Ezekiel14
1Nami kung kowi Israeluüa kowh lawngtang aluchowuüa pre sum ia dow ang tut-e uang khai. Amatni dow nauang lünta ang lai kownkow ang pur kowi uang chowm büah khai.2Nami khin khe CHAKRAMANG laiklow mih ang tut-e uang ting khai.3CHAKRAMANG tek ang mih, “Aw maru chapa, nami lawngtang aluchowuüa kawmat paw sakdawng hownia chup arup büah reng chekhai, now amatni kowi kowh angak prakowi pawla mih uanh paw amatni matia kim kowi towah büah reng chekhai. Naiawng rakowi amatni uang lünta chepaw ang naklangah kown nadowi.4Naiawng rakowi amatni kowi en natek pe kown mih, ‘CHAKRAMANG Thurai tek mih maiawng: Israeluüa pungmadawng kowi mia iawng mih chünchü sakdawng hownia chup arup hanow angak prakowi pawla mih uanh aia matia kim kowi tow mih maru nauowi kown, now akung kowi dow risi tut-e uang mih nauowi kown. Naiawng mih maru kowi dow ang CHAKRAMANG, ang matia ngengche mih aia kowh arup aren rakowi tating tataing iawng ang naklangah kown.5Israeluüa dow amatni kowh arup aren kowi chupra kowi ang kowi nuata ang mih chekhai. Naiawng rakowi ang tut-e nauang planla büah iawk kownkow naiawng dow ang naklangah kown,’ pakhai.6“Naiawng rakowi Israeluüa kowi en natek pe kown mih, ‘CHAKRAMANG Thurai tek mih maiawng: Planta sak büa diah. Enni kowh arup aren hownia uang plan büa diah, now enni kowh suiiai kaniaima mih lup maten nuata büa diah.7Israeluüa chepaw Israel pren kowi kowh uowi mih prenlang maru chepaw amia iawng mih chow ang hownia lang talang khai, sakdawng hownia chup arup hai angak prakowi aia kowi pawla mih uanh aia matia kim kowi towah khai, now nauang lünta ang kownkow akung kowi dow risi tut-e uang khai. Naiawng chekhai hanow ang CHAKRAMANG, ang matia ngengche mih aia kowi naklangah kown.8Aia kowi dow maru vüi amatra ang nachangla kown. Aia kowi dow ang nakingküaah kown, now ang maru-uüa pungmadawng hownia aia kowi dow ang nalangta kown. Nami khin khe dow ang chowtaih CHAKRAMANG pami enni natuk bowt kown.9“‘Now naiawng mih maru kowi risi che hawt klangah khai kowh chalow now nami risi kowi dow ang kuanah mih chekhai pami tukah reng diah. Akung kowi dow nami risi kowi paw ang nakingküaah kown, now ang maru Israeluüa pungmadawng hownia nami risi kowi paw ang napiakta kown.10Naiawng mih risi iua hai risi iua tut-e krawi paw prengia mih maru dow amatchi kowh angak rakowi pre ia trui naka ripra kown.11Nami kung kowi dow Israeluüa mih ang hownia nacham powt kown nadowi bowt, now tiama ngak prakowi paw nacham mang büah kown nadowi bowt. Amatni kowh angak maten hown amatni dow natasür talawk büah kown nadowi bowt. Amatni dow ang maru nachowng büah bowt kown, now ang dow amatni kowh Thurai naown bowt kown. Ang CHAKRAMANG Thurai, mami laiklow ang tek khowk,’” pakhai.12Nami kung kowi CHAKRAMANG laiklow dow ang tut-e uang ting khai. Aia tek ang mih,13“Aw maru chapa, maiawng dowkah diah sik: pren lowk mih dow kaah sakowm dowi hai lainowmma chang angak hanow kingküa ang khai. Naiawng rakowi nami pren kowi kingküa hown ang ripah mih chowbowt: Amatni kowh chakkham kramra tia dow ang pitta pe khowk, now nami pren kowi dow ang uang chin pe khown hanow maru hai tawncher kowi ang kowngta pe khai.14Nami khin khe nami pren kowi Noa, Daniel hai Jawb büah sum ia tawi uowi khai chepaw amatni tachi tanawm mih rakowi amatni krowngchow taih nanowng talawng kown. Ang CHAKRAMANG Thurai mami laiklow ang tek khowk.15“Now maiawng dowkah diah sik: Nami pren kowi kaurawng uaramchak hawmh kowi ang kowchin pe khai, now nami kaurawng uaramchak hawmh mih nami pren kowi kowh maru-uüa kowi krawi kowngta hanow pren dow akhaw aklaima towah khai. Naiawng rakowi nami pren dow lainowmma kramra uowi khai, now kaurawng uaramchak hawmh kowi kram kowh nami pren iawng miapaw kownowng mang kownowng kat dowi chekhai.16Nami khin khe nami pren kowi Noa, Daniel hai Jawb büah tawi uowi chepaw amatni kowh chama chapa kowi khowm padow nanowng lawngla büah kown nadowi; amatni krowngchow taih naplai kown. Tawkche pren mih dow akhaw aklaima nauowi kown. Ang kowh sak lüklau se ang tek khowk.17“Now maiawng dowkah diah sik: nami pren kowi kingküaah kownkow ang uang pawla tasenra hanow, ‘Pren kowi bowkbowk re-e tasenra pacham uowi lah,’ padow ang tek pe khai. Now nami pren kowi kowh maru hai tawncher dow ang saita pe bowk khai.18Nami khin khe nami pren kowi Noa, Daniel hai Jawb büah tawi uowi chepaw amatni kowh chama chapa kowi khowm padow nanowng lawngla büah kown nadowi; amatni krowngchow taih naplai kown.19“Now maiawng dowkah iawk diah sik: nami pren kowi dow ang uang chin pe makowng hawi khai, now nami pren kowi kowh maru hai tawncher nakowngta pe kownkow ang kowh kunmaraura dow nami pren luk kowi ang uang klai pe khai20Nami khin khe nami pren kowi Noa, Daniel hai Jawb büah tawi uowi chepaw amatni kowh chama chapa kowi khowm padow nanowng lawngla büah kown nadowi; amatni tachi tanawm mih rakowi amatni krowngchow taih naplai kown. Ang kowh sak lüklau se ang tek khowk.21“Ang CHAKRAMANG Thurai kawmat ang tek khowk, Jerusalem maru-uüa kowi dow kramra uowima mih ripra tali klüng ang nauang pawla pe kown; nakowi kowh maru hai tawncher maten kowi nakowngta kownkow tasenra, khown, kaurawng uaramchak hai makowng hawi ang nauang pawla pe kown. Nami khin khe mün khowt chow nanga kown mih tuk tekah dowi mowr chekhai!22Nachenganchepaw nakowi kowh maru dow nata sing uowi ne kown, now ta sing uowi miuüa kowi dow marow hownia nauang lawtla kown. Nami maru-uüa dow Babulawn pren kowi enni tut-e nauang ting kown, now nami maru-uüa kowh chowm krang uowi krang hai alup ala angakma mih dow enni nakhi kown. Nami khin khe dow Jerusalem maru-uüa luk kowi kowh ang uang pawla pe phih mih lawnguan kowi enni naka sakklamra bowt kown.23Nami maru-uüa kowh chowm krang uowi krang hai alup ala enni khi hanow enni naka sakklamra bowt kown, now auan uowi dowi kowi tawngpaw ang chang dowi chekhai pami enni natuk bowt kown. Ang CHAKRAMANG Thurai mami laiklow ang tek khowk,” pakhai.
The Seed Company