1Gumazamizir, men daroriba Ikiavɨra Itir Godɨn damazimɨn osɨmtɨziba puvatɨziba,Ikiavɨra Itir Godɨn Arazibar gɨn zui, me bar akongegham!2Gumazamizir kaba uan navir averiabar aven nɨghnɨzir vamɨran ikiava,an akabar gɨn ghua bar akonge.3Bar guizbangɨra, gumazir kaba arazir kurabar gɨn zuir puvatɨ.Me Ikiavɨra Itir Godɨn Arazibara gɨn zui.4Nɨ uan akaba e ganigha gɨvagha ghaze,e deraghvɨra dar gɨn mangam.5Kɨ kamaghsua ifonge,kɨ nɨn arazir nɨ ifongezibar gɨn mangɨsɨ bar gavgavigham.6Kɨ nɨn Akar Gavgavibagh nɨghnɨghvɨra ikiam.Kamaghɨn kɨ aghumsɨghan kogham.7Kɨ deragh bizir nɨ damuasa e mɨkemeziba bagh nɨghnɨghɨva,bar uan navim sara nɨn ziam fam.8Arazir nɨ ifongeziba, kɨ dar gɨn mangasa.Nɨ na ataghɨraghan markɨ!
Gumazim Godɨn Akar Gavgavimɨn gɨn zui
9Gumazir igiam, a tuavir manamɨn Godɨn damazimɨn zuegham?A nɨn akamɨn suiragh gavgavigh an gɨn mangɨ, egh zuegham.10Kɨ uan navir averiamɨn aven nɨghnɨzir vamɨran ikɨva, nɨn ingangarim damuasa.Nɨ nan akuraghtɨ kɨ nɨn Akar Gavgaviba ataghɨraghan kogham.11Kɨ nɨn akam uan navim ko nɨghnɨzimɨn aning gatɨ.Kamaghɨn, kɨ arazir kuratam nɨn damazimɨn a damighan kogham.12O, Ikiavɨra Itir God kɨ nɨn ziam fe.Nɨ uan arazir ifongezibar nan sure damu.13Bizir nɨ damuasa e mɨkemeziba,kɨ dar gun gumazamizibav gei.14Dagɨar avɨriba ko bizir avɨriba, kɨ dagh ifonge, ezɨ God gifongezir arazim, bar bizir kabagh afira.Ezɨ kɨ nɨn akaba bagha bar akonge.15Nɨn akaba, kɨ deravɨra dagh nɨghnɨgha dagh ami.Egha deragha dar gara da tuisɨsi.16Nɨ ifongezir araziba, kɨ dar gɨn mangasa bar akonge.Egh da gɨn amangan kogham.
Gumazim Godɨn Akar Gavgaviba uan navir averiamɨn dar gɨn zui
17Nan ifongiamra kara, kɨ angamɨra ikɨ, egh nɨn akamɨn gɨn mangam.Kamaghɨn kɨ nɨn ingangarir gumazim, nɨ bar deraghvɨra na damu.18Nɨ nan damaziba kuightɨ kɨ bizir bar aghuiba,nɨn Arazibar aven dar ganam.19Kɨ dughiar ruarimɨn nguazir kamɨn ikeghan kogham.Nɨ uan Akar Gavgaviba nan mongan markɨ.20Nan navir averiam bizir God damuasa mɨkemezibar gɨn mangasa,dughiabar zurara na dɨkafi.21Gumazamizir nɨn Akar Gavgaviba batogha akɨrim ragha nɨn akabagh asiba,nɨ men atarɨva me gasɨghasigham.22Ezɨ kɨrara, kɨ nɨn akabar gɨn zui, ezɨ gumazamizir kaba akar kurabar na mɨgɨa na dɨpofi.Me uam akar kabar na mɨkɨman kɨ aghua. Nɨ men anogorokegh.23Gumazir dapaniba uari akuvagha, na mɨsoghasa akam mɨsosi.Ezɨ kɨ nɨn ingangarir gumazim, kɨ zurara nɨn akabar suiragh dagh nɨghnɨgham.24Nɨn akaba bar deravɨra nan sure gamizɨma, kɨ da bagha bar akonge.Da deravɨra nan akurvazi, kɨ deravɨram arui.
