Tarüa27
1Zelofehad kowh chamauüa dow Josef kowh chapa Manase krungchak chekhai. Manase kowh chapa dow Makir, Makir kowh chapa dow Gilead, Gilead kowh chapa dow Hefer, Hefer kowh chapa dow Zelofehad chekhai. Now Zelofehad kowh chamauüa dow Mala, Noa, Hawgla, Milka hai Tirza büah chekhai.2Nami masiuüa hawmh dow taklowp taklangra te plawt re-e Mosi, uamow Eleazar, aluchowuüa maten hai Israeluüa maten pur kowi kowiowngah now tek mih,3“Anging kowh pa dow süngrüp süngkangma kowi a-i uowi reng tak khe kowng khai bowt. Aia dow CHAKRAMANG kowi kingküa mih Kora kowh thumchakuüa tut-e tawi uowi dowi chekhai. Aia dow aiamat kowh angak rakowi kowng mih chekhai. Aia kowh dow lowk iachow paw chapa uowi dowi.4Anging kowh pa kowh dow chapa uowi dowi pache aia krungchakuüa hownia aming natama kown chekhai bow? Anging kowh pa krungchakuüa hown anging kowi paw pe powngla anging dawngthawnguan diah,” pabüah khai.5Nakhowk khe Mosi mih nami lawnguan kowi CHAKRAMANG kowi awr phowk pe khai.6Nami khin khe CHAKRAMANG tek pe Mosi mih,7“Zelofehad kowh chamauüa tek mih tawi dowi chekhai. Amatni pa kowh krungchakuüa hown amatni kowi paw en nape powngla dawngthawnguan ngengche kown takla. Amatni mih amatni pa kowh dawngthawnguan bak naka powng kownkow en namüah kaneu kown takla.8Israeluüa kowi maiawng kowtek pe diah: Lowra maru kala chapa dowi kowi kowng khai hanow aia kowh dawngthawnguan mih aia kowh chamauüa nata powng kown.9Aia kowh che chama paw uowi dowi hanow aia kowh dawngthawnguan mih aia kowh tainau-uüa nata powng kown.10Aia kowh che tainau-uüa paw uowi dowi hanow aia kowh dawngthawnguan mih aia kowh pahi pamauüa nata powng kown.11Now aia kowh che pahi pama paw uowi dowi hanow aia krungchak kowi kowh aia hown lang tasin taken nowm nowm mih maru aia kowh dawngthawnguan nata powng kown. Mami dow Israeluüa nachünah kownkow ang pe en mih rirow chekhai,” pakhai.12Nami kung kowi CHAKRAMANG tek pe Mosi mih, “Mami Abarim hungh kowi kowpünah now Israeluüa kowi ang peah mih pren kowmüla diah.13Israeluüa kowi ang peah mih pren khila kung kowi dow en taimow Arawn iawng en paw nakowng hanow en kowh pipu-uüa tut-e nauowi kown takla.14Tawngplawng kowchow panow ang dow chimsaima pami Israeluüa pur kowi enchi tüng pe dowi chekhai. Zin pami süngrüp süngkangma kowi tui rakowi Israeluüa kingküa ang khai. Nami khin khe tui nauang lawtla kownkow huamang kowi kowklowpah kown mih ang tek enchi chowdiah. Nachenganchepaw naiawng enchi chang dowi kowi huamang kowi enchi kowbawpah khai,” pakhai. (Nami dow Zin pami süngrüp süngkangma kowi kowh Kades marow kowi kowh Meriba tuikuam lawnguan chekhai).15Nami laiklow tata hanow CHAKRAMANG kowi Mosi tek pe mih, “CHAKRAMANG dow maru maten kowh asak pek mih Thurai chekhai. Aia dow Israeluüa luk kowi pacham tow pe aluchow lowk ia lah. Nami aluchow dow maru kawmuüa cham tasen khe nowng kruitown mih pacham na lah. Nahanow CHAKRAMANG kowh maru-uüa dow athing mih uowi dowi mih ruapur hawmh iawng nauowi kown nadowi bowt,” pakhai.18Nakhowk khe CHAKRAMANG tek pe Mosi mih, “Nun kowh chapa Josua luk kowi dow Thurai Lümla uowi chekhai. Aia kowi dow uang pawla hanow en kowh rut tang pe diah.19Aia kowi uamow Eleazar hai Israeluüa pur kowi uang pawla diah, now amatni pur kowi dow aia kowi thawpah aluchow diah.20Aia kowh laiklow Israeluüa maten nachün pe kownkow en kowi kowh ang pe en mih nowng changra dow aia kowi peah ne diah.21Aia dow uamow Eleazar tut-e nakowkowi kown takla, now uamow Eleazar mih aia vüi kowi Urim pami hown CHAKRAMANG kowh ana pek nalünta kown. Aia hai Israeluüa maten dow Eleazar tut-e kowh CHAKRAMANG ana pek iawng namang kown takla,” pakhai.22Now Mosi dow CHAKRAMANG kowh ana pek iawng rowprowp chang khai. Aia dow uamow Eleazar hai Israeluüa maten pur kowi Josua kowi uang pawla khai.23Now CHAKRAMANG kowh ana pek iawng Josua luk kowi tang pe rut hanow aia kowh kurdik ap pe khai.
The Seed Company