Rom9mvn_jlb
Yaubada Ya Tomotau Me Isiraeli Wayahi
1Ataina yau ipupu yau yoko me Iudea wayahi anau‑yehai. Yauke Tau Ito‑yavuha nihenina amamaei, ka tauna yau ipupu taina nononi. Wayahina, aviani avonemi, akanai vonana vivane vona tunutunuhina, eha vitupu. Yauke au ayaunena nihenina anamane‑yehai vona taina vona tunutunuhina, ka kadu Yaubada Nuana awaehei aitamoata deina.2Avi tuta yau yoko me Isiraeli anuanuani, nuau ivita ananina wayahi. Iuna ataina taui Iesu ivihahaiei.3Aituhu au pata yauke yau dewa wayahi yai vitumahana Iesu wayahina anau‑vevewane, akanai yauke yau viama vivane Yaubada na‑bwanatau, e Iesu avo‑haini taui yai vidoha wayahina. Iuna taui me Isiraeli vavaneiu, ka taui adune‑nuanuaiei. (Kate Yaubada eha ya nuanua viamana deina nꞌ‑awaehe.)4Ka vona ahiahina, nonova Yaubada me Isiraeli vi‑nua‑dadanei, e payayei, taui natunatuna. Tutana tauna eta‑naoi papani Egipita ini‑tawanei, taui didigana idudueyei, ka tauna didigana vo‑patai idudueyei etawana tunina tunina wayahia. Ka kadu tauna ya veimea venei, ka viwavenei medeina itapanono tunuhina. Ka tauna vona‑dabadaba ahiahina venevenei kadu dewa ahiahina apa‑taputapuei wayahi, e nau‑wawani tuta tepaia ivaniahei.5Ka ataina itoai me Isiraeli atupua‑nenenehi yama tupua‑nenenehi ai wava anani wayahia, ka kadu Tau Ito‑yavuha ya tupua ininina vinꞌ‑omo yama tupua‑nenenehi aitamoata deina. Wayahina, ataina me Isiraeli kadu Iesu dede aitamoata inini nihenina. Ataina Iesu dewa habuhabuna veimeyei. Wayahina, nau‑wawanika Yaubada kanꞌ‑awa‑davedavei tuta eha a itoava wayahina! Ana pata deina.6Yaubada tauna ya vona‑dabadaba me Isiraeli venei taui yana yoko. Kadu tauna vona‑dabadaba wayahina apa‑taputapuei apaina aitam Tau Ito‑yavuha vi‑tunei na‑omo wayahia. Yaubada yana dewa kadu ya vona‑dabadabana aitamoata. Kate me Isiraeli tupwai Yaubada ya vonana eha ita‑vitumahane. Wayahina, kadueyei. Aka pata me Isiraeli katana‑vewani yoko ainua wayahia. Aituhu aviyaivia inini dayahi Abaraham ininina dayahina aitamoata, akanai kana‑vona taui me Isiraeli ininiata. Ka aituhu aviyaivia yai vitumahana Abaraham ya vitumahana aitamoata deina, akanai kana‑vona taui me Isiraeli ininia kadu taui me Isiraeli yai vitumahana wayahina.7Udu. Me Isiraeli habuhabui me Isiraeli ininia, ka tupwai me Isiraeli yai vitumahana mamaei, kate tupwai eha. Unuani. Yaubada Abaraham vonei, ivona,“Yauke avona‑dabadaba wayahimayam tupua‑nenenehi avenem.Kate yam tupua‑nenenehi ivinꞌ‑omonatum Isaki ana heta wayahina.Eha mani natum wayahina ivinꞌ‑omo.”8Tuta munia wayahina, Abaraham natunatuna habuhabui imamaei, eha Isaki ana heta. Kate Yaubada ya vonana Abaraham wayahina anꞌ anamana taina. Natunatuna habuhabui ininina wayahina eha natunatu‑hoina. Abaraham natunatu‑hoina vivane taui ai heta ivinꞌ‑omo Yaubada ya vona‑dabadabana wayahina.9Ka Yaubada ya vona‑dabadabana Abaraham wayahina taina,
“Aitam tuta avaha avi‑nua‑dadani,ka auyewana wayahina amavina wayahima,e awam Sara vi‑natuna onotona.”10Ka kadu aitam pai dune deina avenemi wami Isaki wayahina. Isaki me Isiraeli habuhabuka waka. Ka tutana awana ana wava Rebeka amwanainahe, madina natu‑yuayua.11Ka Yaubada Rebeka vonei, ivona,