Gumazim Godɨn Akar Gavgavimɨn gɨn mangasa
25Kɨ aremeghasava amua nguazir mɨnemeniabagh iraghu.Eghtɨ nɨn akam mɨkemezɨ moghɨn, nɨ na fegh gavgavim ua na danɨngigh.26Kɨ uan araziba bar dar gun nɨ mɨkemezɨ, nɨ nan akam ikara.Nɨ uan arazir nɨ ifongezibar nan sure damu.27Nɨ nan akuraghtɨ kɨ nɨn akabar aven itir akar mɨngaribagh fogham.Kɨ nɨn akar aghuiba zurara dar gan dagh nɨghnɨgham.28Nan navim bar na basemezɨ nan temeriba iri.Nɨn akam mɨkemezɨ moghɨn, nɨ gavgavim nan navim danɨngigh.29Nɨ nan akuraghtɨ kɨ ifavarir tuavim ategham.Nɨ ifongezir arazir aghuimɨn na damu, egh uan Arazibar nan sure damu.30Kɨ nɨn gɨn mangasa akam akɨrigha,egha bizir nɨ damuasa na mɨkemezibagh nɨghnɨsi.31O, Ikiavɨra Itir God,kɨ akar nɨ na ganɨngizimɨn suiragha an gɨn zui.Nɨ na ateghtɨ aghumsɨzir arazitam na bativan markɨ.32Nɨ fofozir arazir aghuir avɨriba na danɨngtɨ,kɨ nɨn Akar Gavgaviba atamra dar gɨn mangɨsɨ nɨghnɨgham.
Gumazim fofozim uabɨ danɨngasa Godɨn azangsɨsi
33O, Ikiavɨra Itir God, nɨ uan arazir ifongeziba zurara nan sure damu,eghtɨ kɨ dughiaba bar adar gɨn mangam.34Nɨ uan Arazibar mɨngaribar amightɨ da azenara ikɨtɨ,kɨ bar moghɨra uan navimɨn dar gɨn mangam.35Kɨ nɨn akar kam bagha bar akonge.Tuavir kɨ mangamim nɨ nan akaghtɨ, kɨ nɨn Akar Gavgavibar gɨn mangam.36Nɨ nan navim damightɨ a nɨn akabar gɨn mangɨsɨvɨra dɨkav.Nan navim bizir igharaziba bagh dɨkavan kɨ aghua.37Nan akuraghtɨ kɨ mɨngariba puvatɨzir arazir kuraba akɨrim ragh dagh asaragham.Nɨn akam mɨkemezɨ moghɨn nɨ deraghvɨra na damu.38Gumazir nɨn atiatiava nɨn apengan itiba, nɨ gavgavim me ganɨdi.Kamaghɨra, kɨ nɨn ingangarir gumazim, nɨ uan akar dɨkɨrɨzir kamɨn gɨn mangɨ deragh na damu.39Kɨ aghumsɨzir akaba baraghan aghua, nɨ nan akuraghtɨ akar kaba na abɨnan kogham.Guizbangɨra, bizir nɨ damuasa mɨkemeziba da bar dera.40Kɨ nɨn akabar gɨn mangasa bar ifonge.Nɨn Araziba da bar dera, kamaghɨn nɨ ikiavɨra itir ikɨrɨmɨrim na danɨng.
Gumazim Godɨn Akar Gavgavim, nɨghnɨzir gavgavim an iti
41O Ikiavɨra Itir God, nɨ faragha akar dɨkɨrɨzim gamizɨ moghɨn,nɨ uan apangkuvim, azenara nan akagh egh ua na inigh.42Kɨ nɨn akam nɨghnɨzir gavgavim an iti.Kamaghɨn, nɨ nan akuraghtɨ akar kurar gumazamiziba na mɨgeiba,kɨ da ikarvagham.43Bizir nɨ damuasa na mɨkemeziba, kɨ nɨghnɨzir gavgavim dar iti.Kamaghɨn, nɨ gavgavim na danightɨ,kɨ nɨn guizɨn akam dughiabar anekunvɨra ikiam.44Kɨ nɨn Arazibar suiragh dar gɨn mangɨvɨra ikiam.45Kɨ nɨn akabar gɨn mangasa ifonge.Kamaghɨn, arazir kuratam nan mɨkarzimɨn itir puvatɨzɨ kɨ fɨriaghɨrɨ.46Kɨ aghumsɨghan koghnɨn akabar gun atrivibav kɨmam.47Kɨ nɨn Akar Gavgavir kaba guizbangɨra bar dagh ifonge.Kamaghɨn kɨ da bagha bar akonge.48Kɨ nɨn Akar Gavgavibagh nɨghnɨzi da derazɨ, kɨ bar dagh ifuegha nɨ mɨnabi.Kɨ zurara nɨn arazir nɨ ifongezir kabagh nɨghnɨgham.
