REV - NUMAN17
1Ankyak izhiin ne min kɛ ataŋgba abɛ shar ayou Arik ndi agli agbǝgba ataŋgba anyɛ ben abɛm te di, <<Nyɛ, te mtei tsa ru ndi atei sak iwa ne zǝ alulum ngɔŋ waŋa iyah, waŋ ndi ntun yuŋɔ ndi ne mei yaŋ amashir tetɛk.2Waŋ ndi atum abɛ gɔŋmimi ne kur ben abɔu, waŋ ndi aneshir abɛ gɔŋmimi ne hwa ne ayi ane zǝ alulum amaa te kur ben abɔu.>>3Fe izhu tsetser ne yir me, ankyak ine shar ayou Arik ne glim te gar zizik ngɔŋ. Ne mwɔ Mniyik iwa maa akɔsɔŋ ne tu inarum sesen ne cɛr asak te yen Arik agɔŋ ari ne kpa maa bɔbɔk; Inarumɔ iyi ne atu amɛ ataŋgba bǝn njunju ime wur.4Iwama a su anklu dindilim, ben asesen, tena duŋ ne iki zineriya, ben mkpaŋ alfama, bǝn iyi yi klaklak. Agli ikparantse kɛ zineriya ne aŋɔk maa ndi kiki mimin ne shaga, idǝk kɛ zǝ alulum maa.5Ne ti maa ne cɛr isak keŋ ndi ne su kiki yir: <<Babila ngɔŋ, iyah ne amba abɛ zǝ alulum bɔbɔk bǝn kiki mimin.>>6Mne yik iwama ne hwa ne azhizhi aneshir abɛ Arik ben abaŋ ndi ne ŋlɔk ba ne zǝ ilɛ kɛ Yesɔ. Ndi mne yigu, mne vuŋ anu ngɔŋ.7Inǝ shar ayou Arik arib me. <<Uvuŋ anu ke nii>>? Mtei blau iki yi suyir yi iwa waŋa bǝn inarum yiŋ ndi igliu, ayi inarum yiŋ ndi iyi ne atu ataŋgba bǝn izuzu ime wur.8Inarumɔ ne bǝn yime tsitsir ama azizaŋa nǝ ka ku; itei nyɛ ne min dudu kɛ ku itei na ku. Aneshir atsitsir abǝ yi ne gɔŋmimi abaŋ ndi asak amene bane cɛrǝ ne mple kǝ asak abe yi atsitsir te shi kuti na gɔŋmimi ba, atei vuŋ anu ndi ate tɔ inarumo. Ine yi tsitsir; ama azizaŋa ba na yi tsitsir ba, ama itei na munru.9Izhi iki yiŋɛ se ne mgbemgbeb bǝn izhi ki. Atu ataŋgba ai igbu me taŋgba, ndi iwama akɔ sɔŋɔ. Anayi atum ataŋgba:10atuŋ nǝ min mǝne ne ka zhaku, izhiin ari kɔ sɔŋ nɛ beme, izhiin bane zen anyɛ ba; ntei nyɛ, atei nyɛ gli ba mkpaŋ watsɔb.11Inarum yiŋ ndi ne men yime ama ba na yime ba, ayi itum ne tender ne miŋ atum ataŋgba atei ŋunu.12<<Njunju ime wur ndi une yige ayi atum amɛ awur ndi bane zen anyɛn ba ba, ndi atei nyen ba te bɛ gli aneshir ndi atum bǝn inarumɔ mkpaŋ watsɔb.13Atum awur abaŋa ilɛ kɛ susun men yi ir zhiin, atei nek inarum yiŋɛ mgbyamgbyaŋ bǝn ngɔŋ men.14Atei tyak ikum bǝn Nklu; ama Nklu mɔ, bǝn abaŋ ndi ayi bǝn abɔu, abɛ zeu ne susun didik, atei li ba ne kumɔ, te iwa ayi Arik ne arik bǝn itum ne atum.>>15Inǝ shar ayou Arik ana dim, <<Amashir ayiŋ ndi une yige, ndi nǝ zǝ alulum waŋa akɔ sɔŋɔ, ai ntuntun, aneshir, ntsan aneshir, bǝn aŋa kaaŋkaŋ.16Njunju me wur ndi une yige, ben inarumɔ, atei te zor ben iwa ne zǝ alulum waŋa; atei ta iki yiŋ ndi ayime ne yi bɔbɔk te duŋu mgbawun; atei ta ina kpa maa tena gɔŋɔ ne lu.17Ai Arik wa ne duŋ asusun amen abɛ na iki yiŋ ndi wa ne duŋ ba nai tena nek inarum yiŋɛ mgbyamgbyaŋ men te abɛ gli aneshir sei ilɛ kɛ Arik ne shaga.18<<Iwa waŋ ndi une yigu ma ai ntun ngɔŋ ndi igli aneshir abɛ gɔŋmimi bɔbɔk.>>
The Word for the World International