Isai40
1A-i kowh Thurai tek mih, “Peah sakklamra büa diah,ang kowh maru-uüa kowi peah sakklamra büa diah.2Jerusalem maru-uüa kowi peah süngürra büa diah;amatni kowh ngare khamra chur khowk mih tek pe büah dit.Amatni kowh angak ang lawtta pe bowk khowk mih tek pe dit;amatni kowh angak sung ang peta bowk khowk mih tek pe dit,” pakhai.3Maru lowk ia mih hekla se maiawng krawi tek khai,“Süngrüp süngkangma kowi CHAKRAMANG vüi thawp pe tiama büa diah,nakowi a-i kowh CHAKRAMANG vüi tiama atengma thawp pe lowk diah.4Lawngrawi maten atekma nathiaah kown,hungma mawngma ün aprem sang nachangah kown.Hungma mawngma süng anaima nachangah kown,anai talik dowi mih süng ün alik sang nachangah kown.5Nakhowk khe dow CHAKRAMANG kowh kraingra natatüng kown,now nami dow maru maten akrowksang nakhi kown.Maiawngün laiklow maten CHAKRAMANG matia takham khowk,” pakhai.6Maru lowk ia tek mih, “Krawi phuang diah,” pakhai.Ang tek pe mih, “Tawng chow ang krawi phuang kown,” pakhai.Aia tek ang mih, “En nakrawi phuang kown mih,‘Maru maten bawrchak iawng chowtaih,amatni kowh klangiungra maten dow bawrchak pau iawng chowtaih.7CHAKRAMANG kowh li uang hutah mih khin khe bawrchak dow keu reng,now apau paw ngawi reng chekhai.Lusa maru kowh chownglawng dow nami bawrchak iawng chowtaih.8Bawrchak dow keu reng, now pau paw kle reng chekhai.Nachenganchepaw a-i kowh CHAKRAMANG laiklow dow chowngchowng saksakma uowi reng,’ pape diah,” pakhai.9Uang pawla satang iung mih Zaiawn ow,hungh alowngma kowi kowpün hanow kowhek diah.Uang pawla satang iung mih Jerusalem ow,atünma hek diah, hangkow kram diah.Juda pren kowi kowh marow kowi ün en nakrawi tek pe kown mih,“Mü madiah, enni kowh Thurai uang tarü khowk,” pape diah.10Mü madiah, CHAKRAMANG Thurai mih kür hailawm uang tarü khowk,aia kowh akürma mih bawng hown aia dow nauang chowm mang bowt kown.Mü madiah, aia kowh awmrawm sung dow aia rut kowi uowi,aia lawngah miuüa dow aia tut-e uowi chekhai.11Ruapur thing mih iawng aia kowh ruapur hawmh kowi aia nakhetah kown;ruapur chauüa kowi dow aia rut hown napaila hanow aia napawla kown,now chah uowi mih ruapurmauüa kowi dow saksing sanama hown aia napakla kown.12Rutpha hown lusa kowi kowh tui maten nowng dowk mih mia chow uowi?Bawng hown mukuang rihi nowng lam mih mia chow uowi?Kharang hown lusa kowi kowh dinchow nowng khai mih mia chow uowi?Hungma mawngma dik set hown nowng khai mih mia chow uowi?13CHAKRAMANG kowh lümla kowi nowng pe prengia mih mia chow uowi?Now aia kowi nowng tüng nowng sang mih maru mia chow uowi?14Naka chanlaira kownkow mia tut-e chow CHAKRAMANG paw prengia?Now aia kowi tüng pe tiama nowm mih maru mia chow uowi?Tukra lawnguan kowi aia kowi tüngsangah mih mia chow?Aiung angak tukra tiama aia kowi tüng pe mih mia chow?15Chenchapuüa dow tuikawng kowi kowh paiatchow mih tui iawng chekhai;amatni kowi dow set kowi kowh dinchow di iawng CHAKRAMANG nüla khai.Lusa kowi kowh süngdum