Plan Rui25
1“Takhowk taran rakowi tara chet takla khai hanow amatchi pre ia mih tara chet rah kowi nakowkowi kown, now tara chet miuüa nachet pe tara nowm kown. Tara chet rah kowi dow atawi uowi mih maru kowi atawi uowi pahai tara chet miuüa naphuangah kown, now atawi uowi dowi mih maru kowi dow atawi uowi dowi pahai tara chet miuüa naphuangah kown.2Now atawi uowi mih maru kowi natepah kown mih che tara chet miia lawt ana khai hanow nami maru kowi dow krawng kowi nape takhumah kown. Now aia pur kowi dow aia khowm pe bowk pe khowt nami maru kowi lengker hown nabawpah kown.3Tawkchedow likawm müa klen kowi enni naia tepah kown nadowi. Likawm müa klen kowi che enni tepah khai hanow enni matia tainau kowi enni ringkawah dowi mih chekhai.4“Chiala hown enni thua cha mih khin khe nawrbawng kruk müa hown enni nakruk pe nawrbawng kown nadowi.5“Taichow nauchow pakimsang taiua uowi reng tak khe ataimow paw masi kowh kala chah dowi kowi kowng khai mih paw naia uowi kown. Nahanow nami kowng mih kowh masi mih akeng kimchak kachakuüa hown nacham ia tachawng kown nadowi. Nami masiuüa mih ahua kowh naumow hown nata tachawng kown, now aia luk kowi achang takla iawng ahua kowh naumow nachang pe kown.6Now amatchi rik kaah mih kachakuüa chah dow ataimow kowng khowk mih kowh chah iawng hai nadowkah kown. Nahanow ataimow kowh ming mih Israeluüa pungmadawng hownia natama kown nadowi bowt.7Nachenganchepaw anaumow che ataimow masi kowi ta chawng kown nau dowi hanow nami masiuüa mih marow tapplawt re-e lawngtang aluchowuüa tut-e nakowkowi kown. Now aia natek pe kown mih, ‘Ang hua kowh naumow mih ataimow kowh ming Israeluüa pungmadawng kowi nata town pe kown mih nauta dowi. Ang luk kowi kowh aia nachang kown mih alow uowi iawng chang kown nau dowi,’ napape kown.8Nakhowk khe nami maru kowi mih nakowi kowh lawngtang aluchowuüa nahawah hanow natek pe kaneu kown. Naiawng tek pe kung kowi paw nami maru che ataimow masi kowi nata chawng kown nauta dowi hanow9nami masiuüa dow lawngtang aluchowuüa pur kowi nami kachakuüa re-e nakowkowi kown. Now nami masiuüa mih nami kachakuüa khawk kowi kowh phanaikhawk naklüpta pe papra hanow lumowr kowi nathawkah kown. Now natek pe kown mih, ‘Kowmatia taimow kowh krungchak ta town kown nau dowi mih kowi dow maiawng chaw changah reng!’ napape kown.10Israeluüa pungmadawng kowi naiawng mih maru kowh krungchakuüa kowi dow ‘Klüpta pe phanaikhawk mih krungchak’ pahai nahawah kown.11“Maru pre ia takhüm khe alowk mih kowh masi che ahua kowi tawi khowngah kownkow alowk mih kachakuüa kowh khampha uanh kowi uang dowkta pe chen khai hanow12nami masiuüa kowh rut dow enni nadungta pe kown takla. Aia kowi dow mapaw enni nasanaah kown nadowi.13“Nakuanla maru kownkow uanh khai müa hua pre buk chi enni naia tawng kown nadowi. Enni ran uanh khe ahuma kala kown mih müa lowk, now enni sum uanh khe a-echow pela kown mih müa lowk enni naia tawng kown nadowi.15Kuan maru mih kowi dow CHAKRAMANG enni kowh Thurai sui chekhai. Naiawng rakowi CHAKRAMANG enni kowh Thurai nape enni kown mih pren kowi enni kowuowi khe athikma hai achima mih akhai müa enni natawng kown takla. Nahanow CHAKRAMANG enni kowh Thurai pe enni mih pren kowi chowngdawng sakklangma enni naia uowi kown.17“Aigupta pren hownia enni uang lawt kung kowi tiama rawng kowi tawng iawng chow Amalekuüa chang enni mih hangkow tamata büa diah.18Enni bowm hai kawm mih khin khe amatni dow uang dowk enni tasen khai. Now kung pra kowh ta lawt miuüa kowi dow kowngta büah bowk khai. Amatni dow Thurai kowi kram büah dowi chekhai.19Naiawng rakowi enni nachangla dawngthawnguan kownkow CHAKRAMANG enni kowh Thurai nape enni kown mih pren kowi enni kowuowi khe aria aret kowi kowh ransu-uüa kowi aia dow enni rut kowi nape sumah kown. Nami khin khe dow Amalekuüa kowi lusa hownia asaima enni nahing mitta kown. Mami laiklow hangkow tamata büa diah.
The Seed Company