“Apaina mai‑tupuina vi‑tau paisewanepena wayahina.”Naona Yaubada yanꞌ apa‑taputapu‑nana vinꞌ‑omo, e munia Rebeka vi‑natuna. Wayahina, kadueyei Yaubada yanꞌ apa‑taputapu‑nana anꞌ anamana eha ta‑vinꞌ‑omo Rebeka natunatui natu‑yuayua yai dewa wayahina. Iuna tutana apa‑taputapu‑nana vinꞌ‑omo, vona ahiahina, taui yai tupua eha. Apaina itupua. Wayahina, kana‑vona natunatui natu‑yuayuaia eha yai dewa ahiahina, kadu eha yai dewa goyona. Kate Yaubada ya nuanua naona mamaei, e naona tauna vi‑nua‑dadani deina.13Ka kadu aitam mataina Iginuma nihenina voneka vivane Yaubada ya ipupuna deina, ivona,
“Yauke Iakobo adune‑nuanuaiei,kate Esau atana‑wavinei.”14Yaubada ya vonana medeina? Kaiwadi, nau‑wawanika kana‑vona Yaubada yana dewa Esau wayahina eha tunutunuhina? Eha‑ohota.15Unuani, Yaubada kadu Mosese vo‑vi‑mahetei, ivona,
“Tupwai tomotau avi‑nua‑dadanei,e taui wayahi yau ate‑nuanuai avenevenei.Ka tupwai tomotau avi‑nua‑dadanei,e taui wayahi yau dune‑nuanuai avenevenei.”16Vonana wayahina kanꞌ‑anamanei tomotau eha ai pata Yaubada yanꞌ ate‑nuanuai o tauna ya dune‑nuanuai ivaniahe iuna taui yai nuanua ananina mamaei ivaniahei deina. Ka kadu eha ivaniahe taui yai paisewa ai nau‑pata wayahina. Eha‑ohota! Tomotau ai pata Yaubada yanꞌ ate‑nuanuai ivaniahei iuna tauna vi‑nua‑dadanei, ivaniahei deina.17Nonova, tutana Yaubada me Isiraeli eta‑naoi papani Egipita ini‑tawanei, tauna ipupu me Egipita yai kiniV, ivi‑wahani ParaoV, wayahina deina. Ivona,
“Yauke wamke am wava asi‑naievi‑kiniV me Egipita wayahia.Ka yau dewana iuna mamaei.Yauke yau nuanua tomotau habuhabuiaviwavenei inꞌ‑anamane‑vidohayauke wamke abagibagi‑tawanem.E munia au anamana na‑natatomotau yai ipupu wayahina,e tau maꞌ tanopi habuhabui inꞌ‑anamaneuyauke taua koiaka.”18Wayahina, vona ahiahina, aituhu Yaubada tupwai tomotau vi‑nua‑dadanei yanꞌ ate‑nuanuai venevenei, akanai tauna venei deina. Ka kadu aituhu Yaubada mani tomotau vi‑nua‑dadanei tauna ununui vo‑vi‑toyoa, e taui vatui, akanai tauna vo‑vi‑toyoa, e taui vatui deina.19Kaiwadi, dewana wayahina tupwami wayahiua uvonavona deina, “Aituhu itoka tomotau yaka dewa habuhabuna ivinꞌ‑omo Yaubada ya nuenuea, aviani wayahina Yaubada dewa‑yaiyaieka? Itoka tauna ya nuanua kadedewei, iuna tauna bagibagi‑vainena, ka itoka eha. Wayahina, aituhu itoka tomotau tauna ya nuanua kadedewei deina, aviani iuna tauna dewa‑yaiyaieka yaka dewa wayahina? Ya dewana eha tunuhina.”20Yaiau, itoka aka wava aviani? Eha nau‑wawanika Yaubada yana ipupu kanau‑pate. Udu! Iginuma nihenina ivona deina,
“Medeina? Aituhu aitam guguatauna a tau ai‑tai wayahina vi‑heyoheyo,dewana ahiahina o kadi goyona?Udu. Aituhu aitam guguatauna a tau ai‑tai vi‑tanatanaiei, ivona,‘Aviani wayahina enau‑vevewaneu deina?’vi‑tanai taina a vinꞌ‑omana eha ahiahina.”21Kadu aitam pai dune taina. Tau voa kunia tauna ana heta ya paisewa veimeyei, e tauna ana heta vi‑nua‑dadani medeina ya motopuna a tana‑vewana. Aituhu tauna ya nuanua motopuna tupwana tevani, e mai‑nuana kunia ana dune ahiahina voei kaikaiwabo wayahina, akanai deina. O aituhu tauna ya nuanua motopuna tupwana tevani, e