maten dow aia tut-e ahowpchow taih;naiawngün dow aia tut-e dinchow adichow mih iawng ahowpchow chekhai.16Nachangla sawp kownkow Lebanawn kowi kowh singh maten lawk dowi tak chekhai,now tikah mih uanap chang müa paw Lebanawn kowi kowh asadua maten lawk dowi tak chekhai.17Chenchap maten aia pur kowi dow tawngpaw nadowi,naiawngün dow tawngpaw aia nüla dowi hai aia tut-e asung uowi dowi chekhai.18Naiawng now mia hown chow Thurai kowi enni natuah kown?Tawng hown chow aia kowi enni natuah kown?19Aia dow laksmauüa thawpah mih arup aren iawng nadowi,aia dow kuh hai tai hown sowah mih arup aren iawng nadowi chekhai.20Kuh hai taih uowi dowi miuüa dow maw naklak dowi mih singh hown thawp arup aren reng,now natim dowi kownkow athawp kiakma mih kowi pe thawpah reng chekhai.21Enni tuk dowi tak bow?Alai hownia nami laiklow miapaw tek enni dowi tak bow?Tawng iawng chow lusa awr phaw mih enni ta dowi tak bow?22Lusa thawp mih dow mang chowm rah kowi kowh chowm mih Thurai chekhai,aia dow lusa luk kowi kowh mukuang klen kowi uowi mih chekhai.Aluk hownia müah now lusa maru dow lowng khowt chowtaih chekhai.Mukuang dow uanpowngchow iawng taluk khup aia towah khai;mukuang dow uowi rah tangbung iawng aia thawpah khai.23Aia dow lusa manguüa kowh nowng changra pawta pe reng,now lusa kruitown miuüa kowi dow asung uowi mih uanh iawng aia changah reng.24Amatni dow ia sawt prün dowi tak mih singh pawi iawng,awr ru krowngchow now kowng mih singh pawi iawng chekhai.Amatni dow CHAKRAMANG kowh li uang hut hanow keu reng,amatni kowi dow liku iawng CHAKRAMANG cham rownla reng chekhai.25Chimsaima mih Thurai tek mih,“Mia hown chow enni natu ang kown?Ang hown tale mih mia chow uowi?” pakhai.26Mukuang prakowi sam tang mü büah madiah,awr iawngün mia chow thawp?Krek ün kowi lowk chowchi uang pe lawtah mih aia chowtaih,krek maten kowi amatni kowh ming hown aia hawah reng chekhai.Aia kowh kürra hai nowng changra kraingma rakowiamatni lowkchow kowi paw aia mata dowi chekhai.27Aw Jakawb, tawngplawng kowchow en tuk tek khai?Aw Israel, tawngplawng kowchow en chawk lai khai?En tek mih, “Ang kowh akrat pusara CHAKRAMANG khi dowi,ang kowi dow CHAKRAMANG nau chet ang tara nowm dowi,” pakhai.28Enni tuk dowi bow?Enni ta dowi bow?CHAKRAMANG, chowngchowng saksakma mih Thurai,aia dow prenchur nammowt mowr mih rihi thawp miia chekhai.Aia dow katpaw bowm dowi, now kür paw khowk dowi chekhai;aia kowh prengia dow mün khowt chow büp mih miapaw nowng khai dowi chekhai.29Aia dow kow uak miuüa kowi peah kür reng,now kür uowi dowi miuüa kowi peah kür reng chekhai.30Ning diachow miuüa khowm kow uak hai bowm reng,now klanguüa hawmh paw bowm now tim reng chekhai.31Nachenganchepaw CHAKRAMANG luk kowi owmsak miuüa dow naka kür sar kown,amatni dow uamu iawng naiang lap hanow alowngma kowi naiow kown.Amatni dow iowm chepaw nabowm kown nadowi,now cham mang cham kat chepaw kow nauak kown nadowi.
The Seed Company