Meng Lai135
1CHAKRAMANG kowi kiow büa diah,CHAKRAMANG ming kowi rowsi büa diah.CHAKRAMANG kim kowi kowh lup chang miuüa low,CHAKRAMANG kowi rowsi büa diah.Anging kowh Thurai chup kim viadawng kowi chang lup miuüa low,CHAKRAMANG kowi rowsi büa diah.3CHAKRAMANG dow aiungma.Naiawng rakowi aia kowi kiow büa diah.Aia dow saksing sana reng.Naiawng rakowi aia ming kowi rowsi meng tek büa diah.4CHAKRAMANG dow aiamat vüi Jakawb kowi kloah khai,aia dow asung uowima mih dawngthawnguan nachangla kownkow Israel kowi kloah khai.5CHAKRAMANG dow kri kraingma pami ang tuk chekhai,anging kowh CHAKRAMANG dow akeng mih thurai lak-e kri kraing chekhai.6CHAKRAMANG dow lowra kowi aia nau iawng krawi chang lup reng,aia dow mukuang kowi, lusa kowi hai sata abüpma mih kowi aia nau iawng krawi chang lup reng.7Aia dow prenchur nammowt hownia uang pawla uangnim reng,aia dow pla nowi hailawm uangchak kowi uang pe klaah reng chekhai.Now li kowi dow aia uowi rah hownia uang pe hutah reng chekhai.8Aigupta pren kowi kowh chapa ta maten kowi saita mih dow aia chowtaih,aia dow chapa ta hai tawncher kowi kowh rik pen mih ala maten kowi saita pe khai.9Aia dow Faraw hai aia kowh maru iukuüa kowi naripah kownkowAigupta pren kowi amatra hai awdara lup chang pe khai.10Aia dow chenchap ahuma kowi piakah khai,now akürma mih manguüa kowi saita khai.11Aia dow Amawruüa kowh mang Sihun hai Basan pren mang Awg kowi saita khai,now Kanan pren kowi kowh manguüa maten kowi paw aia saita bowk khai.12Aia dow amatni kowh pren maten powngta pe bowk khai,now naiawngün pren mih aia maru Israeluüa kowi aia peah khai.13Aw CHAKRAMANG, en kowh ming dow atungma maru natuakah reng kown.Aw CHAKRAMANG, en kowh ming iung nang iung dow chowngchowng saksakma anikma chekhai.14Tawngplawng kowchow panow CHAKRAMANG dow aia maru-uüa kowi nachet pe tara nowm kown,now aia kowh naruüa kowi nasaksing sanaah reng kown.15Akeng chenchapuüa kowh thurai dow kuh hai tai hown kowh thawpah mih chowtaih,naiawngün dow lusa maru rut hown kowh thawpah mih chowtaih.16Amatni kowh dow nawr uowi chowdiah.Tawkche nowng tek lai dowi chekhai.Mik paw uowi chowdiah;tawngpaw ia khi dowi chekhai.17Amatni kowh dow param uowi chepaw ia ta dowi;now amatni dow nawr hownia nowng hü sak dowi chekhai.18Naiawngün arup aren thawp miuüa dow naiawngün arup aren iawng naown kown,now naiawngün luk kowi owm miuüa hai neplawng nesak miuüa paw naiawngün arup iawng naown kown.19Israel krungchakuüa low, CHAKRAMANG kowi kiow büa diah,Arawn kowh krungchakuüa low, CHAKRAMANG kowi kiow büa diah.20Levi krungchakuüa low, CHAKRAMANG kowi kiow büa diah,CHAKRAMANG kowi ringkaw miuüa low, aia kowi kiow büa diah,21Zaiawn marow kowi CHAKRAMANG kowi rowsiah büa diah.Tawngplawng kowchow panow aia dow Jerusalem marow kowi uowi chekhai.CHAKRAMANG kowi kiow büa diah.
The Seed Company