Isai38
1Nami khin khe Hezekia dow arau uowi mih dih lai rakowi kowng ngialia chekhai. Nakhowk khe Hezekia tut-e Amawz chapa risi Isai kowkowi hanow tek pe mih, “CHAKRAMANG tek mih, ‘Tawng chow achang takla mih kimchakuüa kowi khowmla bowkla pe diah. Tawngplawng kowchow panow en kowh arau naiung kown nadowi bowt. En nakowng kown towbowt,’ pakhai,” pape khai.2Nami tata hanow Hezekia dow kimbang prakowi haidang hanow CHAKRAMANG tut-e awr tek mih,3“Aw CHAKRAMANG, en kaah sakowm iawng ang uowi khai, now en tut-e iung iawng ang chang khai. Nami dow ka tuakah diah,” pakhai. Now Hezekia dow lainowmma kar khai.4Risi Isai mih lawt hanow mang kim takra kowi kowh viadawng hainowng pown dowi khowk chow tak khe aia tut-e CHAKRAMANG laiklow uang ting khai.5CHAKRAMANG tek pe mih, “Kowkowi hanow Hezekia kowi kowtek pe dit, CHAKRAMANG aia kowh pipu David kowh Thurai tek mih, ‘En awr lü awr leng mih ang ta khowk, now en kowh mik tui hawk mih paw ang khi khowk. Naiawng rakowi en kowh chownglawng mih laitanga ning mowr ang chawkta en khowk.6Asuria mang rut hownia en hai mami marow kowi ang nalawngah kown, now mami marow kowi ang natowkala kown.7“‘Ang kowh laiklow iawng ang nachang en kown mih amat müa dow maiawng:8Ahaz kowh dawngbowk kowi sat klim takuak mowr mih hownia kung prakowi hamüt bowk mowr ang nasütah kown,’ pape diah,” pakhai. Naiawng rakowi sat klim dow aia uowi rah hownia hamüt bowk mowr kung pra kowplan süt khai.9Juda pren mang Hezekia mih aia arau uowi mih hownia iung kung kowi maiawng rui cha khai:10Ang tek mih, “Ang kowh chownglawng dawnglang kowi makowng kimplawt hownia nakup kown takla khai bow?Ang kowh chownglawng uowi tak mih dow pe krum ang dowi bowt tham bow?11Sing uowi miuüa pren kowi CHAKRAMANG kowi ang nakhi kown nadowi bowt;mami lusa kowi kowh uowi mih maru-uüa kowi paw ang nakhi kown nadowi bowt.12Ruapur thing miuüa kowh tangbung nik dowi iawng dow ang kowh chownglawng paw nik dowi chekhai.Powk kawng miuüa ia kawng dowi rawn kepta la mih iawng ang kowh chownglawng dow en uang kepta ang khai.Pani pauar sang kowngra prakowi en pawla ang khai.13Uar thowi dowi mowr town sak se ang chawng khai.Krangsi iawng dow en klowkta ang hut nak khai;pani sang en nachurta ang kown chowbowt.14Charak hai uatur iawng dow kar hai nguk hown ang awr haw en khai.Aluk prakowi tang mü lai bowt kowh ang kowh mik khowm uak prang towbowt.Aw CHAKRAMANG, ang bowm lai bowt, ang kowh kurdik mih en pawta ang diah.15“Nachenganchepaw tawng chow ang natek bowt kown?Aiamat mih ang hown taklang khai,now aiamat ngengche maiawng uang chang ang mih chekhai.Ang kowh sak kowi rau mih rakowi ang sing uowi mowr dow ang nakham sum khamdaw bowt kown;ang kowh chownglawng uowi mowr dow khamsum khamdawma hown ang nauowi bowt kown.16Aw CHAKRAMANG, en kowh lai hai en kowh lup hown chowtaih maru sing reng;naiawngün hown chowtaih ang kowh lümla mih nasing kown.Ang kowh arau iungta ang hanow pe sing ang diah.17Maiawng ang kham ngare mih dow ang iung müa chowtaih chekhai.Piakra kuam hownia en kowh sakraura hown en uang lawng ang khai,now ang kowh angak maten en lawtta ang bowk khai.18Makownguüa uowi rah dow nowng rowsi en dowi,now kowng miuüa paw nowng tek en rowsi meng dowi chekhai.Makowng kuam kowi kowh dowm miuüa kowh dow sakowmra uowi dowi bowt;amatni dow en kowh laikham nauang tachi kown mih kowi nowng owmsak dowi bowt.19Ang iawng dow sing uowi miuüa chowtaih en kowi kiowri en reng.Pa dow achauüa kowi en kowh kaah sakowm mih lawnguan tek pe reng.20“CHAKRAMANG mih nauang towkala ang kown.Naiawng rakowi a-i sing uowi mowr CHAKRAMANG kim kowi a-i nauowi kown,nakowi aiang uowi mih tünteu chang müa hown a-i natek meng kown,” pakhai.21Nami dowi rawn khe Isai tek pe Hezekia mih, “Uidut uih mih anekma chitah hanow bau luk kowi krawi plikah diah; nahanow en kowh bau naiung kown towbowt,” pape khai.22Nakhowk khe Hezekia lüntaah mih, “CHAKRAMANG chup kim kowi ang naia pün iawk kown mih amatra tawng chow uowi?” pakhai.
The Seed Company