Josua1
1Mosi dow CHAKRAMANG kowh nar chekhai. Mosi kowh akhowng mih dow Nun kowh chapa Josua chekhai. Mosi kowng kung kowi CHAKRAMANG tek pe Josua mih,2“Ang kowh nar Mosi dow kowng khai bowt. Naiawng rakowi kawmat mih en hai maiawngün Israeluüa mih haipown Jawrdan aw diah. Now ang nape enni kown mih pren kowi kowkowi büa diah.3Enni krawi chawpah mih arah maten dow ang pe enni khowk. Tawngplawng kowchow panow nami laiklow dow Mosi kowi ang khamta khowk chekhai.4Enni kowh pren sünghi dow mrawkphak pra kowh süngrüp süngkangma hownia tawngphak pra kowh Lebanawn hungh mowr, now satlawt pra kowh Iufratis awma hownia satkup pra kowh Mediteranean sata mowr chekhai. Enni kowh pren kowi mih Hit chenchapuüa kowh süng paw tawi uowi khai.5En sing uowi mowr dow miapaw naia kingküa en kown nadowi. Mosi tut-e ang tawi uowi reng iawng en tut-e paw ang natawi uowi reng kown taih. Ang dow katpaw napowtta en kown nadowi, now nua paw ang nanuata en kown nadowi.6“Napeah pren kownkow enni kowh pipu-uüa tut-e ang takham khowk. Nami pren dow maiawngün maru-uüa kowi en napowng pe kown. Naiawng rakowi sakkhawtma hai sakkraingma uowiah diah.7Sakkhawtma hai sakkraingma uowiah diah. Now ang kowh nar Mosi pe en mih rirow maten chünah kaneu diah. Nami rirow hownia hawmlawm pra lah, lakuai pra lah en nacham süt kown nadowi. Nahanow en cham kowi rah srui kowi en naiung kown.8Rirow bowih kowi kowh arui uowi mih maten en mih phatah diah. Nami bowih kowi kowh arui uowi mih maten en naia chünla reng kownkow ni towng iak towng tuakah diah. Nahanow en changah mih lup srui naiung kown.9Ang kowh mami ana pek sak kowi towah diah. En mih sakkhawtma hai sakkraingma uowiah diah. Hangkow kram diah, now sak paw hangkow nenah diah. Tawngplawng kowchow panow CHAKRAMANG en kowh Thurai dow lowra mih re-e natawi uowila en kown taih,” pakhai.10Nami laiklow ta hanow aluchowuüa kowi Josua tek pe mih,11“Tangbung khup rah kowi kowkowiah now maru kawmuüa kowi maiawng kowtek pe büa diah: CHAKRAMANG enni kowh Thurai pe enni mih pren enni nakowpowng kownkow mami hownia sum ni tuang kowi Jawrdan aw enni napown kown takla. Naiawng rakowi enni matia kowh chakkham kamrütla büa diah,” pakhai.12Reuben krungchak maten, Gad krungchak maten hai Manase krungchak dawnglang miuüa kowi Josua tek pe mih,13“CHAKRAMANG kowh nar Mosi pe enni ana mih laiklow tukah büa diah. Aia tek enni mih, ‘CHAKRAMANG enni kowh Thurai mih pe tanai enni khai, now aia dow mami pren pe enni khai,’ pakhai.14Enni kowh masi, chauüa hai tawncher hawmh dow makowi nata uowi kown. Nachenganchepaw enni pungmadawng kowi kowh tasen uang khowk mih maten dow enni kowh tainau-uüa kowi enni natawi khowngah tasen kownkow Jawrdan aw narik pown kown takla.15CHAKRAMANG pe enni süng iawng enni kowh tainau-uüa kowi paw CHAKRAMANG napeah süng kown. Tawkchedow enni kowh tainau-uüa kowi CHAKRAMANG pe powngah dowi mowr enni natawi hing khowngta hüah kown takla. Nami kung kowi chiang CHAKRAMANG kowh nar Mosi pe enni mih Jawrdan aw satlawt prakowi kowh süng kowi enni nauang ia uowi kown,” pape khai.16Nakhowk khe Josua kowi amatni tek pe mih, “En pe anging mih ana maten anging nachün kown, now en chin anging mih arah re-e anging nakowkowi kown.17Mosi kowh ana pek maten anging chün iawng en kowh ana pek paw anging nachün kown. CHAKRAMANG en kowh Thurai mih Mosi tut-e tawi uowi reng iawng en tut-e paw pacham tawi uowi reng lah.18En kowh ana pek kingküa hai chün dowi mih maru kowi dow kowngta kown takla. En mih sakkhawtma hai sakkraingma uowiah diah,” pabüah khai.
The Seed Company