Ezekiel40
1Anging cham takhang mih 25 ning mih ning uown kowi kowh lacher hamüt ni mih ni khe dow CHAKRAMANG kowh kür mih ang luk kowi uang ting khai. Nami kür uang ting mih dow Jerusalem marow piak mih laitali ning kung kowi chekhai.2Thurai pe khi ang mih mukmang kowi aia dow Israel pren kowi kowpawla ang hanow alowngma mih hungh luk kowi kowtow ang khai. Nami hungh mrawkphak prakowi dow marow iawng tawng chünchü ang khi lowk chekhai.3Nakowi aia pawla ang khe nakowi mih ang khi maru lowk ia khai. Nami maru kowh lumowr dow kri iawng tawk pluplup khai. Aia dow la hown kowh leng hai uanh khai müa kuaisek dowkma tapplawt kowi iowng phülü khai.4Nami maru tek ang mih, “Aw maru chapa, en mü diah, now sünta diah. Ang natüng en kown mih hai ang natek en kown mih maten kowi pe ching diah. Tawngplawng kowchow panow makowi uang pawla en mih dow naiawngün natüng en kownkow chekhai. Now en khi-ah mih maten Israeluüa kowi en nakowtek pe kown,” pakhai.5Ang rik khi mih dow tap tavir lut mih Thurai chup kim chekhai. Now ang khi-ah mih maru mih taruk muk mih akhai müa dowkla now krawi khai tap khai. Nami tap dow aphia taruk muk hai akro taruk muk chekhai.6Nami kung kowi dow aia mih satlawt pra kowh tapplawt kowi kowkowi khai. Aia dow dawngbowk hown aluk kowi kowpünah hanow tapplawt kupra mowr kowi kowh arah krawi khaiah khai. Nami tapplawt pur kowi kowh arah klang dow taruk muk chekhai.7Now tapplawt kowi dow hawmlawm pra hai lakuai prakowi kangchawngra rum uowi sum buk chi chekhai. Naiawngün kangchawngra rum kowh areng klang hai adowng phia dow taruk muk chi chekhai. Now naiawngün rum takra kowi kowh aping tat dow tanga muk chi chekhai. Tapplawt chur pra kowh lawtra mowr kowi kowh arah klang dow taruk muk chekhai. Nami lawtra plawt dow Thurai chup kim hown tatang dowk chekhai. Nami kung kowi dow nami maru mih tapplawt chur kowi kowh kimpuk downg phia khaiah khai. Nami kimpuk downg phia dow towklak plawt lak-e papra papra kowi lang chüt taruk muk chi chekhai. Nami kimpuk uar dow raiat muk chekhai. Nami hownia lawtla mih plawt ria kowi dow mapra lowk paipra lowk achüng uowi lowk chi chekhai. Nami achüng iuk dow lowk kowi pre muk chi chekhai. Tapplawt chur kowi kowh nami kimpuk plawt dang mih dow Thurai chup kim prakowi chekhai.11Nami kung kowi dow aia mih krawi khai tapplawt khai. Tapplawt klang dow laisum muk chekhai, now tapplawt uar dow hamüt muk chekhai.12Kangchawngra rum maten pur kowi dow akro hai atat amuk chi mih tap uowi bowk chekhai, now naiawngün rum uar dow adowng phia hai areng klang taruk muk chi chekhai.13Nami kung kowi dow aia mih tapplawt luk phia krawi khaiah khai. Aia dow hawmlawm pra kowh kangchawngra rum uat pra kowh ping hownia lakuai pra kowh kangchawngra rum uat pra kowh ping mowr khaiah khai. Nami dow mapra ping hownia paipra ping mowr kowi 25 muk chekhai.14 Nami kung kowi dow tapplawt kowi kowh achüng uowi pre buk mih aia khaiah khai. Nami dow lowk kowi aklang 60 muk chi chekhai.15Prang hownia kowh tapplawt hownia alak kowi kowh tapplawt mowr dow aklang 50 muk chekhai.16Prang hownia kowh towklak ping kowi hai achüng pre buk mih re-e kowh aping kowi dow tow pe lawkrachow mih tawngpawk uowi chekhai, now tapplawt chur kowi kowh towklak kowi paw lawkrachow uowi mih tawngpawk uowi chekhai. Naiawng hai tapplawt kowi kowh ping kowi dow tawngpawk uowi bowk chekhai. Nami klen kowi tapplawt chüng pre buk mih kowi dow chekmarawng singh rup ün thawp pe khai.17Nami kung kowi dow nami maru mih Thurai chup kim uat kowi kowh viadawng kowi pawla ang khai. Nami viadawng tavir lut mih tap hown tasak mih abüng uowi dowi mih towklak uowi 30 klüng chekhai. Naiawngün towklak pur kowi dow pir pe hua mih tiama uowi lowk chekhai.18Nami pir pe hua mih arah dow tapplawt towng hawmlawm pra hai