Uown Lawt17
Huamang hownia kowh tui
1Nami kung kowi dow Israeluüa mih Sin pape mih süngrüp süngkangma hownia lawt khai bowt. CHAKRAMANG kowh ana pek iawng amatni dow parah mih hownia parah kowi cham süt cham süt now Refidim pape mih arah kowi kowkhup tangbung büah khai. Nachenganchepaw nakowi dow nakhamah kown mih tui uowi dowi chekhai.2Naiawng rakowi Israeluüa dow Mosi kowi nangah se tek pe mih, “Khamah kown mih tui pe anging,” pakhai.Nakhowk khe Mosi tek pe mih, “Tawngplawng kowchow enni tuk nang ang khai? Tawngplawng kowchow CHAKRAMANG kowh nowng changra enni tuk owm dowi?” pakhai.3Nakhowk khe maru kawmuüa dow tui sakkrai mih chür khai bowt. Naiawng rakowi amatni dow Mosi kowi kamcheah khai. Maru kawmuüa tek pe Mosi mih, “Anging hai anging kowh chauüa hown anging kowh tawncher hawmh kowi tui sakkrai hown nape kowng anging kownkow Aigupta hownia en uang lawtla anging mih bow?” pabüah khai.4Nami laiklow tata hanow Mosi dow CHAKRAMANG tut-e kar se tek mih, “Mami maru-uüa hown tawng chow ang nachang kown? Kra nawng now amatni dow hua hown nakuak ang kown chowbowt,” pakhai.5Nakhowk khe CHAKRAMANG tek pe Mosi mih, “Israel lawngtang aluchowuüa kowi pawla pre sum ia now maru kawmuüa pur kowi kowrik mang diah. Now en bawpla Nail aw mih raitua paw pawla diah.6Sinai hungh kowi kowh hua uowi lowk mih luk kowi en pur kowi ang nauang iowng kown. Nami hua kowi dow raitua hown en nabawpah kown. Nahanow nami hua hownia dow maru kawmuüa nakhamah kown mih tui nauang lawt kown,” pakhai. Now Mosi dow Israel lawngtang aluchowuüa pur kowi CHAKRAMANG tek iawng chang khai bowt.7Mosi dow nami arah ming Meriba hai Masa pahai chap pe ming khai. Meriba pami auan dow “tanang” pami chekhai, now Masa pami auan dow “achaing” pami chekhai. Tawngplawng kowchow panow Israeluüa dow nami Refidim kowi Mosi hown tanang khai. Now amatni dow, “CHAKRAMANG tawi uowila a-i bow, tawi uowila a-i dowi bow?” padow CHAKRAMANG kowi chaingah khai.
Amalekuüa kowi Israeluüa awngta mih
8Nami khin khe Amalekuüa kowh siphai hawmh dow Israeluüa hown nauang tasen kownkow Refidim kowi uang khai.9Nakhowk khe Mosi tek pe Josua mih, “En mih a-i pungmadawng hownia klola maru now Amalekuüa kowi kowsen diah. Tharau khe Thurai kowh raitua pawla hanow hungh chut kowi ang kowhawt iowng kown,” pakhai.10Josua dow Mosi tek iawng chang khai. Aia dow Amalekuüa kowi kowsenah khai. Nakhowk khe Mosi, Arawn hai Hur büah dow nami hungh chut kowi kowpün khai.11Tasen mih khin khe Mosi parta bawng hüah mowr dow Israeluüa awng khai. Nachenganchepaw Mosi iu klata bawng now Amalekuüa awng khai.12Naiawng rakowi Mosi kowh bawng ri lai bowt khe dow Arawn hai Hur iüah mih uang pawla pe huaklu lowk khai, now Mosi dow nami hua luk kowi chowm khai. Arawn hai Hur iüah dow Mosi kowh bawng hawmlawm pra lowk ia lakuai pra lowk ia tawi town pe khai. Naiawng hown Mosi kowh bawng dow sat kup dowi mowr hing tapar hüah khai.13Naiawng rakowi Josua dow Amalekuüa kowh siphaiuüa kowi hing chumta pe khai.14Nami kung kowi CHAKRAMANG tek pe Mosi mih, “Mami tasen laiklow mih natukla reng kownkow charam tua kowi ruiah diah. Now Amalekuüa kowh ming dow lusa hownia ang nahing mata kown mih laiklow Josua kowi tek pe diah,” pakhai.15Nami kung kowi Mosi dow thawp phuchuara lowk khai, now aming dow Jehova-Nisi pahai chap pe khai. (Jehova-Nisi pami dow “CHAKRAMANG dow ang kowh tamkhuown” pami chekhai).16Mosi tek mih, “CHAKRAMANG kowh tamkhuown ruangah diah. CHAKRAMANG dow chowngchowng saksakma Amalekuüa kowi nasenah reng kown,” pakhai.The Seed Company