Ezekiel33
1Nami kung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, en chenchapuüa kowi tek pe diah. CHAKRAMANG tek mih, ‘Lowra pren kowi nauang sen kownkow ransu siphaiuüa kowi ang uang pawla chepaw naia kown. Nakhowk khe prenchakuüa mih amatni pungmadawng hownia klo maru lowk ia hanow phih lawnguan kowi nakrawi phowng kown mih maru towah khai.3Now nami maru che pren kowi siphaiuüa uang sen kownkow uang tarü mih khi hanow prenchakuüa nauowi kaneu kownkow tum baw khai.4Now nami baw tün ta khowk chepaw amia iawng mih chow uowi kaneu dowi kowh ransu siphaiuüa rut kowi kowng khai hanow aia kowng mih aprek dow aia matia luk kowi nauowi kown.5Naiawng aia kowng mih aprek aia ka mih dow tum baw mih klow ta khowk chepaw kaneuma aia uowi dowi rakowi chekhai. Aia che uowi kaneu e dow aia kowh sak naia plai kown chowdiah.6Tawkche nami kangchawng mih maru mih ransu siphaiuüa uang sen mih khi khowk chepaw tum baw dowi. Naiawng rakowi ransu siphaiuüa mih maru lowk ia kowi uang saita khai. Naiawng che phaw khai hanow nami maru dow aia kowh ngak rakowi kowng mih chekhai pami tuakah diah. Tawkche nami maru kowng mih lu klai dow nami kangchawng mih maru hownia ang napawah kown,’ pakhai.7“Aw maru chapa, en kowi dow Israel chenchap vüi kowi kowh kangchawng mih maru ang tow en mih chekhai. Naiawng rakowi ang natek en kown mih dow kaneuma sünta diah, now amatni kowi dow nauowi kaneuma kown mih tek pe diah.8‘Aw maru ngak, en nakowng ngengche kown,’ pahai maru ngak kowi ang tek pe mih khin nauowi kown. Nakhowk khe che nami maru ngak kowi lup ngak chang en hangah dowi hanow aia dow aia kowh ngak rakowi nakowng kown. Tawkche nami maru kowng mih lu klai dow en luk kowi ang napaw en kown.9En che nami maru ngak kowi aia kowh lup ngak chang natowta kown mih tek pe khai, now aia che nami lup ngak hownia uang plan dowi hanow aia dow aia kowh angak rakowi nakowng kown. Tawkche en kowh sak dow naplai kown.10“Aw maru chapa, Israel chenchap tut-e ang laiklow kowtek pe diah. Nakhowk khe amatni dow maiawng natek chepaw naia kown, ‘Anging chang ngak khai, now rirow ün anging chün dowi chekhai. Anging kowh angak anging vüi di mih nowm khowk. Naiawng rakowi anging dow tui khai bowt. Tawng iawng chow anging nasing kown?’ napa kown.11Amatni kowi en tek pe diah. Ang CHAKRAMANG ang ming lüklau se ang tek khowk, maru ngakuüa kowng mih kowi ang awmrawm dowi chekhai. Ang nau mih dow angak hownia uang plan now ia sing mih chowtaih. Aw Israel chenchapuüa, ang tut-e uang plan büa diah, enni kowh angak tiama hownia uang plan büa diah. Tawngplawng kowchow enni nakowng kown?12“Naiawng rakowi aw maru chapa, en chenchapuüa kowi maiawng kowtek pe diah, ‘Aiungma mih maru che CHAKRAMANG laiklow chün dowi hanow aia changah mih lup iung aia kowi nowngia takhula kown nadowi, now maru ngak mih aia kowh angak hownia uang plan hanow aia changah mih lup ngak rakowi naka ripra kown nadowi,’ pape diah.13Chang lup iung mih maru kowi, ‘En nasing ngengche kown,’ pahai ang tek pe chepaw naia kown. Tawkche aia che aia kowh lup iung chang kowi neplawng nesak kowh chang angak khai hanow nami maru kowi dow auown khe kowh aia changah mih lup iung ang natuak pe kown nadowi. Aia kowh angak rakowi aia dow nakowng kown.14Angak mih maru kowi che, ‘En nakowng ngengche kown,’ pahai ang tek pe chepaw naia kown. Tawkchedow nami maru che angak hownia uang plan khai, now anowmma mih hai anama mih lup chang khai.15Aia tut-e kowh maru uang pawngah mih uanh hai cham kuah mih uanh ün maru kowi planta pe khai, masing rirow chün khai, now lup ngak ün chang dowi bowt hanow aia dow nakowng kown nadowi. Aia dow nasing ngengche kown.16Aia rik changah mih angak maten