.â

Xan pupuna Iesu

38Mulina abia no maarang ta se tsap, Josep in Arimatia a le atsuraa Pailat ngali adi xan pakpak Iesu ngali laa punami. Josep bula xan tsi asasing Iesu, o tii ga xaa es xuxii, amuina tii mataatinai no Jiu. Pailat asiriwaa Josep, ma ga laa adi xan pakpak Iesu.39Nikodimas, iwaa ta ben laa sangan Iesu nabing, a laa bula mii Josep, ga adi no daanwe ta tso mamainaang, di ta aturung tadamien no, ngali aturungi sin no isuaan Iesu ngali taxaaturungi ngali punami. Biaa no daanwe tso, xadi no iliil ta pupua malen no sangaul a tuul ma ga laa et ina kilogram.40Delu adi xan pakpak Iesu ma delu ga laa isi taman no uga, di ta tater adisi no, mii abia no daanwe ta tso mamainaang malen xadi namaang ina pupuna no Jiu.41Sangan abia xolot Iesu ta taxiu tia biexa uma biaa. Lalon abia uma lia pupuna uul biaa ngali pupuna, di ta xap mager pupuna lalon.42Delu atetei Iesu lalon abia lia pupuna ta atat mu amuina xadi leng no Jiu ina taxaaturung ngali leng Saabat.
expand_more
Search