Gumazim ghaze, Godɨn akam a guizɨn bizim
49Kɨ nɨn ingangarir gumazim, nɨ faragha na koma akam akɨrizir bizim gɨnɨghnɨgh.Nɨn akar kam na gamizɨ kɨ nɨghnɨzir gavgavim nɨn iti.50Nɨn akar dɨkɨrɨzim ikɨrɨmɨrir aghuim na ganɨdi.Kamaghɨn amizɨ, osɨmtɨziba na bativir dughiamɨn, kɨ navir amɨrizimɨn iti.51Gumazir akaba batoziba dɨbovir akabar na mɨgei,ezɨ kɨ nɨn Araziba ataghɨrazir puvatɨ.52O, Ikiavɨra Itir God, bizir nɨ damuasa e mɨkemeziba, nɨ fomɨra e ganɨngizɨ kɨ dagh nɨghnɨsi,ezɨ da gavgavim na ganɨdi.53Gumazir kuraba nɨn Araziba abɨgha arazir kurabagh ami,ezɨ nan navim bar men ikuvigha men atari.54Kɨ uan nguibam ategha saghon itir danganibar ikia,nɨn arazir nɨ ifongezibar ighiabagh ami.55O, Ikiavɨra Itir God, kɨ dɨmagaribar nɨn ziam gɨnɨghnɨgha,egha nɨn Arazibar gɨn zui.56Nan arazir ekiamra kara,kɨ dughiabar zurara nɨn akabar gɨn zui.
Gumazim Godɨn Akar Gavgavibar gɨn mangasa
57O, Ikiavɨra Itir God, kɨ nɨ koma akar dɨkɨrɨzim gamigha ghaze, kɨ nɨn akamra gɨn mangam.Nan nɨghnɨzim ua bizitamɨn itir puvatɨ. Nɨ bar uabɨra kɨ nɨn ganam.58Nɨ faragha na ko akam akɨrizɨ moghɨn,kɨ datɨrɨghɨn uan navir averiamɨn pamten nɨn azangsɨgha ghaze, nɨ nan apangkufigh.59Kɨ uan daroribagh nɨghnigha gɨvagha,nɨn akabar gɨn mangasa nɨ koma akam akɨri.60Nɨn Akar Gavgavir kaba kɨ zuamɨra dar gɨn mangasa,kɨ suighsuighan aghua.61Gumazir kuraba na gekuigh na inigh uan arazir kuraba bagh mangasava ami.Ezɨ puvatɨ, kɨ nɨn Arazibagh nɨghnɨghavɨra iti.62Kɨ dɨmagarir arɨzibar dɨkava apiav ikia,bizir nɨ damuasa e mɨkemeziba bagha nɨn ziam fe.63Gumazamizir nɨn akabar gɨn ghua nɨn atiatia nɨn apengan ikia ingangarim gamiba,kɨ men namakam.64O, Ikiavɨra Itir God, nɨn apangkuvim nguazir kamɨn gumazamiziba bar me gizɨfa.Nɨ uan arazir ifongezibar nan sure damu.
Godɨn Akar Gavgaviba deragha en akurvasi
65O, Ikiavɨra Itir God, kɨ nɨn ingangarir gumazim,nɨ uan akamɨn mɨkemezɨ moghɨn arazir aghuimɨn na gami.66Kɨ nɨghnɨzir gavgavim nɨn Akar Gavgavibar iti.Kamaghɨn, nɨ nɨghnɨzir aghuiba ko fofozir aghuiba na danɨng.67Kɨ fomɨra tɨghar mɨzaziba iniamin dughiam, kɨ nɨn gɨn zuir tuavim ataki.Kɨ datɨrɨghɨn nɨn akaba baragha dar gɨn zui.68Nɨ bar deragha nɨn apangkuvim bar ekefe.Kamaghɨn, nɨ uan arazir ifongezibar nan sure damu.69Gumazir uari feba ifavarir akar avɨribar na mɨkeme.Ezɨ kɨ uan navir averiamɨn aven nɨghnɨzir vamɨra ikia, nɨn akabar gɨn zui.70Gumazir kaba uan navibar kumigha nɨghnɨzir aghuiba men puvatɨ.Ezɨ kɨ nɨn Araziba bar dagh ifonge.71Nɨ bar deragha mɨzazim na gase.Nɨ mɨzazim na gasezir bizir kamɨn, nɨ arazir nɨ ifongeziba nan aka.72Kɨ dagɨar avɨriba ikɨva bar akueghan kogham.Nɨn Arazimra kɨ bar a gifonge. A dagɨaba bar dagh afira.
