Gênesis25
Abraão vopiti ivo yoã
1Askávai txipo Abraãone shavo wetsa ninivarãóki ãwẽ anero “Quetura.”2Aaivo shavomẽsho ãwẽ vakerasĩ Zinrã, Jocsã, Medã, Midiã, Isbaque, Sua aatii ato meraki.3Sebanĩ Dedã merayaro Jocsã. Dedãne merávoro assurita yorarasĩ, letusita yorarasĩ, leumita yorarasĩ aatíi.4Midiãne merávoro Efá, Éfer, Enoque, Abida, Elda aatíi. Naarasĩ katsésero Queturã ato revomaa.5Aská akĩ Abraãone ãwẽ awerasĩ keyoki Isaque inãkéki.6Askámaĩnõ, ãwẽ aĩvorasĩ rakãamẽsho ãwẽ vakeyarasĩ ivoro onis akĩ awe ato inãpakevaíki, ãwẽ vopiti vevo Isaque ato pashkavakĩsho, “vari oákiri maĩ shokotana”, iinã ato yonoki.7Askái ãwẽ vari 175 niti.8Sheniwetsa mashtésho ãwẽ papavo merai kati.9Askámaĩnõ, ãwẽ vakerasĩni, Isaque, Ismael aatíishoro, shasho pepi sawéatõ atõ papa roa akávo. Aaivo shasho pepiro Macpelanamã, Manre orakama, Zoarpa vake, Efromne mainamã.10Anoro Abraão, ãwẽ aĩ tavá roa ativo, heteu yorarasĩ ato ãwẽ kopímashõ viãkãti ivo mainamã.11Askái Abraão vopimaĩnõ, txipo Isaque Yové Koĩni ãwẽ vana roapa ivo netãóki. Askái aaro vaná waka kesó nii kati, ãwẽ anero “Beer-Laai-Roi.”Ismaẽl vakerasĩ ivo yoã
12Naatíiro Ismaelmẽsho revoarasĩ yoã. Ismaelro Abraãone Hagarmẽsho, meramtá ivo vake. Aaivo aĩvoro, Sarã mee ima, Egito shavo.13Askái, Ismaẽl vakerasĩro naatíi. Ãwẽ vevokékaro, Nebaiote, atxõyase Quedar, atxõyase Abdeel, atxõyase Mibsão, atxõyase14Misma, atxõyase Dumá, atxõyase Massá,15atxõyase Hadade, atxõyase Tema, atxõyase Jetur, atxõyase Nafis, Quedemáro txipokéchta aatíi.16Askái naatii Ismaẽl merávoro 12 kakáya shovitivo. Askái atõ shavá, atõ peshé akánamã atõ anẽse anepakévo.17Askái Ismael 137 vari nishõ, ãwẽ papavo merai kati.18Ãwẽ revomarasĩro Havilánĩ Sur rakáa ivo mai tõovakĩ shokopaóvo, Egito mai kesotõ, ano Assurkiri kaa vainamã. Askái atõ takevonĩ ranĩnanãi shokopaóvo.Esaúnĩ Jacó iti ivo yoã
19Abraãone vake Isaque yoãnáro neská. Abraãone Isaque merati.20Isaquẽ, 40 varinamãsho Rebeca ninivarãki. Aaro Betuelpa vake, Labãone aweshavo. Atovoro arameu yorarasĩ Padã-Arãnamã shokotivo.21Askái ãwẽ aĩ revomaa oĩinã Isaquẽ Yavé ã aĩ vana ashõki. Askámaĩnõ ãwẽ vana nĩkãinã ashõki. Askái anosho, Rebeca tooinasho22vake ravé nanéi. Askái atõ ichnánanã tanainã, “ea awesáikĩ”, iinã Yavé nĩkãki.23Ãwẽ aská akatõsho, revíki. “Mĩ shakĩ naki yora shoko ravévakĩ ikatsaivere. Ravé pakévaĩsho pashkánanãkatsavo. Wetsa ivorasĩro mestẽpá ikatsaivo. Askámaĩnõ vake vevoke ivoro awesakeshóse txipoketõ yonoa niá ikatsaivere”, akĩ.24Askái Rebeca vake pakéti shavá nokómaĩnõ, anõse, venevake ravévakĩ nanéa tanaki.25Vevo pakékaĩya ivoro õchĩka, raniyãwaka aká oĩinã “Esaú”, akĩ aneki. 26Txipoke ivoro ãwẽ takẽ tae txĩtó atxisho pakékaĩi. Ãwẽ aská oĩinã “Jacó”, akĩ aneki. Aatiã Isaque 60 vari aya.27Askávai txipo vake ravé kanisho, Esaú ivoro yoiniya kanisho, askatase niitero niaya. Askámaĩnõ txipoke ivoro tanáyãwaka yora, askata shavapase niárvi.28Atõ papa Esaúmẽ noí noíka, yoini ichná merasho ãwẽ pimaatõsho, askámaĩnõ atõ ewaro Jacó ivomẽ noíka.29Askávai shavá wetsã Esaupa nitãi okĩ, shopĩ ranómaka tanainã Jacopa pasaa ivo30yokátachíki. “Ea shopĩ ranóma, mĩ pasa õchĩka ivo ea pima”, akĩ. Askásho txipo, Esaú “Edom”, akĩ anetivo, õchĩka ãwẽ pimaĩnõ. 31Ãwẽ askámaĩnõ Jacopa revíki. “Roase, askámẽkĩ ea txipokemẽkĩ, miã vevoke keská iyakeshõ ea oĩmatso askáro”, akĩ.32Ãwẽ aská akatõsho, “mĩ aská roase, yamairívi iki ea, vevokékasho ẽ ninõ ikĩka chinãtĩpá ea”, akĩ.33“Tavámatima ivo vanãpari ea arí”, akĩ Jacopa. Ãwẽ aská akatõsho, aaivo vanãpari avaikĩ vevoke ivo keská iyakeshõ Jacó eneshokĩ.34Aská amaĩno, Jacopa pão, lentilha pasa aká pimaki. Aská pii mashtévai Esaú weníinakaĩi kaí. Askái anosho, vevoketõ ari chinãotanáma, eneski.Wycliffe Bible Translators, Inc.