Josua14
1Nachangla dawngthawnguan kownkow Israeluüa mih Kanan pren kowi kowh krawng bawn ka büah khai bowt. Amatni kowi dow uamow Eleazar, Nun kowh chapa Josua hai Israel chowlowkkow krungchak kowi kowh aluchowuüa mih bak pe khai.2Amatni dow Mosi tut-e kowh CHAKRAMANG ana pek iawng rowprowp Israel krungchakuüa kowi bak pe krawng bawn khai. Tawngplawng kowchow panow krawng bawn bak lawnguan kowi CHAKRAMANG mih Mosi kowi rik tekla pe khowk chekhai. Mosi mih Jawrdan aw satlawt pra kowh krawng bawn Israel pre krungchak hown dawnglang kowi rik peta khowk. Manase krungchak dawnglang dow Jawrdan aw satlawt prakowi tawi rik ka krawng bawn khowk chekhai; Manase hai Efraim dow Josef kowh chapa chekhai. Now Jawrdan aw satkup pra kowh krawng bawn dow nachangla dawngthawnguan kownkow Israel taku krungchak hown dawnglang mih ka büah khai bowt. Amatni kowi dow kuak pe plang hanow chowlowkkow krungchakuüa kowi bak pe krawng bawn büah khai. Tawkche Levi krungchakuüa dow tawi ka krawng bawn dowi chekhai. Amatni tawi kaah mih marow hai kua dow amatni uowi rah vüi hai uanh towk rah krowngchow chekhai. Nami klen kowi amatni tawi kaah mih dowm dow chia hai ruapur thing müa vüi krowngchow chekhai.6Akat khe Juda krungchakuüa pungmadawng hownia Josua tut-e kowkowi sangrum khai. Naiawngünuüa pungmadawng kowi Keniz krungchak Jefune kowh chapa Kaleb paw tawi uowi chekhai. Nami khin khe Israeluüa uowi mih dow Gilgal pami arah kowi chekhai. Kaleb tek pe Josua mih, “Kades-Barnea marow kowi a-i uowi reng tak khe Thurai kowh maru Mosi tut-e en hai ang lawnguan kowi tawng chow CHAKRAMANG tekla mih en tuk.7Nakowkumü Kanan pren kownkow CHAKRAMANG kowh nar Mosi mih Kades-Barnea marow hownia kowchin ang khai. Nami khin khe ang dow 40 ning chekhai. Now uang plan hanow ang khila mih maten achima ang uang lawp pe khai.8Ang hown kowh tawi miuüa tarapdow maru-uüa kramla iawng mih laiklow uang tek pe büah khai. Nachenganchepaw ang dow kaah sakowm iawng CHAKRAMANG ang kowh Thurai laiklow ang chün khai.9Naiawng rakowi nami ni khe takham se Mosi tek ang mih, ‘En dow kaah sakowm iawng CHAKRAMANG ang kowh Thurai laiklow en chün khai. Naiawng rakowi enni krawi chawpah mih krawng bawn maten nachangla dawngthawnguan kownkow en hai en kowh krungchakuüa kowi chowngchowng saksakma vüi ang peta enni khowk,’ pah ang khai.10“Nami laikham dow 45 ning dowi rawn khe kowh Mosi kham ang mih chekhai. CHAKRAMANG dow aia kham ang iawng süngrüp süngkangma kowi a-i krawi len panglang mih khin khe hownia kawmat mowr pat pe sing ang khai. Now kawmat dow ang mih 85 ning chih khai bowt.11Mosi cham chin ang khe kowh iawng kawmat paw ang kowh kür uowi reng tak chekhai. Nakhowk khe kowh iawng kawmat paw ang kowh tasen kür uowi reng tak, now lowra lup chang kür paw uowi reng tak chekhai.12Naiawng rakowi ang tut-e CHAKRAMANG rik khamta khowk iawng hungma mawngma süng pe ang diah. Nami süng kowi dow Anakuüa uowi, now amatni kowh marow dow aiukma kangowh panow tap uowi bowk chekhai pami en ta khowk. Nachenganchepaw CHAKRAMANG tawi uowila ang hanow aia tek iawng amatni kowi ang naia prütta kown taih,” pape khai.13Now Josua dow Kaleb kowi peah prasi khai, now nachangla dawngthawnguan kownkow Hebrawn marow mih Kaleb kowi aia peah khai.14Nami hownia kawmat pat paw Keniz krungchak Jefune kowh chapa Kaleb krungchakuüa dow nami marow kowi uowi reng tak chekhai. Tawngplawng kowchow panow Kaleb dow kaah sakowm iawng CHAKRAMANG Israeluüa kowh Thurai laiklow chün khai.15(Auown khe dow Hebrawn marow ming mih Kiriat-Arba chowdiah. Tawngplawng kowchow panow Anakuüa pungmadawng kowi Arba pami kow iukma mih maru uowi lowk ia chekhai. Naiawng rakowi nami marow ming dow nami maru ming iawng rükah mih chowdiah).
Nami kung kowi dow pren mih thaulang khai bowt.
Nami kung kowi dow pren mih thaulang khai bowt.
The Seed Company