Godɨn Akar Gavgavim a bar dera
73Nɨ uabɨ nan ingarigha deragha nan gari.Nɨ datɨrɨghɨn nɨghnɨzir aghuiba na danɨng, uan Akar Gavgavibar nan sure damu.74Kɨ nɨghnɨzir gavgavim nɨn akamɨn iti.Kamaghɨn, gumazamizir nɨn atiatiba me nan gan egh bar akuegham.75O, Ikiavɨra Itir God, kɨ fo bizir nɨ damuasa mɨkemeziba da bar guizbangɨra.Nɨ bar na gifuegha, nan araziba akɨrmɨghasa osɨmtɨzim na ganɨngi.76Kɨ nɨn ingangarir gumazim, nɨ faragha akar dɨkɨrɨzimɨn gɨn mangɨ,nan apangkuvigh gavgavim nan navim danɨng.77Kɨ nɨn Araziba bar a dagh ifonge.Kamaghɨn amizɨ, nɨ nan apangkuvightɨ, kɨ ikɨrɨmɨrir aghuim iniam.78Gumazir uari feba akar ifavaribar na mɨgɨa,pura na isɨ kotiam darɨghasa.Kɨ ghaze, gumazir kamagh amiba nɨ aghumsɨzim me danɨngigh.Eghtɨ ko, kɨ nɨn akaba zurara dagh nɨghnɨghvɨra ikiam.79Nɨn atiatia, egha nɨn akabar gɨn zuir gumazamiziba,me na bagh izɨ na ko ikiam.80Nan akuraghtɨ kɨ bar uan navir averiamɨn arazir nɨ ifongezibar gɨn mangam.Egh arazir kamɨn kɨ aghumsɨghan kogham.
Gumazim uabɨn akurvaghasa God ko mɨgei
81Kɨ fomɨra uabɨn akurvaghasa, nɨ mɨzua ghuava amɨra.Ezɨ nan gavgavim bar gɨfa. Kɨ nɨghnɨzir gavgavim nɨn akamɨn ikiavɨra iti.82Nɨ faragha akam akɨrizɨ moghɨn kɨ nɨn ganasa, ikia ghua nan gavgaviba bar gɨvazɨ, kɨ amɨra.Kɨ kamaghɨn mɨgɨa ghaze, “Nɨ manadɨzoghɨn nan akuragham?”83Kɨ memen nir me dɨpaba tuasa isamizir ghurimɨn mɨn ikuvizɨ, me a makuni.Ezɨ arazir nɨ ifongeziba, kɨ dar suiraghavɨra iti.84Kɨ nɨn ingangarir gumazim, manmaghɨn dughiabar kɨ zurara nɨ mɨzuam ikiam?Nɨ man dughiamɨn nan apaniba mɨzazim me gasam?85Gumazir uari feba nɨn Arazibar gɨn zuir puvatɨgha,nan suighasa na bagha modogha azuazim agura.86Kɨ nɨn Akar Gavgaviba nɨghnɨzir gavgavim dar iti.Ezɨ gumazir kuraba uan akar ifavaribagh amua arazir kurabar na gami, kamaghɨn amizɨ, nɨ nan akuragh.87Gumazir kurar kaba bar atam na mɨsoghezɨ kɨ aremeghai.Kɨ kamaghɨn aghuagha nɨn akaba ataghɨrazir puvatɨ.88Nɨ zurara nan apangkuf, egh deragh nan akurvagh.Kamaghɨn, kɨ nɨn akabar gɨn mangɨvɨra ikiam.
