Lai Ching5
1Thurai chup kim kowi en cham kowi khe kaneu diah. Kowmatia kowh angak tuk dowi mih maru-uüa iawng chang phuchua mih lak-e nasünta Thurai lai kownkow Thurai tut-e kowkowi mih lang iung.2En kowh nawr mih alenma hang pacham tek lai lah; Thurai tut-e sakkrowngma hang tek lai diah. Thurai dow mukuang kowi uowi mih chekhai, now en dow lusa kowi uowi mih chekhai. Naiawng rakowi en kowh laiklow mih a-echow pana lah.3Tuakah hu lai now tuakah mih sia uarmang kowi khi-ah reng, nami iawng dow lai hu lai now bualama mih laiklow uang lawt reng chekhai.4Thurai tut-e takhamta mih sia uowi hanow takhamta iawng alenma changta diah; tawngplawng kowchow panow aia dow bualama miuüa luk kowi awmrawm dowi chekhai.5Takhamta hüah kowh takhamta iawng chang dowi mih iung dowi; nami lak-e dow hing takham dowi mih lang iung chekhai.6En kowh nawr mih angak prakowi hang pacham pawla en lah. “Ang takhamta mih tawi khai,” pami uamowuüa kowi hangkow tek pe diah. Naiawng en tek hanow Thurai mih nasak-ih en kown nadowi tham, now aia mih en changah mih lup maten napiakta en kown chekhai.7Ahuma khi uarmang mih hai ahuma tek lai mih tawngpaw asung uowi dowi. Nami lak-e dow Thurai kowi phai ringkawma hown kramah diah.8Pren kowi nowng chang powng changra krüa kowi ngarai miuüa uowi mih en khi chepaw, now ngarai miuüa kowi chet pe tara nowm dowi mih en khi chepaw hangkow awda diah. Tawngplawng kowchow panow maru iuk luk kowi paw aia lak-e lang iuk mih uowi tak chekhai, now amatchi pre ia trui luk kowi paw aiuk aiukma mih maru iuk uowi tak chekhai.9Nachenganchepaw lupah mih krawng natownla reng kownkow mang uowi lowk ia hanow pren vüi lang iung chekhai.10Tangka pawisa kowi lowpa miuüa dow, “Maiawng khowt now na khowk,” pami katpaw natuak kown nadowi. Now dawngthawnguan kowi lowpa miuüa paw amatni ka mowr mih luk kowi katpaw nasak-ih kown nadowi. Naiawngün lowpa mih paw tawngpaw auan uowi dowi chekhai.11Dawngthawnguan uang pawng hanow nami dawngthawnguan sun mih maru paw uang pawng chekhai. Khita now awmrawm mih klen kowi dow nami dawngthawnguan iah kowh tawngpaw mrawkra uowi dowi chekhai.12Chang lup mih maru dow ahuma cha chepaw a-echow cha chepaw klangiungma ia müi reng. Tawkche kureng miuüa kowi dow dawngthawnguan pe müiah dowi chekhai.13Mukuang dak kowi kowh phaw mih maiow kowi angakma mih sia ang khi lowk tak. Nami dow lusa maru lowpa dawngthawnguan mih aiamat nga müa chowtaih chekhai.14Naiawngün dawngthawnguan dow aia kowh kun chang tawi hanow piak reng. Naiawng rakowi aia kowh chauüa vüi tawngpaw ta uowi dowi chekhai.15U mu lak hownia uang diah khe lusa maru mih tawngpaw uang pawla dowi chekhai; aia mang khe paw tawngpaw aia napawla kown nadowi. Aia kawmah mih nowm chepaw aia kramah mih sia tawngpaw aia ia pawla dowi.16Nami paw lainowmma nga mih chap chekhai. Lusa maru mih uang dia khe kowh iawng plan mang reng; amatni kowh lup dow tawngpaw mrawkra uowi dowi chekhai. Nami paw li kung kowi kowh cham krawi iowm mih iawng taih chekhai.17Sak-hiara, taprüa taiiara hai kunmaraura hown kangowh iiu dawng kowi lusa maru mih sun chownglawng reng chekhai.18Nachenganchepaw lusa maru chownglawng kowi iung mih sia uowi lowk. Nami dow mukuang dak kowi kowh maru-uüa mih Thurai pe singah mowrchow mih khin kowi nacha nakham kown mih hai nachang lup kown mih kowi sak-ih mih iung hai taka pami ang tuk khai. Tawngplawng kowchow panow amatni kowh kakbak dow nami towbowt chekhai.19Kurengra hai dawngthawnguan aia pe a-i mih khin khe naiawngün nasun kown mih kür paw Thurai pela a-i chekhai. A-i kowh kakbak napaw kown mih hai a-i kowh lup luk kowi naawmrawm kown mih aia pe a-i khin khai. Naiawngün dow Thurai hownia kowh uanh iawng pek chekhai.20Naiawng rakowi a-i kowh chownglawng atownchow mih lawnguan kowi a-i tuak krat dowi chekhai. Tawngplawng kowchow panow a-i kowh sak kowi mih pe a-i awmrawmra hanow pusama aia tow a-i khai.
The Seed Company