Aisaia50msy_pbt

1Egha Ikiavɨra Itir God kamaghɨn Israelian gumazamizibav gei:
“Jerusalemɨn nguibar ekiam, mati ian amebam.Ia ti ghaze, gumazim uan amuim batuegha bar anemadazɨ a ghuzɨ moghɨn,kɨ akɨrim ragha bar a gasara, a?Egh ia mamaghɨn nɨghnɨghtɨ, akɨnafarir poroghamiba uari ataghɨrazimɨn akam, a managh iti?Egha kɨ uaghan gumazitamɨn bizitam inizir puvatɨgha, uam a ikarazir puvatɨ.Ezɨ ia tizim bagha kamaghɨn nɨghnɨgha ghaze,ia nan boriba, kɨ uan ikarvazim akɨrmɨghsɨ,dagɨaba bagh pura ingangarir gumazir kɨnibar mɨn gumazir igharazibar ingarsɨ, ia amadagham?Kamaghɨn puvatɨ.Ian arazir kurar avɨribara na gamima, kɨ ian anɨngaghegha,akɨrim ragha Jerusalem gasaragha, a isa gumazir igharazibar agharim gatɨ.
2“Egha kɨ iza ia bagha rui gari, ezɨ manmaghɨn amizɨ gumazitam itir puvatɨ?Egha kɨ ian deir dughiamɨn, ia tizim bagha nan dɨmdiam ikarvaghan aghua?Ia ti ghaze, kɨ ua ia inian gavgaviba puvatɨ.Ia ghaze, kɨ ian akurvaghamin gavgaviba puvatɨ.Kɨ mɨkɨmtɨ, ongarim bar dakegham.Kɨ mɨkɨmtɨma, faner ekiaba bar dakegh gigir kɨnibar otivigham.Eghtɨ dar osiriba arɨmɨghiregh kuram.3Egh kɨ uaghan overiam damightɨ a bar pigham,mati gumazim ovengezɨ, ana bagha azirakar korotiam aru.”

Gumazamiziba Ekiamɨn ingangarir gumazim pazav a gami

4Ikiavɨra Itir God, en Ekiam, nan sure gamigha,uan akabar igharaz darazir sure damuamin fofozir aghuim na ganɨngi.Ezɨ kɨ an akam inigha, gumazamizir amiagha pura itiba,deraghvɨra men sure damuva gavgavim me danɨngam.Egha zurara mɨzarazibar, a na gaghurima,kɨ dɨkava suren gumazimɨn mɨn, an mɨgɨrɨgɨaba baraghasa bar ifonge.5Ikiavɨra Itir God, en Ekiam, uan akam baraghasa nan kuarimning kuizɨ,kɨ an akam batoghezir puvatɨ.Egha kɨ akɨrim ragha a gasarazir puvatɨ.6Kɨ pura uabɨ isa apanibar taghizɨ,me aghorimɨn nan akɨragharim mɨsogha, nan ghuamasɨziba asi.Me akar kurabar na mɨgei,kɨ men gari me nan guam giparima,kɨ uan guam men modozir puvatɨ.7Guizbangɨra, Ikiavɨra Itir God, nan Ekiam, nan gara nan akurvasi,kamaghɨn amizɨ, men akar kurar katam na abɨrazir puvatɨ.Kɨ fo, kɨ amir ingangarir kam bagh aghumsɨzim inian kogham,kamaghɨn amizɨ, kɨ gavgavim uabɨ ganɨga uan ingangarim gami.8God bar nan boroghɨra ikia ghaze,arazir kuratam nan itir puvatɨ.Eghtɨ apanir tuivighav itir kabar tav na isɨ kot datɨgh,akatam na gasɨ na mɨkemeghan kogham.Bar puvatɨgham.9Ia gan! Ikiavɨra Itir God, nan Ekiam, a uabɨra nan akurvasi.Ezɨ ua tina na mɨkɨm suam, kɨ arazir kuram iti? Puvatɨ.Akaba na gasi darasi,me mati korotiaba barareba da api, da okozokoregha bar ikuvizɨ moghɨn,me bar moghɨra ikuvigham.
10Ia Ikiavɨra Itir Godɨn atiatia an apengan ikia, an ingangarir gumazimɨn akabar gɨntɨziba,ia atiatingan markɨ.Ia angazangarim puvatɨgha mɨtarmemɨn arui darasi,ia nɨghnɨzir gavgavim Ikiavɨra Itir Godɨn ikɨva a mɨzuam ikɨ.11Ia gan! Ia nɨghnɨzir gavgavim Ekiamɨn itir puvatɨ,ia mati gumazamiziba tuavir mɨtarmebar mangasa, uari uan adenir avibagh aboi,ia uan arazir kamɨn gɨn mangɨ, e ganika.Ia mangɨ ikiamin danganim,Ekiam an amɨsevegha gɨfa, a mɨzazir bar kuram iniamin danganim.
expand_more
Search