Gumazim nɨghnɨzir gavgavim Godɨn Akar Gavgavimɨn iti
89O, Ikiavɨra Itir God, nɨn akam ikɨvɨra ikiam.A nɨn Nguibamɨn ikɨ mamaghɨra ikiam.90Nɨn akam mɨkemezɨ moghɨn nɨ zuraram an gɨn zui.Nɨ nguazim an danganimram anetɨzɨma a ua mozorozir puvatɨ.91Biziba bar nɨn ingangarim gami.Kamaghɨn amizɨ, nɨ uabɨ mɨkemezɨ, biziba uan danganibara ikia, iza datɨrɨghɨn ikia kamaghɨra iti.92Kɨ nɨn Arazibagh ifongezir puvatɨzɨ,nɨ mɨzazim na gasegha na mɨsoghezɨ kɨ aremeghai.93Kɨ nɨn akabar gɨn ghua egha angamɨra iti,kamaghɨn, kɨ da ataghɨraghan kogham.94Kɨ zurara nɨn akabar gɨn zui, egha kɨ nɨ baghavɨra itir gumazim.Nɨ nan akuragh.95Gumazir kuraba na mɨsueghtɨ kɨ aremeghasa na bagha mɨzua mueghav iti.Ezɨ kɨ uabɨ, kɨ zurara nɨn akabagh nɨghnɨghavɨra iti.96Kɨ kamaghɨn fo, biziba bar gɨvamin oteviba iti.Ezɨ nɨn Akar Gavgavim bar dera, egh dughiabar vaghvagh zurara ikɨvɨra ikiam.
Gumazim Godɨn Akar Gavgavim bagha bar ifonge
97Kɨ nɨn Arazim bagha bar ifonge.Egha arueba ko dɨmagaribar a gɨnɨghnɨghavɨra iti.98Nɨn Akar Gavgavir kam na ko zurara ikia, egha fofozir aghuim na ganɨdi.Akar Gavgavir kam, nan fofozim gamizɨ a nan apanibar fofozibagh afira.99Kɨ zurara nɨn guizɨn akabagh nɨghnɨsi.Kamaghɨn kɨ fofozir aghuim ikia uan tisabagh afira.100Kɨ nɨn akabar gɨn zui.Kamaghɨn, nan fofozim gumazir aruabar fofozibagh afira.101Kɨ nɨn akamɨn gɨn mangasa ifonge.Kamaghɨn, kɨ arazir kuramɨn gɨn mangan aghua.102Nɨ uabɨ uan akabar nan sure gami,kamaghɨn bizir nɨ damuasa e mɨkemeziba, kɨ dar suiraghavɨra iti.103Nɨn akaba da bar isɨngi.Nɨn akar kabar isɨngtɨzim bar hanin isɨngtɨzim gafira.104Nɨn akaba nɨghnɨzir bar aghuim na ganɨngi,kamaghɨn kɨ arazir kuraba bar dar aghua.
Godɨn akam an angazangarimɨn mɨn iti
105Nɨn akam a lamɨn angazangarimɨn mɨn,tuavim nan akaghagha angazangarim na ganɨdima kɨ zui.106Kɨ nɨ ko akam akɨra ghaze,kɨ guizbangɨra bizir nɨ damuasa e mɨkemezibar gɨn mangam.107O, Ikiavɨra Itir God, osɨmtɨzir bar ekiam na avara.Nɨn akam mɨkemezɨ moghɨn, nan akuraghtɨ kɨ angamɨra ikɨvɨra ikiam.108O, Ikiavɨra Itir God, kɨ nɨ ko mɨgɨa egha nɨ mɨnabi.Kɨ nɨ mɨnabir mɨgɨrɨgɨar kaba mati, kɨ uan ifongiamɨn gɨn zuir ofan mɨn da nɨ ganɨdi.Nɨ da inigh, egh bizir nɨ damuasa e mɨkemeziba,nɨ deraghvɨra nan sure damu.109Kɨ uabɨ zurara atam ovia taghɨrasi.Ezɨ nɨn Arazim, kɨ a bakɨnɨghnighan kogham.110Gumazir kuraba mati azuazim asɨzimɨn suighasa, na bagha mongegha ikia azuaziba gui.Ezɨ kɨ nɨn akaba ataghɨrazir puvatɨ.111Nɨn akaba, kɨ dar suirazɨ da nan ikia kamaghɨra iti.Akar kaba nan navim gami a bar akonge.112Kɨ mɨkemegha gɨfa, kɨ nɨn arazir nɨ ifongezibar suiragh,dar gɨn mangɨvɨra ikɨ mangɨ ovegham.
