Plan Rui23
1“Hangdui teuma miuüa hai khampha uanh hiama miuüa dow CHAKRAMANG kowh maru-uüa takua talawmra kowi natawi ia kowi kown nadowi.2“Iang chah dow CHAKRAMANG kowh maru-uüa takua talawmra kowi natawi ia kowi kown nadowi. Aia kowh krungchakuüa khowm padow hamüt chowng mowr chepaw CHAKRAMANG kowh maru-uüa takua talawmra kowi natawi ia kowi kown nadowi.3“Amawnuüa hai Moabuüa dow mia iawng mih paw CHAKRAMANG kowh maru-uüa takua talawmra kowi natawi ia kowi kown nadowi. Amatni kowh krungchakuüa khowm padow hamüt chowng mowr chepaw CHAKRAMANG kowh maru-uüa takua talawmra kowi mapaw natawi ia kowi kown nadowi.4Tawngplawng kowchow panow Aigupta pren hownia enni uang lawt mih khin khe amatni dow chakkham hai tui ün hawt pe enni dowi chekhai. Naiawngün hawt pe enni lak dow nape enni piati kownkow Beur kowh chapa Balam kowi tangka hown uang ngala büah khai. Balam dow Aram-Naharaim pren kowi kowh Pethawr marowchak chekhai.5Nachenganchepaw CHAKRAMANG enni kowh Thurai dow Balam kowh laiklow sünta pe dowi. Aia dow sakrau enni khai rakowi Balam kowh piati mih enni vüi prasira pe chowngah khai.6Amawnuüa hai Moabuüa kowi dow enni sing uowi mowr mapaw enni nakhowngah kown nadowi, now napeah iungra kown nadowi.7“Nachenganchepaw Edawmuüa kowi dow enni nasuiah kown nadowi. Tawngplawng kowchow panow amatni dow enni kowh tasin taken miuüa chekhai. Now Aiguptauüa kowi paw enni nasuiah kown nadowi. Tawngplawng kowchow panow amatni pren kowi dow prenlang maru iawng hai enni uowila akat chekhai.8Enni pungmadawng kowi kowh tawi uowi mih Edawmuüa hai Aiguptauüa dow amatni kowh krungchakuüa sum chowng hownia CHAKRAMANG kowh maru-uüa takua talawmra kowi natawi ia kowi kown taih.9“Ransu-uüa hown nadowk tasen kownkow enni cham khup tangbung mih khin khe asürlawkma mih sia hownia enni nalang tahen kown.10“Iak-e müi khe enni kowh che khampha uanh tui chawn khai hanow enni dow natasürlawk kown. Naiawng asürlawkma mih maru dow nami ni ni chut tangbung khup rah uat kowi nacham lang uowi kown takla.11Now nami ni sat kowi khe dow aia nalu tui kown takla. Now sat kup khe dow tangbung khup rah kowi aia uang ia kup kown towbowt.12“Enni kowh uatra dow tangbung khup rah uat kowi enni nakhowm bowkah parah kown takla.13Now enni kowh tasen müa rutchün khawkleng pungmadawng kowi dow enni natowla parpa lowk kown takla. Enni uat rau khowk hanow nami arah kowi enni nathai kuam kown, now ki uat khe dow enni naplan thiala iawk kown takla.14Enni kowh tangbung khup rah dow chimsaima enni natowah kown takla. Tawngplawng kowchow panow CHAKRAMANG dow nalawng enni kownkow hai enni kowh ransu-uüa kowi enni rut kowi nape sumah kownkow enni kowh tangbung khup rah kowi tawi uowila enni reng chekhai. Enni pungmadawng kowi che suiiai kaniaima mih sia aia khi khai hanow aia dow napowtta enni kown.15“Lowra nar che aia kim iah hownia powt kowh enni tut-e uang tatung tanim khai hanow nami nar kowi dow kim iah tut-e enni nakowplan saah kown nadowi.16Aia kowi dow enni pungmadawng kowi aia nau mih marow kowi enni nape uowiah kown. Aia kowi dow enni nachangah naklak kown nadowi.17“Enni Israeluüa pungmadawng kowi dow kachakuüa chepaw, masiuüa chepaw CHAKRAMANG kim kowi naia chang chawkkrawma lup kown nadowi.18Masiuüa chepaw, kachakuüa chepaw takhamta mih rakowi uang pawla uanap mih khin khe chawkkrawma lup changra hownia kowh kaah mih tangka dow CHAKRAMANG enni kowh Thurai chup kim kowi nauang ia pawla kown nadowi. Tawngplawng kowchow panow naiawng chang chawkkrawma lup mih kachakuüa hai masiuüa kowi dow CHAKRAMANG suiah reng chekhai.19“Tangka chepaw, chakkham chepaw, akeng mih chap chepaw enni Israeluüa kowi enni pe khawiah khai hanow amatni kowi dow enni napaw pe achüt kown nadowi.20Akeng chenchapuüa hownia dow enni naia paw pe achüt kown taih. Nachenganchepaw enni Israeluüa hownia dow enni naia paw achüt kown nadowi. Nahanow enni nakowpowngah kown mih pren kowi enni kowuowi mih khin khe CHAKRAMANG enni kowh Thurai dow enni changah mih lup maten kowi nape enni prasi kown.21“CHAKRAMANG enni kowh Thurai vüi kowi pe kown mih enni takhamta khai hanow kra dowi kowi lüa peta büa diah. CHAKRAMANG enni kowh Thurai dow enni takhamah mih uanh nakük enni kown. Enni takhamah mih che enni pe dowi hanow enni vüi angak nachowng kown.22Nachenganchepaw enni takham dowi hanow enni tut-e angak nauowi kown nadowi.23CHAKRAMANG vüi kowi enni takhamta khai hanow enni nape ngengche kown takla. Tawngplawng kowchow panow CHAKRAMANG enni kowh Thurai vüi kowi enni takham mih dow enni matia sak nau hown kowh chekhai.24“Enni kowh kimping namkhetuüa kowh grep krum kowi enni cham kowi mih khin khe enni nau mowr enni naia cha grep uih kown. Nachenganchepaw apawk müa dow lowkchow khowm padow em kowi enni naia phangla kown nadowi.25Enni kowh kimping namkhetuüa kowh üa hai laih kowi enni cham kowi mih khin khe rut hown klowkah hanow enni nau mowr enni naia cha luprak kown taih. Nachenganchepaw tangchen hown dow mapaw enni nangen luprak kown nadowi, now kim kowi enni naia pawla kown nadowi.
The Seed Company