Akar Mogomem4msy_pbt
Me Godɨn Nguibamɨn an ziam fe
1Ezɨ kɨ gɨn ua garima, Ame! Godɨn Nguibamɨn tiar akar mam kuiaghirɨgha iti. Ezɨ gumazir kɨ faragha oraghizim, a faraghavɨra pamten sɨghamɨn mɨn nan diazim, a datɨrɨghɨn ua kamaghɨn na mɨgei, “Nɨ kagh anang, eghtɨ kɨ bizir gɨn otivamiba bar nɨn akakagham.”2Ezɨ Godɨn Duam zuamɨra na gizɨvagha bar pamten nan ingari, ezɨ kɨ garima, Ame! Atrivir dabirabir mam Godɨn Nguibamɨn iti, ezɨ gumazir mam atrivir dabirabir kam gaperaghav iti.3Gumazir kamɨn guam dagɨar jaspa ko dagɨar konilian aghevimɨn mɨn taghtasi. Ezɨ ekianir mam, atrivir dabirabim torim gatɨ, ezɨ kɨ ekianir kamɨn gari a emeralɨn dagɨar garimɨn mɨn taghtasi.4Ezɨ 24plan atrivir dabirabir igharaziba, atrivimɨn dabirabir kam okari. Ezɨ 24plan gumazir dapaniba dabirabir kabagh apia. Gumazir dapanir kaba korotiar ghurghuriba aghuigha golɨn ingarizir dapanir asuaba uari gaghuigha mati atrivimɨn golɨn dapanir asuaba men dapanibar iti.5Ezɨ kɨ garima, onɨmariba atrivir dabirabimɨn otivaghira tintinibar sɨgha taghtasi. Ezɨ kɨ orazi nɨgɨnir ekiam otozɨ overiam tɨngaghe. Ezɨ atrivir dabirabimɨn guamɨn 7plan adeniba isia iti. Adenir 7plan kaba da 7plan Godɨn duaba.6Atrivir dabirabimɨn guamɨn bizir mam iti, a mati ongarir ekiam me glasɨn an ingarizɨ, a bar zuegha taghtasi. Ezɨ bizir angamɨra itir 4pla, atrivir dabirabim okarigha tuivighav iti. Bizir angamɨra itir 4 plan kaba, da damazir avɨriba itima da men mɨkarziba bar da ave, egha uaghan dar akɨragharibar iti.7Faraghavɨra itir bizir angamɨra itim, a mati laion. Ezɨ bizir angamɨra itir an gɨrara itim, a mati bulmakaun apurim. Ezɨ bizir angamɨra ikia aningɨn gɨrara itim, an guam mati gumazir guam. Ezɨ bizir angamɨra itir men gɨrara itim, mati kuarazir bagamɨn mɨn pɨn mɨghava arui.8Bizir 4plan angamɨra itir kaba, da 6plan avɨziba bar vaghvagha men iti. Ezɨ men mɨkarziba damazir avɨriba da ave, egha uaghan men avɨzibar apengan iti. Egha arueba ko dɨmagaribar kamaghɨn mɨgei:“Ekiam, a Godɨn Gavgaviba Bar Itim.Egha a bizir kuraba bar dar saghon ikia a bar zue.A bar zue,a bar zue.A fomɨra ikia,egha datɨrɨghɨn ikia,egh gɨn uamategh izam.”Me mɨgɨrɨgɨar kam gamua mamaghɨra ikia egha avughsaziba puvatɨ.9Bizir angamɨra itir kaba, me gumazir uan atrivir dabirabim gaperaghav itim bagha bar akonge, a gumazir zurara angamɨra itim. Egha me an ziam fava, egha a mɨnabi. Ezɨ bizir 4plan angamɨra itir kaba zurara dughiabar kamagh amuvɨra itima,1024plan gumazir dapanir kaba gumazir atrivir dabirabim gaperazimɨn guamɨn teviba apɨri. A gumazir zurazurara itim ezɨ me an ziam fe. Me uan golɨn dapanir asuaba asia da isa atrivir dabirabimɨn guamɨn boroghɨn da akuri. Egha kamaghɨn ighiam gami:11“Nɨ en Ekiam, en God.Nɨ biziba bar dar ingari.Egha nɨ uan ifongiamɨn,biziba bar dar ingarizɨma da otifi,ezɨ datɨrɨghɨn biziba bar iti.Kamaghɨn amizɨ, nɨrara e uari nɨn toroghanɨn ziam bar pɨn anetɨ.Gumazamiziba bar nɨ bagh bar akuegh,egh nɨn ziam fɨva,nɨn gavgavimɨn apengan ikiam.”