Godɨn Akar Gavgaviba e gamizɨ e deravɨra iti
113Gumazir maba nɨghnɨzir vamɨra itir puvatɨ,men nɨghnɨziba bɨaghire.Gumazir kamaghɨn amiba kɨ bar men aghua.Kɨ uabɨ, nɨn Araziba bar dagh ifonge.114Nɨrara nan mogomer danganim, egha oramɨn mɨn na apazagha na modozɨ kɨ deravɨra iti.Ezɨ kɨ nɨn akam nɨghnɨzir gavgavim an iti.115Ia gumazamizir arazir kurabagh amiba ia na gitagh.Eghtɨ kɨ uan Godɨn Akar Gavgavibar gɨn mangam.116Nɨ gavgavim na danɨngasa na koma akam akɨrigha gɨfa, eghtɨ kɨ angamɨra ikɨvɨra ikiam.Nɨn akar dɨkɨrɨzir kam, kɨ nɨghnɨzir gavgavim an iti.Kɨ akar kam bagh aghumsɨghan aghua.Kamaghɨn, nɨ uan akar dɨkɨrɨzimɨn gɨn mangɨ gavgavim na danɨng.117Nɨ nan suiraghtɨ kɨ deraghvɨra ikiam.Eghtɨ, kɨ zurara nɨn arazir nɨ ifongeziba baragh dar gɨn mangam.118Gumazamizir nɨn arazir nɨ ifongezibar aghuaziba, nɨ akɨrim gigha me gasi.Men ifavarir akabar daghetam otoghan kogham.119Nɨ kamaghɨn nɨghnɨsi,nguazir kamɨn itir gumazamizir kuraba bar,mati bizir kurar gumazamiziba makunasava amiba.Kamaghɨn amizɨ, kɨ bar nɨn akabagh ifonge.120Kɨ bizir nɨ damuasa e mɨkemezibagh nɨghnɨsi.Egha kamaghɨn, kɨ bar nɨn atiatima, nan mɨkarzim nɨghava agoi.
Gumazim Godɨn Akar Gavgavibar gɨn zui
121Arazir aghuir kɨ nɨ ko gumazamizibagh amiba, da nɨn damazimɨn bar dera.Nɨ na ateghtɨ nan apaniba arazir kuramɨn na damuan markɨ.122Kɨ nɨn ingangarir gumazim, nɨ nan akurvaghsɨ na ko akam akɨram.Egh gumazir uari febar amamangatɨghtɨ me osɨmtɨzim na danɨngan kogham.123Kɨ nɨn akurvazim bagha mɨzua ghuava amɨra.Nɨn akar dɨkɨrɨzir aghuim, kɨ a iniasa dughiar bar ruarimɨn mɨzua ghuava amɨra.124Kɨ nɨn ingangarir gumazim, nɨ uan apangkuvir arazimɨn gɨn mangɨ deravɨra na damu.Egh deraghvɨra uan arazir nɨ ifongezibar nan sure damu.125Kɨ nɨn ingangarir gumazim,kamaghɨn nɨ nɨghnɨzir aghuim na danightɨ, kɨ nɨn akabagh fogham.126O, Ikiavɨra Itir God, gumazamiziba nɨn Araziba zurara da abɨsi.Nɨ datɨrɨghɨn mɨzazim me gasɨ.127Kamaghɨn amizɨ, kɨ nɨn Akar Gavgaviba bar adagh ifonge.Kɨ nɨn akam gifongezir arazir kam, a gol gifongezir arazim bar a gafira.128Kamaghɨn amizɨ, Kɨ nɨn akaba bar dar gɨn zui.Egha tuavir kurar igharaziba, kɨ bar dar aghua.