lakuai prakowi uowi bowk chekhai. Nami pir pe hua mih arah phia dow tapplawt klang hown katsang chekhai. Nami dow Thurai chup kim lak kowi kowh viadawng lak-e lang nem chekhai.19Nami kung kowi aia dow prang kowi kowh viadawng tapplawt achur pra kowh atowr hownia alak kowi kowh viadawng tapplawt auown pra kowh atowr mowr khaiah khai. Nami viadawng dow satlawt hai tawngphak prakowi alak 100 muk chi chekhai.20Nami kung kowi nami maru dow Thurai chup kim uat kowi kowh viadawng tawngphak pra kowh tapplawt mih aklang hai auar khaiah khai.21Nami tapplawt lak kowi kowh pre pra trui rum sum buk chi mih anowk, nakowi kowh achüng hai tapplawt chur kowi kowh towklak nowk dow aia rik khaiah mih satlawt pra kowh tapplawt nowk hown katsang chekhai. Naiawngün rum dow bowkbowk kowi aklang 50 muk hai auar 25 muk chekhai.22Nami kowi kowh tawngpawk, tapplawt chur kowi kowh towklak hai achüng kowi kowh chekmarawng rup ün dow satlawt pra kowh tapplawt kowi kowh iawng chekhai. Nami tapplawt kowi kowh pün müa dawng dow abowk uowi ranit bowk chekhai, now tapplawt chur kowi dow towklak uowi chekhai.23Alak pra kowh viadawng kowi satlawt pra kowh dang mih tapplawt iawng nami kowh paw tawngphak pra kowh dang mih tapplawt uowi lowk chekhai. Aia dow prang kowi kowh viadawng tapplawt achur pra kowh atowr hownia alak kowi kowh viadawng tapplawt auown pra kowh atowr mowr khaiah khai. Nami dow alak 100 muk chekhai.24Nami kung kowi nami maru mih mrawkphak pra kowh tapplawt kowi pawla ang khai. Nakowi dow uat pra kowh viadawng mrawkphak prakowi ang khi tapplawt lowk khai. Aia dow nami tapplawt kowi kowh achüng hai viadawng mih krawi khaiah khai. Naiawngün paw akeng mih tapplawt kowi kowh iawng anowk katsang chekhai.25Akeng mih tapplawt kowi iawng mami tapplawt kowi paw tawngpawk uowi chekhai. Nami tapplawt dow areng klang 50 muk hai auar 25 muk chekhai.26Nami kowi kowh pün müa dawng kowi paw abowk uowi ranit bowk chekhai, now tapplawt chur kowi dow rum uowi lowk chekhai. Nami rum kowi kowh achüng uowi pre buk mih kowi paw chekmarawng rup uowi chekhai.27Alak kowi kowh viadawng kowi paw mrawkphak pra kowh dang mih tapplawt uowi lowk chekhai. Aia dow prang kowi kowh viadawng tapplawt achur pra kowh atowr hownia alak kowi kowh viadawng tapplawt auown pra kowh atowr mowr khaiah khai. Nami dow alak 100 muk chekhai.28Nami kung kowi dow nami maru mih mrawkphak pra kowh tapplawt hownia alak kowi kowh viadawng kowi uang pawla ang khai. Now aia dow nami mrawkphak pra kowh tapplawt mih krawi khaiah khai. Nami paw prang prakowi kowh tapplawt iawng anowk katsang chekhai.29Tapplawt kowi kowh kangchawngra rum, achüng pre buk mih hai tapplawt chur kowi kowh kimpuk mih akeng mih tapplawt kowi kowh nowk hown katsang chekhai. Akeng mih tapplawt kowi kowh iawng nami tapplawt kowi paw tawngpawk uowi chekhai. Nami tapplawt paw areng klang 50 muk hai auar 25 muk chekhai.30Alak kowi kowh viadawng kowi achüng luk kowi dow aluk uowi bowk chekhai. Naiawngün aluk phia dow areng klang 25 muk, now adowng phia tanga muk chekhai.31Alak kowi kowh viadawng mrawkphak pra kowh tapplawt kupra kimpuk mowr dow prang kowi viadawng prakowi chekhai. Tapplawt kupra tiama ria kowi kowh achüng pre buk mih kowi dow chekmarawng singh rup ün uowi bowk chekhai. Tapplawt kowi kowh apün müa dawng dow uowi raiat bowk chekhai.32Nami kung kowi dow nami maru mih alak pra kowh viadawng satlawt prakowi pawla ang khai, now nakowi kowh tapplawt mih krawi khaiah khai. Nami tapplawt paw akeng mih tapplawt iawng anowk katsang chekhai.33Tapplawt kowi kowh kangchawngra rum, achüng pre buk mih hai tapplawt chur kowi kowh kimpuk mih akeng mih tapplawt kowi kowh nowk hown katsang chekhai. Akeng mih tapplawt kowi kowh iawng nami tapplawt kowi paw tawngpawk uowi chekhai. Nami tapplawt