Meng Lai132
Mami dow Thurai chup kim kowi kowkowi khe kowh meng chekhai.
1Aw CHAKRAMANG, mang David kowi hangkow tamata diah,aia kowh akrat pusara laiklow maten ka tuakah diah.2Aia dow en tut-e takham khai,aia dow Jakawb kowh akürma mih Thurai tut-e maiawng takham khai,3“CHAKRAMANG vüi ang ka pe uowi rah dowi mowr,Jakawb kowh akürma mih Thurai vüi ang ka pe uowi rah dowi mowr,ang kim kowi ang nakup kown nadowi,mawk rah kowi paw ang namawk kown nadowi.Mik kowi paw ang nape müi rauah kown nadowi,mik khowm padow ang naklipah kown nadowi,” pakhai.6Sangbowk laitawm tawkpla uowi mih satang Efrat kua kowi anging ta khai,now nami sangbowk laitawm tawkpla dow Jaar dowm kowi anging kowka khai.7Anging tek mih, “Chu, CHAKRAMANG kim kowi a-i kowkowi lah,now aia khawk towk rah kowi tabawk krawm se a-i kowchupah lah,” pakhai.8Aw CHAKRAMANG, awr rü diah, en kowh tanaira kowi uang uowi diah,now en kowh kür matra, en kowh sangbowk laitawm tawkpla paw kupla diah.9En kowh uamowuüa achinawmma mih tawnguat pacham khup lah,now en kowh maru-uüa mih awmrawmma hown pacham tek meng lah.10En kowh nar David rakowien nümnapah mih mang kowi hangkow nuata diah.11Mapaw napiakah dowi kown mih laikham David tut-e maiawng en takham khai,“En kowh chapa lowk ia kowi en kowh mang chowm rah kowi ang nape chowmah kown.12En kowh chapauüa che ang kowh sangbowk laitawm chün hai ang natüngsangah kown mih ang kowh laiklow chün khai,nahanow amatni kowh chauüa kowi paw chowngchowng saksakma en kowh mang chowm rah kowi ang nape chowmah kown,” pakhai.13CHAKRAMANG mih Zaiawn kowi lang kloah khai;nami marow dow aia nachangla uowi rah kownkow aia nauah mih chekhai.14Aia tek mih, “Mami dow chowngchowng saksakma vüi ang kowh tanaira chekhai,makowi ang nauowi kown; tawngplawng kowchow panow makowi chekhai uowi kown ang nau.15Zaiawn marow kowi chakkham ahuma hown ang napeah prasi kown;nakowi kowh ngarai miuüa kowi dow chakkham hown ang nape duah kown.16Zaiawn kowi kowh uamowuüa kowi dow prasira tawnguat ang nakhup pe kown,nakowi kowh ringkaw ang miuüa dow awmrawmma hown atün atünma natek meng kown.17Nakowi mih David vüi akürma mih krungchak ang narüng pe kown,ang nümnapah mih mang dow ang maru vüi anowi iawng naphaw kown.18Aia kowh ransu-uüa kowi dow ang nakhup pe rukraira tawnguat kown.Nachenganchepaw aia lu kowi dow mang lukruk tawk pluplup mih ang nakruk pe kown,” pakhai.The Seed Company