REV - NUMAN11
Aner ayaa ndi neyik
1Ine shar ayou Arik ne nǝm mkpɔk ki ikɛyi ndi izɔb kɛ tsar gab, te dim, <<kɔmɔ te tsar gab iyi akaba ayou Arik ben bagedi, te bla idu aneshir abaŋ ndi ayir amkpa ane ku ayi ne akaba.2Ama duŋ tsar ŋakɛ abɛm ba, te nɛ nǝk abaŋ ndi ba yi ŋli kɛ Yahudawa ba. Atei lɔ acaŋ ntun tsetser ngɔŋ iyi Urshelima ihwa me sɔknas ane yaa.3Mtei shar aner amuŋ amɛ ayaa abɛ klɛ ne duŋ ne kluŋklu yi zhin ku, fena atei na du ilɛ kɛ Arik ne bɛr 1,260.>>4Aner abɛ klɛ amɛ ayaa ma ayi atiŋ kuŋkun zetun amɛ yaa ben ibitila abɛ laŋ amɛ yaa ndi aklɛkli ne ti kɛ Ŋgɔŋ ne gɔŋmimi.5Abɛ te zor anuŋ atedi aba atei cɔk ba ala, ilu rurɛ nunu mǝne te goŋ abɛ te ba izor o; neme iwaŋ ndi atedi wa awɔb ŋlɔk ba atei ŋunu.6Ayi ne mgbyamgbyaŋ kɛ ku gbarshu te duŋ alu batei ku ba ne mkpaŋ kɛ zen du ilɛ kɛ Arik mǝne. Ana yi ne mgbyamgbyaŋ kɛ kam amashir ane tuk, ikam te azhizhi; ana yi ne mgbyamgbyaŋ kɛ shur ilɔ kaaŋkaŋ ne gɔŋmimi ne ta nyɛmɛ men.7Ndi ne bla ishar du ilɛ mǝne aklɛ, inarum ngɔŋ iyi nek sisik irurɛ idudu ikɛ yaŋ klɛtu te ikum bene beba. Atei klik anaŋ ba te ŋlɔk ba,8fe akum amene atei kur ne ankɔŋ ane ntun ngɔŋ, ne amkpa awaŋ ndi ne akpaŋ Ŋgɔŋ amen ne kuŋkun kɛ gen. Iki ndi isak kɛ ntuno azhɔkǝ te Sodɔm, kɔ Masar.9Aner abɛ rɛ ntuntun, aŋa, imwen, ben ŋli atei tɔ akum amene iber me tar ne nki fe batei ta anyɛ me tǝ bɛ ru akum amene ba.10Aner abɛ gɔŋmimi atei nyɛr te aner ayaa ayuŋɔ ne ku. Atei na igyaŋ te shar akpa ne kiki, te aner ayaa abɛ na ndum Arik ayuŋɔ ne sak aner iyah ne gɔŋmimi.11Ndi iber me tar ne nki ite gayir ivli tsetser ikɛ rɛ ben Arik itei yir miŋ kpa mǝne, fena alu aklɛ adidik; fe abaŋ ndi ne yik ba akɔ te isisik.12Ankyak aner ayaa abɛ bla ilɛ kɛ Arik awɔ ikɔr ngɔŋ ire gbarshu te diba, <<Nye zhin ayaŋ!>>. Ndi abɛ te zor amene atɔ, akɔ kɔmɔ ne gbarshu ne min akpa.13Anenen ne kpaŋa igɔŋ mimi ne jaŋ; iŋa kɛ ntun ngɔŋ ne zǝr, fǝ ne ŋlɔk aner amkpik amɛ ataŋgba. Nki aneshire isisik ne vuŋ ba tǝ nɛ gbar ŋgɔŋ kɛ Arik ane gbarshu.14Iki iyi nek sǝsǝk iyi yaa ne gayir, iki iyi nek sǝsǝk iyi ntar batei baŋ mkpaŋ ba te nyɛ.Mpluŋ kɛ taŋgba
15Ankyak ine bla shar ayou Arik ine taŋgba avli mpluŋ maa, fena akɔr angɔŋgɔŋ ne gbarshu, tedi:<<Ikɔb ngɔŋ kɛ gɔŋmimi ne kam yi ikɔb ngɔŋ kɛ Arik Ŋgɔŋ amɔr ben Kristi ine hria amaa,Atei gli aneshir iyaŋ klɛtu.>16Fena anuŋkub sɔk yaa ane nas ma, ndi akɔsɔŋ ne mben men ne ti kɛ Arik, azekur te nek Arik ngɔŋ maa,17Tedi:<<Ta nek inyɛr ne atu ami, Ŋgɔŋ Arik Ŋgɔŋ bɔbɔk,Uyi waŋ ndi U men yimeTǝ nayi waŋ ndi Ukusɔŋ ne mbɛn yi Itum mi.18Aner abɛ kyak zeu ne ntuntun ne te mfu;Te mkpaŋ kɛ te mfu mi ne nyɛ.Mkpaŋ ne nyɛ kɛ te abɛ ku ŋas,Tena nek abɛ nau gen abɛ bla tɔ ti ami idǝk menBǝn abɛ zeu te vuŋ abaŋ ndi ne nek sak mi ŋgɔŋ,Ivǝtsob biŋ ngɔŋ iki zhiin.Mkpaŋ ne nyɛ ikɛ ŋlɔk abaŋ ndi ne aŋlɔk aner abe gɔŋmimi!>>19Ankyak akaba ayou Arik ne bu ne gbarshu, fena ne miŋ kɛ akaba amaa neyik amgbɔk lɛ ikɛ kpa nyak. Fe akɔ yik ilaŋ lulu, itsǝk nas tetɛk, igɔŋmimi ne jaŋ ben mkpaŋ alu ngɔŋgɔŋ.The Word for the World International