paw areng klang 50 muk hai auar 25 muk chekhai.34Nami tapplawt chur kowi kowh kimpuk plawt dang mih dow prang prakowi kowh viadawng prakowi chekhai. Tapplawt kowi kowh achüng pre buk mih kowi dow chekmarawng singh rup ün uowi bowk chekhai. Nakowi kowh pün müa dawng paw abowk uowi raiat bowk chekhai.35Nami kung kowi nami maru mih tawngphak pra kowh tapplawt kowi kowpawla ang hanow nami tapplawt mih krawi khaiah khai. Nami tapplawt paw akeng mih tapplawt iawng anowk katsang chekhai.36Nakowi kowh kangchawngra rum, achüng pre buk mih hai towklak mih akeng mih tapplawt kowi iawng anowk katsang chekhai. Akeng mih tapplawt kowi iawng nami tapplawt kowi paw tawngpawk uowi chekhai. Nami tapplawt paw areng klang 50 muk hai auar 25 muk chekhai.37Nami tapplawt chur kowi kowh kimpuk plawt dang mih dow prang prakowi kowh viadawng prakowi chekhai. Tapplawt kowi kowh achüng pre buk mih kowi dow chekmarawng singh rup ün uowi bowk chekhai. Nakowi kowh pün müa dawng paw abowk uowi raiat bowk chekhai.38Uat kowi kowh viadawng kowi tawngphak pra kowh alak tapplawt chüng ria kowi dow abüng uowi dowi mih towklak uowi lowk chekhai. Nami dow tikah mih uanap chang müa tawncher saura rum chekhai.39Now kupra kimpuk kowi kowh rum lak kowi dow pawitang uowi pre buk chi chekhai. Naiawngün pawitang luk kowi dow tikah mih uanap, angak lawt lük müa uanap hai aprek lawt lük müa uanap kowi kowh tawncher nga mih tawpah khai.40Thurai chup kim tapplawt pünra dawng ria kowi dow pre prakowi pawitang uowi pre buk chi chekhai.41Naiawng hai tapplawt kupra kimpuk kowi hai viadawng kowi pawitang uowi tali klüng chi chekhai. Naiawngün pawitang dow bowkbowk kowi raiat klüng chekhai. Naiawngün pawitang luk kowi dow chaknga mih tawpah khai.42Tikah mih uanap chang müa uanh kamrütra paw hua hown kowh pawitang uowi tali klüng tak chekhai. Naiawngün pawitang maten dow areng klang hai adowng phia amuk hown dawnglang chi chekhai, now akro dow pamuk chi chekhai. Phuchua müa uanh dow naiawngün pawitang kowi towah khai.43Naiawngün pawitang kowi dow tavir lut aphia apawk chi towla pe auer khai. Nachangla phuchua kown mih chaknga dow naiawngün pawitang kowi towah khai.44Nami kung kowi nami maru dow alak viadawng kowi kowh tapplawt kowi uang pawla ang khai. Nakowi dow abüng uowi dowi mih towklak uowi pre buk chekhai. Nami towklak pre buk mih kowi lowk mih dow tawngphak pra kowh tapplawt ria kowi chekhai, now nami towklak dang mih dow mrawkphak prakowi chekhai. Alowk mih towklak dow satlawt pra kowh tapplawt ria kowi chekhai, now nami towklak dang mih dow tawngphak prakowi chekhai.45Nami maru tek ang mih, “Mrawkphak pra kowh dang mih towklak dow Thurai chup kim mingkhet kownkow ka kurdik mih uamowuüa vüi chekhai.46Now tawngphak pra kowh dang mih towklak dow mingkhet phuchuara kownkow ka kurdik mih uamowuüa vüi chekhai. Naiawngün uamowuüa dow Zadawk kowh chapauüa chekhai. Leviuüa pungmadawng kowi amatni chowtaih CHAKRAMANG pur kowi nachang lup kownkow kownowng kowi khai,” pakhai.47Nami kung kowi dow nami maru mih alak kowi kowh viadawng krawi khaiah khai. Nami viadawng dow areng klang hai adowng phia 100 muk chi chekhai. Nami dow tali tingnui chekhai. Now phuchuara dow Thurai chup kim pur kowi chekhai.48Nami kung kowi dow nami maru mih Thurai chup kim kimpuk kowi pawla ang khai, now kimpuk ria kowi kowh achüng pre buk mih hai kimpuk plawt uar krawi khaiah khai. Naiawngün kimpuk kowi kowh achüng dow aphia tanga muk, now atat sum muk chi chekhai. Kimplawt uar dow laitali muk chekhai, now kimplawt uer tat dow sum muk chi chekhai.49Now kimpuk iuk dow areng klang pirmi muk, now adowng phia dow laipre muk chekhai. Nakowi dow pün müa dawng uowi chekhai, now nami dawng ria kowi dow mapra lowk paipra lowk achüng uowi chekhai.
The Seed Company