Neitou kake Salemo ni buloi e sou a vanunua ma tavivine
1Io a munugana golu oo no goli, ei maido. Me oo no kake Salemo ane sou a vanunua ma tavivine vuso me oo no goli a kinaka vuso, mo toledadangi e ei me oo no kake ei ni buloi e sou a vanunua ma tavivine.2Me oo no kaka tamai ane sou a mapamapana me sou a vanunua na niitealena avena. Maido me eitou vuso neitou ugu kuba me a lilone eitou ni mea, me neitou ogomuli iiti a inigogona vuso Salemo ei kale.3Matana kinaka maido ei doana na matane Salemo, ei e Salemo mina gualeliune eitou, me ieli ei toemongemonge e Salemo.4Salemo ei kale ni gualeliu e sou a vanunua ma tavivine vuso, ve ne sou muada a masovana inade i patotona.5Eitou muada, Salemo tasa moni ei eili. Me a bibi tasa moni ei magili balivua ne Salemo me sou a vanunua ma tavivine, bibi iedo ei e Krais Iesu.6Na ilala Salemo ei vileale, Krais ei iabitase a maulina minei oto mina gualeliuna vanunua ma tavivine vuso, me na inigogona ieli Salemo ei maite e eitou maido ei kale ni gualeliu e sou a vanunua ma tavivine.7Maido me Salemo ei vileale eau na palea a aposel me a bibi na pipigona mina veipalena inade minei iedo. Eau ade patotona, eau ma auala oto. Ei bilii e eau a pipigona mina matetengine sou a vanunua ma tavivine mine sou a abuna sea, ne sou silimuli e Krais me ne sou muada a inade i moliana.8Maido me eau kale a vanunua mina aububuna vuso ne sou beilange a limane sou me ne sou kaka. Eau kale ne sou danivusetase a inigogona paselepusina ma maisinoana.
Malolomena ivu mine sou a tavivine
9Inade tasa lou ei maido. Eau kale sou a tavivine ne sou kai a kinainai doana ue golu i mapigogoi moni e sou. Ne sou ma toetavinevine lei e sou, me ne sou ma malolomelome lei a aivune sou ma vovone sou a golugolu tomane a matamatana gapu me a golu i malasolosolo ma kinainai a mapana ei oata oto sele.10Tavivine sou kale ne sou ogomuli a inade mine Salemo, sou ne sou goli a matamatana pipigona i doana. Iedo ei a malolomena ivu mine sou.11Tavivine, ne sou toebisii e sou oto me ne sou vale moni me ne sou guale a inade mine Salemo.12Eau ma longo oto a tavivine ne sou muge a vanunua me ne sou matetengi a inade mine Salemo. Boa. Tavivine, ne sou vale moni me ne sou longe moni a inade.13Longe. Salemo ei mapale Adam pala, me mulimuli ei mapale Iv.14Me Adam ei ma silimuli ete a inade na aualana. Tavine ei silimuli a inade na aualana, me ei goli a sinusu.15Moni mane sou a tavivine sou silimuli e Krais taliuliu me sou mauli lilo na maolona me sou ogomuli a inigogona kinale sele usino ne sou sanii, io Salemo ei ni gualeliu e sou lilo na natuana mine sou.