Gumazim Godɨn Akar Gavgavimɨn gɨn mangasa
129Nɨn akaba bar moghɨra dera,kamaghɨn, kɨ uan navir averiamɨn aven bar dar gɨn zui.130Gumazim igharazitavɨn akuragh nɨn akabar mɨngaribar an sure damightɨ,nɨn akamɨn angazangarim an navir averiamɨn ikiam.Akar kam nɨghnɨzir aghuiba puvatɨzir gumazamizibar amutɨ,me nɨghnɨzir aghuiba ikiam.131Kɨ nɨn Akar Gavgaviba uan navir averiamɨn dagh ifonge.Mati gumazim dɨpam bagha kuarim an pɨrima, a dɨpam apima an an kuarmɨzimɨn uaghiri.132Nɨ gumazamizir nɨn ziam gifongeziba, nɨ me gifongezɨ moghɨn,nɨ na bagh izɨ nan apangkufigh.133Nɨ faragha na ko akar dɨkɨrɨzim gamizɨ moghɨn deragh na gativagh nan gan.Eghtɨ arazir kuram na damightɨ kɨ irɨghan kogham.134Nɨ uam na inightɨ, gumazir akaba na gasiba na gasɨghasɨghan kogham.Eghtɨ kɨ nɨn akabar gɨn mangam.135Kɨ nɨn ingangarir gumazim, nɨ nan boroghɨn ikɨtɨ, nɨn angazangarim na gisiraghtɨ, nɨ deragh na damu.Egh arazir nɨ ifongezibar nan sure damu.136Gumazamiziba nɨn Arazibar gɨn zuir puvatɨ.Kamaghɨn kɨ puvɨram azima nan temeriba dɨpamɨn mɨn ivemari.
Godɨn Akar Gavgaviba da bar guizbangɨra
137O, Ikiavɨra Itir God, nɨ guizbangɨra bar dera.Ezɨ bizir nɨ damuasa mɨkemeziba da bar dera.138Akar nɨ e ganɨngiziba,da bar deragha bar guizbangɨra.139Nan apaniba nɨn akabagh nɨghnɨzir puvatɨ.Kamaghɨn amizɨ, nan navim avimɨn mɨn nan isi.140Kɨ nɨn ingangarir gumazim, kɨ nɨn akar dɨkɨrɨzimɨn ganigha a tuisigha fo, a bar guizbangɨra.Egha akar dɨkɨrɨzir kam kɨ bar a gifonge.141Kɨ gumazir kɨnim ezɨ gumazamiziba na dɨpofi,ezɨ kɨ nɨn akabagh nɨghnɨghavɨra iti.142Nɨn arazir aghuim a zurara ikiavɨra iti,ezɨ nɨn Araziba da bar guizbangɨra.143Osɨmtɨzir ekiaba na batifi,ezɨ kɨ nɨn Akar Gavgaviba bagha bar akonge.144Nɨn akaba da bar deragh ikɨ mamaghɨra ikiam.Nɨ nɨghnɨzir aghuim na danightɨ kɨ angamɨra ikɨ mamaghɨra ikiam.
Gumazim uabɨn akurvaghasa God ko mɨgei
145O, Ikiavɨra Itir God, kɨ uan navir averiamɨn aven nɨghnɨzir vamɨra ikiavanɨ ko mɨkɨmasa.Nɨ nan mɨgɨrɨgɨam barakigh.Kɨ nɨn arazir nɨ ifongezibar gɨn mangam.146Kɨ datɨrɨghɨn nɨn dɨa ghaze,nɨ ua na inightɨ kɨ nɨn akabar gɨn mangam.147Amɨnim tiasava amima nɨ nan akurvaghasa kɨ nɨn dei.Kɨ nɨn akaba nɨghnɨzir gavgavim dar iti.148Kɨ dɨmagaribar akuir puvatɨ.Kɨ nɨn akar dɨkɨrɨzim gɨnɨghnɨghavɨra iti.149O, Ikiavɨra Itir God, nɨ bar nan apangkufi, kamaghɨn nɨ nan mɨgɨrɨgɨaba barakigh.Nɨ bar moghɨra dera, kamaghɨn nɨ na akumakum nan gantɨ, kɨ deraghvɨra ikiam.150Gumazir nɨghnɨzir kuraba nan itiba, na gasɨghasɨghasa nan boroghɨra izi.Gumazir kaba nɨn Arazibar saghon ikia, dar gɨn zuir puvatɨ.151Ezɨ Ikiavɨra Itir God, nɨn Akar Gavgaviba da bar guizbangɨra.Ezɨ nɨ uabɨ, nɨ bar nan boroghɨra iti.152Bar fomɨra kɨ nɨn akabagh fo.Nɨ uan akar kam gamizɨ a ikia mamaghɨra iti.
