REV - NUMAN5
1Mne yik Mplɛ kɛ cɛr ne ŋɔk li kɛ waŋ ndi akɔ sɔŋ ne mbɛn yi tum; ne ku icɛre ne akɔnɔsa bɔbɔk tena sak ngir amɛ ataŋgba.2Mne na yik ŋgɔŋ nuŋ ine shar ayou Arik, waŋ ndi ne du kɛ ne kɔr ngɔŋ te di, <<Iŋɔwa nɛ mla nǝ zuk ngir tǝ bu mplɛ kɛ cɛr kǝŋei?>>3Ama bane yik inuŋ ne igɔŋmimi ben igbarshu ka ne shin igɔŋmimi ndi ne mla ne bu kɛ te bɛ atɔ miŋe.4Mne zhin gbɔmgbɔŋ te bam nǝ mla nǝ bu icɛre te tɔ imiŋe ba.5Ankyak izhiin nǝ miŋ kɛ anuŋkubɔ adim te di, <<Duŋ zhin ka. Tɔ! Ici ne rɛ nga ŋli kǝ Yahuza, ngɔŋ ne nga ŋli kɛ Doda, nɛ li ikum, ne mla ne bu icɛre ben ngir me taŋgba ma.>>6Fe Mnǝ na yik Nklu aklɛkli ne atsutsu akǝ mben yi tu mɔ, ikiki yi vli me nas bǝn anuŋkub te kam mbene agɔŋɔri. Nklu mɔ ne ru aklɛ ndi ne ka men aŋunu. Ayi ne njunju ime taŋgba bǝn ayi amɛ taŋgba, waŋa ayi izhu ime taŋgba iye Arik ndi ne sha ru ne gɔŋmimi bɔbɔk.7Nklu mɔ ne gar te akɔte ta icɛre nǝ ŋɔk li kǝ waŋ ndi akɔsɔŋ nǝ mben yi tu mɔ.8Ndi ne na amɛ, ikiki yi vli bǝn anuŋkub sɔkyaa anǝ nas azǝ aku Nklu mɔ. kɔte tawa ayi nǝ mpluŋ bǝn agbǝgba ane zinariya ishak anyɛ anǝ yemgbo shushum, ndi ben yi aneshir abe Arik.9Aduk asem ayayas tedi: <<Unǝ mla nǝ baŋ mplɛ cɛrǝ te zuk ngire. Tǝ ne ŋunu, ama unǝ nek tu mi tǝ ku te lɛb Arik aneshir ire kɔte nga ŋli takɛ, aŋa, bǝn ntun tayi, bǝn aneshir abǝ gɔŋmimi.10Unǝ kam ba te abɛyi abɛ na ndum kɛ Arik amɔr, te bɛ Gli gɔŋmimi.>>11Fena Mne na ntɔ, te na wɔ okɔr abɛ shar ayou Arik, atetɛk! Aklɛkli agɔŋɔri nǝ mben yi Tum, ikiki yi vli ime nas, bǝn anuŋkub aneshire,12te duk asem ne kɔr ngɔŋ tedi: <<Nklu waŋ ndi ane ŋunu ne mla ne ta mgbyamgbyaŋ, adudunki, mgbemgbeb, iklik, ngɔŋ, bǝn gbar asak!>>13Ankyak fe Me wɔ kɔte iki yiŋ ndi Arik ne nai ndi iyi nǝ gbarshu, bǝn mimi, bǝn gɔŋmimi, bǝn inǝk ngɔŋ, bǝn kiki bɔbɔk yi vli ndi iyi nǝ gɔŋmimi aduk asem te di: <<Iwaŋ ndi akɔsɔŋ nǝ mben yi Tum bǝn Nklu mɔ, igbar asak, ngɔŋ, bǝn nek ngɔŋ, ibǝyi mi iyaŋ klɛtu!>>14Ikiki yi vli me nas ma itanyɛme tǝ di, <<Bǝ yi amɛ!>> Ankyak anuŋkub neshir sɔkyaa anǝ nas maa azekur.
The Word for the World International