Zekaria11
1Aw Lebanawn, en kowh kimplawt dow uowah diah,en kowh aiuk akroma mih sidar singh maten kowi maih pauang kamah lah.2Aw karpowng singh, kar hai nguk hown uowi büa diah.Tawngplawng kowchow panow sidar singh dow tim khai bowt.Aw Basan pren kowi kowh sasua singh, kar hai nguk büa diah.Tawngplawng kowchow panow singh rüm krawngta kowi kowh singh maten dow kripta bowk khowk.3Ruapur thing miuüa kowh kar klow dow sünta büa diah,amatni kowh ruapur thing rah süng aiungma mih ün dow tapiak bowk khowk.Jawrdan aw ria kowi kowh kaurawng dow tapiak bowk khowk.Naiawng rakowi krangsi hawmh kowh hek klow dow sünta büa diah.4Ang kowh CHAKRAMANG Thurai tek ang mih, “Zekaria, nalüa ngenah kown mih ruapur hawmh kowi mingkhet dit.5Naiawngün ruapur hawmh kowi ran miuüa hai angen miuüa dow ka ripra dowi chekhai. Naiawngün ruapur sum miuüa dow, ‘Ang kureng khowk, CHAKRAMANG dow akiow pauowi lah,’ padow chang bawri büah khai. Athing miuüa khowm padow amatni kowh ruapur hawmh kowi sanaah dowi chekhai.6Nami powm iawng dow mami pren kowi kowh maru maten kowi ang nasanaah kown nadowi bowt. Maru maten kowi amatni tasin taken miuüa hai mang tut-e ang naap-ah kown. Amatni tasin taken miuüa hai mang dow pren mih napiakta nak kown. Nachenganchepaw amatni rut hownia mia kowi paw ang nalawngah kown nadowi,” pakhai.7Naiawng rakowi kun chang miuüa nalüa ngenah kown mih ruapur hawmh kowi dow ang mingkhet khai. Now ang paw raitua pre buk hanow ang chap pe ming khai: Lowk dow, “Sanara,” alowk mih dow, “Takrüpra,” padow ang chap pe khai. Now nami ruapur hawmh kowi dow ang mingkhet khai.8Now rik uowi mih ruapur thing mih sum ia kowi dow ala khowm chi dowi rawn ang prütta khai. Tawkchedow nami ruapur hawmh kowi ang taia khet dowi chekhai. Naiawng rakowi ruapur hawmh dow sak-hiah ang khai.9Naiawng kowh ruapur hawmh kowi ang tek pe mih, “Ang thing enni dowi bowt. Kowng kown laiklow uowi mih dow kowng büah towbowt, now piak kown laiklow uowi mih dow pacham piakla towbowt. Ta lat miuüa dow lowkkowlowk tacha nga büah towbowt,” pakhai.10Nami kung kowi “Sanara” pami raitua dow ang pawah hanow ang klowkta khai; naiawng hai chenchap maten hown ang kowh laikham uowi mih dow ang piakta khai bowt.11Now nami ni kowi nami laikham dow chur khai bowt. Naiawng rakowi ruapur kun chang miuüa mih naiawngün khi hanow nami dow Thurai hownia kowh uang ting mih laiklow chekhai pami tuk büah khai.12Now ruapur kun chang miuüa kowi ang tek pe mih, “Enni che pe ang ruapur thing kha kown nau khai hanow pe ang büah. Enni che pe ang kown nau dowi now hauang pe ang büah,” ang pape khai. Now amatni dow tai tangka süngkawmchow pe ang büah khai.13Nami khin khe CHAKRAMANG tek ang mih, “Matawng iawng chowbowt chow naiawng khowtchow pache tuk pe en khai. Nami tai tangka Thurai chup kim kowi kowh tangka towk rah kowi kowkuakta khai,” pakhai. Now nami tai tangka süngkawmchow mih dow Thurai chup kim kowi kowh tangka towk rah kowi ang kowkuakta khai.14Nami kung kowi alowk mih “Takrüpra” pami raitua paw ang klowkta khai; naiawng hai Judauüa hown Israeluüa kowh taichow nauchowra dow ang churta pe khai.15Nami khin khe CHAKRAMANG tek ang mih, “Khaleng dow bualama mih ruapur thing mih kowh uan kutplan paw iawk diah.16Tawngplawng kowchow panow mami pren kowi e ang nauang pawla ruapur thing mih lowk ia kown; nami dow lainowmma nanga kown. Nami ruapur thing mih dow kla phih mih ruapur hawmh kowi namingkhet kown nadowi, cham taset miuüa kowi paw nakrawi cham kown nadowi, ka arau miuüa kowi paw narawah kown nadowi. Kow iungma miuüa kowi paw napeah chakkham lak dow nachaah kown. Now akeh kowi kowh anga pat naklawngah hanow nachata kown,” pakhai.17Nami bualama mih ruapur thing mih kowh piakra nauang ting kown mih dow kramra uowi lai kowbow!Aia dow aia kowh ruapur hawmh kowi towla hüah hanow powtta khai.Naiawng rakowi aia kowh rut dow akeureuchow pacham uowi lah,aia kowh hawmlawm mik dow pacham hing du ngowng lah.Saidawng dow aia kowh rut kowi pacham sawtah lah,aia kowh hawmlawm mik kowi paw pacham sawtah lah.
The Seed Company