Gumazim uabɨn akurvaghasa Godɨn dei
153Kɨ nɨn Araziba bakɨnɨghnɨzir puvatɨ.Kamaghɨn, nɨ nan osɨmtɨzibar gan nan akuragh.154Nɨ faragha na ko akam akɨrizɨ moghɨn,nɨ nan akuragh ua na inigh ikɨrɨmɨrir aghuim na danɨng.155Gumazir kuraba arazir nɨ ifongezibar gɨn zuir puvatɨ,ezɨ nɨ ua me inian kogham.156O, Ikiavɨra Itir God, nɨn apangkuvim bar ekefe.Nɨ faragha mɨkemezɨ moghɨn, nɨ nan akuraghtɨ kɨ angamɨra ikiam.157Gumazir avɨriba arazir kurabar na gamua egha na gasɨghasɨghasa,ezɨ kɨ nɨn akaba ataghizir puvatɨ.158Gumazir akaba batoziba, me nɨn Akar Gavgavibar gɨn zuir puvatɨ.Gumazir kaba, kɨ men gara nan navim bar ikuvizɨ, kɨ bar men amɨra.159O, Ikiavɨra Itir God, nɨ nan gari, kɨ nɨn akaba bar dagh ifonge.Ezɨ nɨ bar nan apangkufi, kamaghɨn nɨ uam na inightɨ kɨ angamɨra ikiam.160Nɨn akar kam a guizɨn akamra.Bizir nɨ damuasa mɨkemeziba da zurara ikia mamaghɨra iti.
Gumazim Godɨn Arazibar gɨn mangasa bar akonge
161Gumazir dapaniba arazir kurabar na gami, ezɨ men arazir kurar kaba, mɨngarir aghuitam itir puvatɨ.Ezɨ kɨ zurara nɨn akabagh nɨghnɨghavɨra iti.162Kɨ nɨn akaba bagha bar akonge.Mati gumazim dagɨar avɨribar apigha da isa bar akonge.163Kɨ guizbangɨra ifavarir arazim bar an aghua,egha nɨn Araziba kɨ bar dagh ifonge.164Dughiaba bar, a dar 7plan dughiabar,kɨ bizir aghuir nɨ damuasa mɨkemezibagh nɨghnɨgha nɨn ziam fe.165Gumazamizir nɨn Arazibagh ifongeziba, me navir amɨrizimɨn ikia bar deraghavɨra iti.Eghtɨ bizitam me damightɨ me asaghporegh ireghan kogham.166O, Ikiavɨra Itir God, kɨ nɨn akurvazim bagha nɨ mɨzua,nɨn Akar Gavgavibar gɨn zui.167Kɨ nɨn akaba bar uan navir averiamɨn dagh ifonge.Egha zurara dar gɨn zui.168Kɨ nɨn akaba, ko nɨn arazir aghuiba bar dar gɨn zui.Ezɨ nɨ bar nan arazibagh fogha gɨfa.
Gumazim uabɨn akurvaghasa God ko mɨgei
169O, Ikiavɨra Itir God, nɨ nan azangsɨzim baragh nan akuragh.Nɨ faragha mɨkemezɨ moghɨn, nan akuragh fofozir aghuim na danɨngigh.170Nɨ faragha na mɨkemezɨ moghɨn,nan azangsɨzim baragh nan akuragh.171Arazir nɨ ifongeziba, nɨ zurara nan sure gami.Kamaghɨn kɨ zurara nɨn ziam fam.172Nɨn Akar Gavgaviba da bar guizbangɨra,kamaghɨn kɨ dagh nɨghnɨgh, egh ighiabar amuam.173Kɨ nɨn akaba zurara dar gɨn zui.Kamaghɨn, nɨ zurara nan akurvaghsɨ gan ikɨ.174O, Ikiavɨra Itir God, kɨ nɨn akurvazim bagha ara nɨ mɨzuai.Ezɨ nɨn Araziba na gami kɨ bar akonge.175Nɨ na damightɨ kɨ angamɨra ikɨ, egh nɨn ziam fam.Eghtɨ bizir nɨ damuasa e mɨkemeziba en akuragham.176Kɨ nɨn ingangarir gumazim.Kɨ sipsipɨn ovengezimɨn mɨn tuavir aghuim ataki.Kɨ nɨn Akar Gavgaviba gɨn amadir puvatɨ,kamaghɨn amizɨ, nɨ na bagh izɨ na buri.