Tara chet miuüa18
1Nami khin khe Israeluüa kowh dow mang uowi dowi tak chekhai. Nakhowk khe Dan krungchakuüa dow amatni nauowila kownkow krawi cham süng büah khai. Tawngplawng kowchow panow Israel chenchap pungmadawng kowi Dan krungchakuüa dow amatni nauowila kown mih süng tawi nowng powng dowi tak chekhai.2Naiawng rakowi amatni dow amatni pungmadawng kowi kowh tasen akiakma miuüa kowi ruiah tanga ia khai. Now amatni vüi uowi rah süng nakrawi mü kaneu kownkow dumiow tanga ia kowi Zora hai Esta-Awl marow hownia cham chinah büah khai. Dumiow tanga ia kowi krawi tek pe büah mih, “Tarü büah; krawi mü a-i pren büah madiah,” pakhai. Nahanow nami dumiow tanga ia dow Efraimuüa kowh hungma mawngma süng kowi kowkowi hanow Mika kim re-e kowting büah khai.3Nami khin khe amatni dow Mika kim kowi kowh tawi uowi mih Levi klanguüa kowh kraw tün tukta khai. Naiawng rakowi amatni dow Mika kim lak kowi kowkup now nami Levi klanguüa kowi lüntaah mih, “Makowi mia chow uang pawla en? Tawng chow en chang makowi? Tawng rakowi chow makowi en uang?” pakhai.4Nakhowk khe nami klanguüa klangah mih, “Ang vüi Mika chang mih ahuma. Pe ang maina kowh aia tow ang mih chekhai, now ang dow aia kowh uamow chekhai,” pape khai.5Now kowbüah plan tek pe iawk mih, “Anging kowh khari kowi chawn kown chünchü sakrauma hown Thurai kowi sam lünta madiah,” pakhai.6Nakhowk khe nami uamow klangah mih, “Thaulangma hown tarü büa diah; CHAKRAMANG mih nakrawi mingkhet enni kown taih,” pape khai.7Now nami maru tanga ia dow nami hownia lawt hanow Lais marow kowi kowkowi khai. Amatni dow Sidawnuüa iawng kram uowi dowi hai asowrma hown thaulangma Lais marow chakuüa uowi mih kowkhi büah khai. Lais marowchakuüa dow tawng chap paw khawr dowi chekhai. Nami klen kowi amatni dow Sidawnuüa hown alakma chekhai, now amatni kowi nauang khowngah kown mih maru paw uowi dowi chekhai.8Now nami maru tanga ia dow Zora hai Esta-Awl marow kowi uang plan khai bowt. Nakhowk khe nami tanga ia kowi amatni kowh maru-uüa hawt lüntaah mih, “Tawng chow enni cham khila?” pakhai.9Nakhowk khe kowbüah klangah mih, “Anging kowmüah mih süng dow klangiungma chekhai. Nakowi kowh maru-uüa uowi rah dow aiukma panow thaulangma chekhai. Nakowi dow lusa kowi kowh uanh maten tawng chap paw akhawr uowi dowi. Nakowi kowting now enni nakhi kown taih. Nami süng dow Thurai peta a-i mih chowbowt. Naiawng rakowi chu, kowbüah kowi kowsen kownkow alenma a-i kowkowi diah sik. A-i uowi phülü e nadowi bowt tham,” pape khai.11Nami laiklow tata now Dan krungchakuüa mih maru iun 600 ia tasen müa rutchün khawkleng pawla now Zora hai Esta-Awl marow hownia tarü khai.12Amatni dow tiama rawng kowi Judauüa kowh süng kowi Kiriat-Jearim marow re-e kowkhup tangbung khai. Naiawng rakowi Kiriat-Jearim marow satkup pra kowh süng dow kawmat pat Mahane-Dan pahai chap pe ming khai. (Mahane-Dan pami dow “Dan kowh tangbung khup rah” pami chekhai).13Nami hownia lawt büah hanow amatni dow Efraimuüa kowh hungma mawngma süng kowi kowkup khai, now Mika kim kowi kowpün büah khai.14Nakowi uowi büah khe kowkumü Lais marow mih maru tanga ia dow akeng miuüa kowi tek pe mih, “Mami kim kowi kowh towklak lowk mih kowi ephawd kowrmow lowk, chili chalachow mih arup sangrum, now tai hown kowh sowah mih arup lowk uowi mih enni tuk tak bow? Kawmat tawng chow enni achang takla mih sam tuak büah madiah,” pakhai.15Nami laiklow tata now amatni dow Levi klanguüa towklak kowi kowkup khai, now aiung angak satang tapaw büah khai.16Dan krungchak hownia kowh maru iun 600 ia miuüa dow amatni kowh