Hosea4
1Aw Israeluüa, CHAKRAMANG laiklow sünta büa diah,pren kowi kowh uowi miuüa luk kowi CHAKRAMANG kowh kingküara uowi achap:Pren kowi kaah sakowm mih hai tasakraura uowi dowi,now Thurai kowi paw achingma miapaw tuk dowi chekhai.2Amatni dow sawi kham, dai lai tek hai sai maru reng,now amatni dow kuk hai chang iang reng chekhai.Amatni dow ari arow piak hai lowkkowlowk tasaila prung khai.3Naiawng rakowi pren dow uowila uiting uangtak khai bowt;nakowi kowh uowi miuüa dow chum büah iawlaw khai,now asadua, uakling uaber hai sawng dam paw kowng iawlaw khai.4CHAKRAMANG tek mih, “Nachenganchepaw miapaw hang tape aprek büah,now miapaw hang tape angak büah.Tawngplawng kowchow panow uamowuüa kowi kowh chawktowk miuüa iawng enni phaw khai bowt.5“Ni-e hai uar-e khe enni uamowuüa dow natatui kown,risi iuauüa paw enni hown natawi tatui kown.Naiawng rakowi enni kowh u Israel kowi ang napiakta kown.6Tukra uowi dowi rakowi ang maru-uüa piak khai bowt,enni dow tuk ang kown nau dowi chekhai.Naiawng rakowi ang paw nuata enni khai;enni mih ang kowh uamow nadowi bowt tham,Thurai rirow enni tamata khai bowt.Naiawng rakowi ang paw enni chauüa kowi ang natamata bowt kown.7Amatni dow prung ngamlam chang ngak ngamlam chekhai;naiawng rakowi amatni kowh ringkawra dow prawng renra ang nape chowngah kown.8“Ang maru-uüa uang pawla ngak lawt lük müa uanap hanow uamowuüa mih mu tawi du khai.Naiawng rakowi ang maru-uüa chang ngak hanow uamowuüa mih awmrawm reng chekhai.9Tawng iawng chow uamowuüa chang, naiawng maru-uüa paw tawi chang khai.Naiawng rakowi kawmat mih amatni bowkbowk kowi ang naripah kown.Tawngplawng kowchow panow amatni dow chang lup ngak bowk chekhai.10Amatni dow nacha kown.Tawkchedow naduh büah kown nadowi.Nachang iang büah kown.Tawkchedow naprung büah kown nadowi.Amatni dow nachup arup büah kownkow CHAKRAMANG kowi nuata büah mih chekhai.11Amatni dow iang chang hai grep tui kowi sakrau kowh CHAKRAMANG kowi nuata khai.Iang chang hai grep tui dow maru kowh tukra mih krawi piakta reng chekhai.12“Amatni dow singh hown kowh thawpah mih arup tut-e cham paw prengia khai,singh raitua dow amatni kowi peah ana khai.Amatni kowh iang chang sak dow amatni kowi piakah khai bowt,amatni dow chang iang kown nau kowh amatni kowh Thurai kowi nuata khai.13Hungh towng mawng towng amatni dow ngen pe asadua now cham phuchua büah khai,kanchang singh hai pawng singh tut kowi cham towk maih büah reng chekhai.Naiawng rakowi enni kowh chamauüa dow chowng chawkkrawma khai,now enni kowh iaumowuüa dow chang iang khai.14“Enni kowh chamauüa dow chowng chawkkrawma khai,now enni kowh iaumowuüa dow chang iang khai.Nachenganchepaw amatni kowi ang peah ripra dowi tham.Tawngplawng kowchow panow chawkkrawmauüa tut-e cham kowi mih dow kachakuüa chekhai,now chawkkrawmauüa hown Thurai chup kim kowi cham towk maih reng mih dow amatni chekhai.Nami bualama mih chenchapuüa dow napiak kown.15Aw Israeluüa, enni dow chang iang khai bowt.Nachenganchepaw Juda kowi dow en kowh iawng mih aprek hang pauowi lah.Gilgal kowi hangkow kowi büa diah,Beth-Aven kowi paw hangkow kowi büa diah.Now masing CHAKRAMANG ming hown paw hang kham sawi büa diah.16Israeluüa dow lai üa kürma mih chiama iawng chekhai.Naiawng rakowi amatni kowi tawng iawng chow CHAKRAMANG nakhetah kown?Dowm kowi kowh ruapur chauüa thingah iawng tawng iawng chow aia nathingah kown?17Efraim dow arup chup kowi cham tawi tabawng khai bowt,aia kowi dow pe tawi chupah taih bowt.18Amatni kowh arak kham chur hanow amatni dow chang iang khai,amatni kowh aluchowuüa dow rukraira uowima mih chowm krang uowi krang kowi kaneuma naukhi khai.19Naiawng rakowi akürma mih li iawng amatni luk kowi ripra nauang ting kown,amatni dow arup arenuüa tut-e chang phuchua mih rakowi narukrai kown,” pakhai.
The Seed Company