vo‑kwayavonina kunia voei payapayaya wayahina, akanai deina.22Yaubada ya paisewa deinake. Tauna ya nuanua tomotau inꞌ‑anamanei tauna bagibagi‑vainena. Kadu tauna ya nuanua tomotau inꞌ‑anamanei tauna magana bawei dewa goyona wayahina. Tauna ana pata vo‑kwayavonina a havia habuhabui na‑vita‑vovoni. Kate eha ta‑dewe deina. Tauna potapota mamanaina. Udu. Taui a havia aitam kunia deina, ka tauna vo‑vi‑aiaiei vita‑vovona wayahina.23Vona ahiahina, tauna potapota mamanaina. Ka yana dewa aitam pai dune tau vitumahana wayahi. Tau vitumahana kunia tunina deina, ka tauna vo‑vi‑aiaiei vivane didigana na‑vo‑patai. Wayahina, yanꞌ ate‑nuanuai tau vitumahana wayahi kadueyei. Udu! Tau vitumahana vivane itoka tau ekalesia. Ka tauna honeka, e kavitumahanei. Ka kadu kanamanei tau vitumahana tupwaka me Iudea kadu tupwaka eha me Iudea.25Nonova Yaubada kadu dewana apa‑taputapuei. Osea ya iginuma nihenina ivona deina,
“Ataina taui eha me Iudea eha yau yoko,kate apaina avi‑wahani ‘yau yoko.’Ataina eha adune‑nuanuaie,kate apaina avi‑wahani‘taui adune‑nuanuaiei’.”26Yaubada kadu ivona,
“Nonova taui avonei,‘Itomi eha yau yoko.’Kate apaina, papani‑nana wayahina, avonei,‘Itomi Yaubada Amaꞌ‑vavaha natunatu’.”27Ka tau apa‑taputapu ana wava Isaia tauna na nua‑vitana apa‑taputapuei deina, ivona,
“Ataina me Isiraeli yoko ananina,ai yau magama tania deina.Kate apaina taui yoko kikituna,iuna Yaubada wayahiaaitonuata ai heta na‑ito‑yavuhi.28Iuna nonova Yaubada apa‑taputapu apainatau goyogoyona aitamoata aitamoatana‑dewa‑yaiyaiei.Kadu auyewana tepakaia yana dewavo‑kwayavoni vinꞌ‑omo taunayanꞌ apa‑taputapu wayahina deina.Ka auyewana wayahina eha aitam yai etawanaina‑novo‑tawane.”29Kadue Isaia ivona deina,
“Itoka me Isiraeli nau‑wawanikayaka Yaubada na‑dewa‑yaiyaieka,tauna me Sodom kadu me Gomoradewa‑yaiyaiei aitamoata deina.Yaubada Tau Bagibagi‑vavahatomotaui vita‑vovoni‑yehai.Kate aituhu eha yanꞌ am‑venenaawawaehina wayahikaia,nonova habuhabuka me Isiraeliiakwa.Kate tauna yanꞌ am‑venenaawawaehina veneka.Wayahina, ataina itoka kamamaei,ka apaina yaka tupua‑nenenehiivinꞌ‑omo imamaei.”30Wayahina, medeina kana‑vona? Aituhu itoka me Iudea yaka yoko kadu taui eha me Iudea yai yoko kabou‑viwavei, aviani kanꞌ‑anamanei? Vona ahiahina, nonova taui eha me Iudea eha ita‑naunau‑nene aitam etawana wayahina ividoha Yaubada matana. Taui eha etawanana ita‑naunau‑nene, kate udu! Taui avaha ivaniahei! Etawanana vivane Yaubada ivitumahanei.31Kate nonova a itoava tuta ataina wayahina, me Isiraeli etawana wayahina inaunau‑nene ividoha Yaubada matana. Kate taui eha ita‑vaniahe.32Taui inaunau‑nene‑wayohe. Iuna taui inaunau‑nene aitam veimea wayahina. Taui inuanua aituhu veimeana idedewei, ividoha Yaubada matana deina. Eha ita‑naunau‑nene medeina ividoha vitumahana wayahina. Wayahina, taui avaha hanu pai vito‑painena wayahina ivito‑painei.33Iuna Iginuma nihenina Yaubada ivona deina,
“Udu! Apaina aitam hanu pai vito‑painenaaboui papani SioniV nihenina,ka tomotau habuhabui ivito‑paine ipeu,iuna hanuna.Kate aituhu aviyaivia tauna ivitumahanei,taui ividoha akanai.Ka eha aitam tutataui ina‑ini‑yauyau mataua.”