tasen müa rutchün khawkleng hailawm Mika kimplawt kowi kowiowng khai.17Nakhowk khe kowrik paw pren satang mih maru tanga ia miuüa dow towklak kowi kowkupah now tai hown kowh sowah mih arup, ephawd kowrmow hai chili chalachow mih arup maten kowpaw büah khai. Nami khin khe uamow paw maru 600 ia miuüa ria kowi tawi uowi chekhai.18Now naiawngün maru-uüa mih Mika kim kowi kowh towklak lowk mih hownia naiawngün uanh uang lawtla khai. Nakhowk khe nami uamow tek pe mih, “Tawng chow naiawngün enni chang?” pakhai.19Nakhowk khe kowbüah klangah mih, “Hang pawpan. En kowh nawr kowpta phülü. Anging hown phai uang tawi chaw, now anging kowh pa iawng hai anging kowh uamow phai uang tawi chowng chaw. Pakimchakchow vüi kowi kowh uamow lak-e Israeluüa pungmadawng kowi kowh pachen vüi chowng uamow mih lang iung nadowi chow?” pape khai.20Nami laiklow tata now nami uamow mih lainowmma awmrawm khai. Now ephawd kowrmow, chili chalachow mih arup hai tai hown kowh sowah mih arup ün pawla now Dan krungchakuüa hown tawi tarü khai.21Now naiawngün maru-uüa mih amatni kowh chauüa, tawncher hai amatni kowh akeng mih uanh maten amatni pur kowi towah now Mika kim hownia mang büah khai.22Mika kim hownia lawt büah hanow cham ting sangrum khe Mika kowh kimping namkhetuüa mih uang takua talawm khai. Now amatni dow Dan krungchakuüa kowi kowkawi krawi khai, now Dan krungchakuüa kowi kowkrawi krum büah khai.23Amatni dow Dan krungchakuüa kung hownia krawi hek krawi pla büah khai. Nakhowk khe Dan krungchakuüa mih amatni kung prakowi taplan hanow Mika kowi tek pe mih, “Tawng chow en own? Tawngplawng kowchow naiawng khowt mih maru kawm kowi en uang tuk kuala khai?” pakhai.24Nakhowk khe Mika klangah mih, “Ang kowh uamow hai ang thawpah mih arup aren maten enni pawla ang bowk kung kowi tawng chow ang kowh ta uowi tak? ‘Tawng chow en own?’ pami tawng enni tuk lünta ang khai?” pape khai.25Nakhowk khe Dan krungchakuüa tek pe mih, “Hang pawpan tham bowt. Mami re-e kunma ngakma mih maru uowi sangrum chaw. En kowh laiklow ta büah hanow nadowk enni tasen khe en hai en kowh kimchakuüa nakowng ni,” pakhai.26Naiawng tekla pe hanow Dan krungchakuüa dow amatni nau kowiah prakowi tarü khai. Now Mika dow aia lak-e Dan krungchakuüa lang kür mih khita hanow aia kim prakowi plan mang khai.27Mika kowh arup maten hai uamow kowi pawla now Dan krungchakuüa dow Lais marow kowi kowkowi khai. Amatni dow nakowi kowh asowrma hai athaulangma uowi miuüa kowi kowsenah now kowngta büah bowk khai. Now nami marow dow towkta büah khai.28Lais marowchakuüa kowi dow nauang lawngah kown mih miapaw uowi dowi chekhai. Tawngplawng kowchow panow amatni kowh marow dow Sidawn marow hownia alakma chekhai, now akeng miuüa hown paw amatni kowh dow tatukra uowi dowi chekhai. Amatni kowh marow uowi mih dow Bet-Rehawb marow re-e kowh lawngrawi kowi chekhai. Akung kowi nami marow dow Dan krungchakuüa ta thawpah iawk hanow ta uowiah büah khai.29Auown khe dow nami marow ming mih Lais chowdiah. Nachenganchepaw akung kowi dow amatni kowh pipu-uüa ming iawng nami marow ming mih Dan pahai ta chap pe büah khai. Dan dow Jakawb kowh chapa chekhai.30Dan krungchakuüa dow nami marow kowi amatni vüi nami arup towah khai. Nar kowi cham takhang büah dowi mowr dow Dan krungchakuüa kowh uamow mih Jonathan hai aia kowh krungchakuüa chekhai. Jonathan dow Gersawn krungchak chekhai, now Gersawn dow Mosi kowh chapa chekhai.31Silo marow kowi Thurai kim uowi mowr dow Dan krungchakuüa mih tai hown kowh Mika sowah mih arup kowi chupiia khai.
The Seed Company