1A ragbɛ! An Fa ye an kaninna ɲa mɛn ma, wo ka bon fewu! Fo a ye a fɔla an ma ko a denilu. An ye a denilu le ri jɔ. Dunuɲa mɔɔilu ma Alla lɔn. Wo le ka a kɛ, ii ti se a lɔnna ko andeilu ye a denilu le ri!2N kanintenilu, an ye Alla denilu le ri sisen! Kɔni an di kɛ ɲa mɛn ma, wo ma gbɛ fɔlɔ. Kɔni an ka a lɔn ko Isa Ɲenematɔmɔnin na ko wa lɛnkɛnɛmaya, an bɛɛ ri kɛ ikomin a jɛrɛ ye ɲa mɛn ma, baa a ye ɲa mɛn ma, an di a yen ten.3Mɔɔ mɛnilu jii lani a rɔ ko ii ri kɛ ikomin Isa, woilu ye ii jɛrɛ sɛninya ikomin Isa Ɲenematɔmɔnin sɛninyani ɲa mɛn ma.4Mɔɔ mɛnilu bɛɛ ye julumun kɛla, woilu ye Alla la sariya tiɲanna, baa julumun ye Alla la sariya tiɲan de ri.5Ai ka a lɔn ko Isa Ɲenematɔmɔnin nara sa a ri mɔɔilu la kojuu bɔ ii ma. Kojuu si tɛ ale ma.6Mɔɔ si tola Isa ma, wo tii tɛ to hakɛ kɛla. Mɛn tola julumun kɛla, wo tɛ Isa yenna fɔlɔ, a tɛrɛ ma a lɔn.7N den mɛsɛnilu, ai kana sɔn mɔɔ si ye ai lafili: mɔɔ mɛn ye taamala telenbaaya kan, wo telenni le ikomin Isa Ɲenematɔmɔnin telenni ɲa mɛn ma.8Mɔɔ mɛn ye kojuu kɛla, wo ye Kojuu Tii la mɔɔ le ri, baa kɛbi fɔlɔfɔlɔ Kojuu Tii ye kojuu kɛla. Alla Dencɛ nani le ka Kojuu Tii la kɛwaliilu tiɲan fewu.9Alla wa mɔɔ mɛnilu kɛ a denilu ri, woilu si tɛ tola kojuu kɛla butun, baa Alla la si ye to woilu ma. Ii ti se tola kojuu kɛla, baa Alla ra ii kɛ a denilu ri.10Alla denilu ni Kojuu Tii la denilu ye faranfaasila ɲa mɛn ma ka bɔ i ɲɔɔn na, wo le ɲin. Mɔɔ mɛn tɛ telenbaya sila taamala, wo tii tɛ Alla ta ri. Mɔɔ mɛn tɛ a badenma ɲenematɔmɔnin kaninna, wo tii tɛ Alla ta ri.
An ye an badenma ɲenematɔmɔninilu kanin
11Ai ka kuma mɛn mɛn kɛbi ai la lemɛniya waati, wo le ɲin, fo an ye an ɲɔɔn kanin.12An kana kɛ ikomin Kabila. Ale tɛrɛ Ko Juu Tii la mɔɔ le ri, mɛn ka a dɔɔcɛ faa. Nfenna a ka a faa? A ka a faa, ka a masɔrɔn a jɛrɛ la kɛwaliilu juu le la, ka a tɛrɛn a dɔɔcɛ la kɛwaliilu telenni.13A kana bara ai rɔ, n badenma, ni ai gboman dunuɲa mɔɔilu yɛ.14Andeilu ye an badenma ɲenematɔmɔninilu kaninna. Wo le kosɔn, an ka a lɔn ko an da bɔ saya rɔ ka don ɲenemaya kura rɔ. Mɔɔ mɛnilu tɛ ii badenma ɲenematɔmɔninilu kaninna, woilu ye saya le rɔ butun.15Mɔɔ mɛn ka a badenma kɔn, wo tii ni mɔɔfaala bɛɛ ka kan. Ai ka a lɔn fanan ɲenemaya banbali tɛ mɔɔfaala si bolo.16Isa Ɲenematɔmɔnin ka a jɛrɛ di ka sa an yɛ. An ka kaninteya lɔn wo le fɛ. An fanan ka kan ka an jɛrɛ di ka sa an badenma ɲenematɔmɔninilu nɔ rɔ.17A ye di? Ni fentii ka a yen ko a badenma ɲenematɔmɔnin dɛsɛni don? Ni a ka a ban hinala a badenma ɲenematɔmɔnin wo la, a ri se a fɔla ko Alla la kaninteya ye a fari rɔ wa?18Nba, n denilu, an ye kaninteya mɛn yirakala an badenma ɲenematɔmɔninilu la, wo kana kɛ da rɔ kuma gbansan di. Kaninteya wo ye kɛ kaninteya jɛrɛ jɛrɛ le ri, mɛn ye yirakala an badenma ɲenematɔmɔninilu la an na kɛwaliilu fɛ.19Ni an ye an badenma ɲenematɔmɔninilu kaninna wo ɲa le, an di a lɔn ko an ye tuɲa kan. Ni an ye an badenma ɲenematɔmɔninilu kaninna wo ɲa le, an hankili siini ri to Alla ɲakɔrɔ fanan,20baa hali ni an hankili ka a fɔ ko an ye kojuu kɛlailu le ri, an ka a lɔn ko Alla ka bon an hankili ri paaɔn. Ale le ka ko bɛɛ lɔn.21N kanintenilu, ni an hankili ma an jalaki, an di se Alla tarala lemɛniya rɔ.22An ye fen mɛn tarala, a ri wo di an ma, baa an ye a la jamariliilu labatola. An ye a diyanan koilu le fanan kɛla.23A ka jamarili mɛn di an ma, wo le ɲin: an ye lemɛniya a dencɛ Isa Ɲenematɔmɔnin ma, a ni an ye an ɲɔɔn kanin ikomin Isa Ɲenematɔmɔnin ka an jamari ɲa mɛn ma.24Mɔɔ mɛn ye Alla la jamariliilu labatola, wo tii sidini ye tola Alla ma. Alla fanan sidini ye tola wo tii ma. An ka a lɔn ɲa mɛn ma ko a sidini ye tola an ma, wo le ɲin: an ye wo lɔnna Nii Sɛniman de sababu la, a ka mɛn di an ma.