dow sak kowi ang natow pe kown nadowi. Anowm mih lup hai ana mih lup aia chang khai rakowi aia dow nasing ngengche kown.17“Nachenganchepaw en maru-uüa dow, ‘CHAKRAMANG kowh tiama thik dowi,’ pahai tek reng tak chekhai. Tawkche tiama thik dowi mih dow amatni kowh chowbowt.18Achinawmma mih maru che aia kowh tachi tanawmra hownia plan kowh chang lup ngak khai hanow aia dow nakowng kown.19Angak mih maru che aia kowh angak hownia uang plan kowh anowmma mih lup hai anama mih lup chang khai hanow aia dow nasing kown.20Nachenganchepaw aw Israeluüa, enni tek mih, ‘CHAKRAMANG kowh tiama thik dowi,’ pakhai. Tawkche enni kowi mih enni kowh chowm krang uowi krang iawng ang nachet enni tara kown,” pape khai.21Anging cham uowi nar mih laipre ning nga hamüt la tanga ni khe maru lowk ia dow Jerusalem marow hownia ang tut-e uang powt khai. Now tek ang mih, “Ransu-uüa dow Jerusalem marow uang powngta khai bowt,” pakhai.22Nami maru uang ting dowi rawn iak prakowi CHAKRAMANG kowh kür dow ang tut-e uang ting khai. Nami maru ang tut-e uang ting khe dow CHAKRAMANG mih hota ang nawr khai bowt. Nahanow ang dow nowngia lai khai bowt.23Nami kung kowi CHAKRAMANG laiklow dow ang tut-e uang ting khai. Aia tek ang mih,24“Aw maru chapa, Israel pren kowi kowh apiaknama mih marow kowi uowi miuüa tek mih, ‘Abraham lowk iachow taih chepaw Thurai dow aia kowi pe powngah pren khai. Tawkche a-i dow akawmma chekhai. Naiawng rakowi nami pren dow a-i napowng kownkow aia pe a-i ngengche mih chekhai,’ pakhai.25Naiawng rakowi amatni kowi kowtek pe diah, ang CHAKRAMANG tek mih, ‘Enni dow avi hailawm cha chaknga khai, arup aren kowi ün enni chupiia khai, now enni sai maru khai. Naiawng enni chang chepaw enni naka powng pren kown bow?26Enni dow enni kowh saidawng luk kowi enni neplawng nesak khai, suiiai kaniaima mih lup ngak enni chang khai, now kimping namkhet masiuüa hown enni chang iang khai. Naiawng enni chang chepaw enni naka powng pren kown bow?’ pape diah.27“En mih amatni kowi tek pe diah. Ang CHAKRAMANG Thurai ang ming lüklau se ang tek khowk, nami piakra marow kowi kowh uowi miuüa dow tasenra kowi nakowng kown. Dowm kowi kowh uowi miuüa kowi dow kaurawng uaramchak hawmh hown ang nasaiah kown, now akhawtma mih kangchawngra kim kowi hai puk kowi cham tapet miuüa kowi dow makowng hawi hown ang nape kowngah kown.28Israeluüa kowh pren dow ang napiakah hanow akhaw aklaima ang nachangah kown. Amatni changla bawri mih kür dow ang napiakta pe kown. Amatni kowh hungh kangowh mih süng dow akhaw aklaima naphaw kown, now nakowi dow amiapaw namang nakat kown nadowi bowt.29Amatni kowh suiiai kaniaima mih lup ngak rakowi amatni kowh pren dow ang napiakta nak hanow piaknama ang natowta hüah kown. Nakhowk khe amatni dow ang chowtaih CHAKRAMANG pami natuk büah kown.30“Aw maru chapa, en maru-uüa dow tap ria kowi hai kimplawt kowi takua talawm hanow en lawnguan kowi talawp lawmlawm khai, now lowkkowlowk tatek büah mih, ‘Chu, CHAKRAMANG hownia kowh uang ting mih laiklow a-i kowsünta diah sik,’ pakhai.31Ang maru-uüa dow en tut-e uang reng, now en laiklow nasünta kownkow en pur kowi uang chowm büah reng chekhai. Tawkche amatni dow taah mih iawng chang dowi chekhai. Nawr hown dow sakraura laiklow tek büah reng chowdiah. Tawkche amatni kowh sak kowi dow lawphara kangowh chekhai.32En dow naiawngün maru-uüa tut-e tünteu hown kowh tek changlawng plawngnau meng mih maru krowngchow taih. Amatni dow en laiklow ta khowk chowdiah. Tawkche nami iawng chang büah dowi chekhai.33“Amatni kowi kowh en tek pe mih iawng dow nauang phaw ngengche kown. Nakhowk khe amatni dow amatni pungmadawng kowi risi uowi lowk ia mih natuk büah kown,” pakhai.
The Seed Company