Chanlai Lawng12
1Pringhawi laiklow kowi chün mih maru dow tukra kowi ngown mih chekhai.Tawkche pringhawi laiklow kowi sui mih maru dow bualama mih iawng chekhai.2Aiungma mih maru dow CHAKRAMANG hownia ka saksing sanara reng.Tawkche chang ngak kown tuak mih maru kowi dow CHAKRAMANG ripah reng.3Chang ngak mih maru kowh chownglawng dow thaulang dowi chekhai.Tawkche achinawmma mih maru kowh chownglawng dow thaulangma chekhai.4Aiungma mih masiuüa dow ahua kowh awmrawmra hai ringkawra chekhai.Tawkche rukrai uowi dowi mih masiuüa dow ahua vüi hut kowi kowh ma ngak iawng chekhai.5Achinawmma mih maru-uüa kowh tuak dow anowm atekma chekhai.Tawkche maru ngakuüa kowh prengia pek dow limmara kangowh chekhai.6Maru ngakuüa kowh laiklow dow linlanma sang nowng sai maru chekhai.Tawkche maru iunguüa kowh laiklow dow maru kowi nowng lawng chekhai.7Maru ngakuüa dow kala chu chah dowi kowi lüa kowng reng.Tawkche achinawmma mih maru-uüa kowh kimchak dow anikma uowi reng.8Chanlaima mih maru kowi dow maru kiowah reng.Tawkche abualama mih maru kowi dow maru nüah klowkah dowi chekhai.9Kim kowi chakkham uowi dowi matchang chang kureng iow mih lak-e,kureng dowi chepaw tow nar mih maru lang iung chekhai.10Achinawmma mih maru dow aia kowh tawncher kowi mingah khetah kaneu reng.Tawkche maru ngakuüa dow amatni kowh tawncher kowi khowm changah naklak reng.11Kowmatia krawng bawn kowi aklumma chang lup mih maru dow ahuma ka chakkham reng.Tawkche asung uowi dowi mih lup kowi pe khin mih maru dow prengia uowi dowi chekhai.12Maru ngakuüa dow akeng mih maru ngakuüa cham rupah mih uanh khowm rupta kown nau.Tawkche achinawmma mih maru-uüa kowh chownglawng dow anikma hai uih pau reng chekhai.13Maru ngak dow aia kowh laiklow ngak hown cham takhuowk reng.Tawkche achinawmma mih maru dow kawm kratra hownia plai reng.14Maru dow kowmatia kowh laiklow hownia ka iungra reng,aia dow aia changah mih lup iawng ka asung reng chekhai.15Bualama mih maru dow aia changah mih lup towbowt na pahai tatuak reng.Tawkche chanlaima mih maru dow maru prengia pek laiklow sünta reng chekhai.16Bualama mih maru dow aia kowh kunmaraura tüngta reng.Tawkche chanlaima mih maru dow maru nüah klowkah dowi mih laiklow kowi pe ching dowi.17Anowmma mih maru dow thuak saksi nowm reng.Tawkche dailama mih maru dow thuak dai lai saksi reng.18Tek naklak mih maru kowh laiklow dow saidawng hown sawtah mih iawng maru tut-e rau reng.Tawkche chanlaima mih maru kowh laiklow dow maru sak kowi rau mih iungta pe reng.19Lainowm dow chowngchowng saksakma nik reng.Tawkche dai lai dow nik dowi chekhai.20Maru ngakuüa kowh sak kowi dow krawi kuan maru kown mih saktuak kangowh chekhai.Tawkche maru iung müa kowi chang lup mih maru-uüa kowh sak kowi dow awmrawmra uowi reng.21Achinawmma mih maru-uüa chownglawng kowi dow angak uang ting dowi chekhai.Tawkche maru ngakuüa chownglawng kowi dow angakra atekma uang ting reng chekhai.22Tek dai lai mih maru kowi dow CHAKRAMANG suiah reng chekhai.Tawkche kaah sakowm iawng uowi mih maru kowi dow CHAKRAMANG sak-ihah reng.23Prengia uowima mih maru dow aia kowh tukra mih itah reng chekhai.Tawkche bualama mih maru dow aia kowh bualara krawi phuangah reng.24Aklumma mih maru dow maru luk kowi chang low reng.Tawkche silikma mih maru dow maru krüa kowi uowi reng.25Saktuak kawm lai now maru kowh awmrawmra piak reng.Tawkche süngüra laiklow dow maru kowi pe awmrawm reng.26Achinawmma mih maru dow aia klowkchakuüa kowi tüng pe tiama nowm reng.Tawkche maru ngakuüa dow piakla kown mih tiama kowi mang reng chekhai.27Silikma mih maru dow kowmatia chakkham khowm kram kown nau dowi chekhai.Tawkche aklumma mih maru dow achur khe ka dawngthawnguan reng.28Anowmma mih tiama kowi dow singra uowi reng,anowmma mih tiama kowi dow kowngra uowi dowi chekhai.
The Seed Company