REV - NUMAN9
1Ankyak inǝ bla shar Arik nǝ ntun avli mpluŋ maa. Fe Myik ncinces ire shu tǝ zhaku nǝ gɔŋmimi, tǝ nɛ nǝgu iki bu ankɔŋ anǝ dudu lǝlɛ kǝ yaŋ klɛtu kɛ abǝ ŋlɔk aneshir.2Ncincese ne bu dudumɔ, fe ntsiŋ irurɛ miŋɛ, ndi ntsiŋ yi rɛ imiŋ lu ngɔŋ; ilaŋ arik bǝn shu ikam tǝ ibu ne ntsiŋ yi rurɛ dudu kɛ yaŋ klɛtu.3Adamgbyaŋ aru are min kǝ ntsiŋe te anyɛ gɔŋmimi, fena ne nǝk ba mgbyamgbyaŋ ir zhiin ndi kɛ anǝlaŋ.4Ne di ba kǝr abɛ di abai tar agǝga kɔka atiŋɛ kuŋkun kɔka kiki iyi tɔ ne mimi; ama abɛ zǝ atu anere abaŋ ndi ba yi nǝ ngir kɛ Arik nenu ti amen ba.5Bane nǝk adamgbyaŋa mgbyamgbyaŋ kɛ ŋlɔk aneshir ba, ama abɛ sak ba iyah iyi ihwa tuŋ. Fe ilɔ iyi sak iyah mǝne itei yi ndi ilɔ iyi tar ilaŋ.6Nǝ min kɛ ihwa tuŋ ma atei wɔb te aba bɛ ku, ama ba tei yik kɛ ba; atei wɔb tǝ aba abɛ ku, ama iku itei klu ba.7Adamgbyaŋa ayi ndi anǝ ŋa abaŋ ndi ne nyak ba abe tǝ ikum; Ne atu amine ne su ikinuŋ ndi itu anku ikǝ zineriya, fe ati amǝne ne ru ati aneshir.8Fumfuk tu mǝne iyi ndi iye amba, aŋin amǝne ayi ndi aŋin zaki.9Asa amene ne kue nǝ kinuŋ ndi apǝpǝ anǝ zɔb, fe igu iyi bwak ne amgba mǝne iyi ndi igu ntsan anǝŋa tetɛk te gbur ki sa men te gar ikum.10Ayi ne bǝbɛ te atar ndi anǝlaŋ, fe ne bǝbɛ mǝne ayi nǝ mgbyamgbyaŋ kǝ sak aneshir iyah har ihwa tuŋ.11Ayi nǝ itum waŋ ndi agli ba, iwa ayi nǝ bla shar mǝne ndi ayi ngɔŋ ne dudu kǝ yaŋ klɛtu. Isak maa ne aŋa Yahudawa ayi Abadan; ne aŋa Helɛnawa ayi Afoliyon (watɔ <<Ine ŋlɔk aneshir>>).12Iyah iyi kuti nǝ gayir; fena tɔ, tǝ iyah nuŋ tar na nyɛ.13Ankyak inǝ bla shar Arik ne tani avli mpluŋ maa. fe Mwɔ ikɔr rurɛ njunju iyi zinariya kɛ amkpa anǝ tsik ibaŋ nǝ ti kɛ Arik.14Ikɔrɔ idi inǝ bla shar Arik nǝ tani me, <<Zhɔk abɛ bla shar Arik amɛ nas ndi nɛ kpa ba ne Inǝk ngɔŋ ne Yifiretis me!>>15Abɛ bla shar Arik amɛ nas ne zhɔk ba;tǝ mkpaŋ kǝŋe ne iber iyiŋɛ iyi ihwa kǝŋe bǝn ise ndi neka nyak tǝ abɛ ŋlɔk ntǝk kǝ ntar kɛ aneshir bɔbɔk.16Ne blam idu anɛr abǝ tei yuŋ aneŋa abɛ kpaakpa ma: ayi azhiin angɔŋgɔŋ amɛ 200,000,000.17Ndi Mnǝ yik ne rim lama ayi aneŋa bǝn abɛ yuŋ bama: Agli adaŋgbaŋ anǝ tǝ ikum asesen ndi ilu iyi ku asa, iyi kpuukpuk teyi ndi ama bula, tena yi ndindilim ndi ilu klikla. Atu anǝ ŋama ne ru atu anǝ zaki, fena ilu rurɛ nunu mǝne, ntsiŋ lilɛn lu klikla.18Ntǝk kǝ ntar kǝ aneshir ne ŋlɔk ba ne aganci ane ntar ayuŋɔ: ilu, ntsiŋ, ben lilɛn lu klikla ndi irurɛ nunu mǝne.19Tǝ mgbyamgbyaŋ kɛ aneŋa ma iyi nǝ nunu mǝne tǝ vuŋ bǝbɛ mǝne. Ibǝbɛ mǝne iyi ndi anǝwa iyi yi netu, ai yi aŋlɔk anɛshire.20Nki anɛshire, bɔbɔk abaŋ ndi bane ŋlɔk ba ne aganci me, ne kyak iwɔb ta zhɔk ne kiki iyi sub ne aŋɔk amen. Bane duŋ zukur shetan ba, bǝn arik ayi na ne azurfa, zinariya, mimi, mkpaŋ bǝn kuŋkun ndi ba yik ba, ba wɔ ba, kɔ ibǝ lu tsǝn.21kɔka abɛdi aba atei wɔb zuk zhɔk ne ŋlɔk aneshir, ina ku ayi, ibubu iyi kur bǝn amba kɔ alulum, kɔ izhib men.
The Word for the World International