REV - NUMAN7
Aner abǝ Isrela amɛ 144,000 ne sak ba ngir
1Ndi iyiŋɛ nǝ gayir Myik abǝ bla shar Arik amɛ anas aklɛkli nǝ ŋguŋgu nas iyi gɔŋmimi, akam agli amgba amɛ anas ma te yar ŋguŋgu tǝ kǝr abe duŋ fuk gɔŋmimi kɔ nǝk ngɔŋ kɔ atiŋe kuŋkun.2Fe Mtara yik inǝ bla shar ayou Arik nuŋ aru are gar kɛ anzaŋ, te gli ngir kɛ Arik tsitsir. Azhɔ abǝ bla ishar Arik amɛ nas ne kɔr ngɔŋ tǝ ne nǝk ba mgbyamgbyaŋ tǝ bɛ cɔk gɔŋmimi bǝn Inǝk ngɔŋ ala.3Inǝ bla shar ayou Arik adi,<<Duŋ cɔk gɔŋmimi kɔ Inǝk ngɔŋ kɔ iye atiŋe kuŋkun la ba sɛ tane sak ngir ne anuti iye agɛn abɛ Arik amɔr.>>4Fena Mwɔ idu aner abaŋ ndi ne asak ba ngire ne ati amen: 144,000 ibaŋ rɛ aŋa abǝ Isrela,5Ire ŋli nga kɛ Yahuda 12,000 ne sak ba ngir, Ire ŋli nga kǝ Ruben 12,000, Ire ŋli kǝ Gad 12,000,6Ire ŋli kǝ Asha 12,000, Ire ŋli kǝ Naftali 12,000, Ire ŋli kǝ Manase 12,000,7ire ŋli kǝ Siman 12,000, Ire ŋli kǝ Levi 12,000, Ire ŋli kǝ Isaka 12,000,8Ire ŋli kǝ Zebulu 12,000, Ire ŋli kǝ Yusuu 12,000,Ire ŋli kǝ Banyami 12,000.9Ndi iyiŋɛ nǝ gayir Mtɔ, fe te yik ntsan aneshir ndi inuŋ bai blaa ba aklɛ ba, ire kɔte ntun tayi, nga, aner, bǝn aŋa, aklɛkli ne ti kɛ mben ngɔŋ bǝn iti kɛ Nklu. Ne duŋ nǝ kluŋklu klikla te agli ayiya lik nɛ aŋɔk amɛn.10Te aŋar akɔr amen ngɔŋ: <<Ita zhɔk iyi bǝn Arik amɔr, iwaŋ ndi akɔsɔŋ nǝ mben ngɔŋ, bǝn Nklu mɔ!>>11Abǝ bla ishar Arik bɔbɔk ne kam mben ngɔŋɔ azhɔk ne tsutsu bǝn angɔŋgɔŋ bǝn kiki me nas iyi vli me. azeku nǝti kǝ mben ngɔŋɔ te agbar Arik,12tedi:<<Bǝ yi amɛ!Igbar bǝn nek ngɔŋBǝn mgbemgbebɛ bǝn nyɛr ŋgɔŋ bǝn mgbyamgbyaŋ bǝn iklikBǝyi bun Arik amɔr ne yaŋ klɛtu bǝn iyaŋ klɛtu.13Ankyak izhiin nǝ miŋ kɛ acicɛ me arib me, <<Abaŋ ndi asu kluŋklu klikla ma ayi anǝ ŋɔ bai, te ana rɛ amei?>>14<<Bam nǝ zhi ba, ŋgɔŋ. unǝ zhi,>> M sagu ma.
Fe adim, <<Abaŋa aye aneshir ndi ne alieru nǝ min kɛ iyik iyah ngɔŋ. Ne ŋla kluŋklu men te duŋǝ iyi klikla ne azhizhi ayou Nklu.15Waŋa ai ki yiŋ ndi ne duŋ ba akli ne ti kɛ mben ngɔŋ iye Arik te zekuru aririk ben ibu ne Akabaŋkɔŋ amaa. Iwaŋ ndi akɔsɔŋ ne mbene atei ŋub ba ne yime maa.<<Ayi ne ti kɛ mben ngɔŋ iye ArikTe gbaru aririk ben ibu ne akaba amaa;Fe iwaŋ ndi akɔsɔŋ ne mben ŋgɔŋɔ atei ŋub ba ne yime maa.16Ikasa ba iteina vuŋ ba kɔ ihrie ba; Ilaŋ arik batei vuŋ ba, kɔ abɛm wu,17te Nklu, iwaŋ ndi ayi ne atsutsu akɛ mben ngɔŋɔ, atei yi ne kyu ba, iwa atei gli ba te agar lelɔ ngyak tuk tsitsir kɛ yaŋ gbur. Tǝ Arik atei yis ba kɔte amayi atawa neyi.>>
The Word for the World International