2 Samuel1
Sawl hai Jonathan iüah kowng mih satang
1Sawl kowng kung kowi David mih Amalekuüa kowi senah now nowngta khai, now Ziklak marow kowi aia uang plan hanow uowila pre ni khai.2Now sum ni mih ni khe dow Sawl siphai hawmh kowh tangbung khup rah hownia David tut-e klanguüa uang lowk ia khai. Nami klanguüa dow aia uowila uiting uangtak rakowi thekna theknama mih tawnguat uang khupla khai, now lu kowi paw uang pruila dinchow khai. Aia dow David tut-e uangah hanow krawng kowi tabawk krawm se uang chupah khai.3Nami klanguüa kowi David lüntaah mih, “Tawng hownia chow en uang?” pakhai.Nami klanguüa klangah mih, “Israeluüa kowh tangbung khupra hownia ang uang powt mih chowbowt!” pape khai.4David plan lüntaah mih, “Tawng chow own? Tek ang madiah,” pakhai.
Nami klanguüa klangah mih, “Tasenra hownia maru kawmuüa powt bowk khowk. Now kowng paw kowng ne khowk. Sawl hai Jonathan iüah pachowh paw kowng khai bowt,” pakhai.5Nami klanguüa kowi David plan lüntaah mih, “Saul hai Jonathan iüah kowng khowk pami tawng iawng chow en tukah khai?” pakhai.6Nami klanguüa klangah mih, “Nakhowk khe ang mih Gilboa hungh kowi chekhai. Nami khin khe Sawl mih reh hown tathawkla se iowng phülü chowdiah. Nakhowk khe kawrnga kari hai kawrnga kowi kowh chowm mih ransu-uüa aia re-e uang ting kown mih atawnchow towbowt chekhai.7Nami khin khe Sawl dow krawi tang mü hanow khita ang khai, now uai haw ang khai. Nakhowk khe ang tek pe mih, ‘Tawng chow chakramang?’ ang pape khai.8“Aia lünta ang mih, ‘Mia chow en?’ pah ang khai.
“Ang klangah mih, ‘Ang dow Amalekuüa chowtaih,’ ang pape khai.9“Aia tek mih, ‘Sakrauma hown ang re-e uang hanow uang saita ang bowt. Ang ngare lai bowt; kowng kown towbowt ang nau,’ pah ang khai.10“Naiawng rakowi ang kowkowiah now aia kowi mih ang kowsaita khai. Tawngplawng kowchow panow aia dow sing dowi bowt tham pami ang tuk chekhai. Now aia kowh mang lukruk hai kuaiseh dow ang klüpta pe khai. Naiawngün dow ang kowh chakramang en tut-e ang uang pawla en khowk,” pakhai.11Nami laiklow tata hanow David hai aia tut-e kowh tawi uowi mih siphai maten amatni kowh tawnguat thekah büah khai.12Amatni dow tawngpaw cha büah kham büah dowi kowi sat kup dowi mowr kar büah khai. Naiawng hai amatni dow Sawl hai Jonathan iüah pachowh vüi hai tasenra kowi kowh cham kowng mih CHAKRAMANG kowh siphai hawmh Israeluüa vüi uowila uiting uangtak büah khai.13Nami uang phowng satang mih klanguüa kowi David lüntaah mih, “En dow tawng hownia kowh maru chow?” pakhai.
Nami klanguüa klangah mih, “Ang dow mami Israel pren kowi kowh tawi uowi mih Amalekuüa taih,” pape khai.14David tek pe aia mih, “CHAKRAMANG nümnapah mih maru kowi nasaita kown mih tawngplawng kowchow mapaw en kram dowi?” pakhai.15Now David dow aia kowh maru kowi hawah lowk ia now tek pe mih, “Uangah now mami maru kowi uang sai madiah!” pape khai. Naiawng rakowi David kowh maru dow nami klanguüa kowi saita khai.16Now David tek mih, “En kowng mih aprek dow en chowtaih nakur kown. Tawngplawng kowchow panow CHAKRAMANG nümnapah mih maru kowi en saita mih en matia nawr hown en taphuang khowk chekhai,” pakhai.17Mami kar meng dow Sawl hai Jonathan iüah pachowh vüi kowi kowh David tekah mih chekhai.18Mami meng kowi dow Salangba Meng pahai chap pe ming khai. Mami kar meng mih Juda krungchakuüa maten kowi nakrawi sangah kown mih David peah ana khai. Mami meng dow Jaser Bowih pami kowi arui uowi chekhai.19Aw Israel, en kowh kiowrira, en kowh aluchowuüa dow hungh luk kowi kowng khai bowt,en kowh tasen kiakma miuüa dow kowng khai bowt.20Nami satang dow Gat marowchakuüa kowi hangkow phowng pe büah,Askelawn marow kowi kowh tiama kowi hangkow phuangla büa diah.Enni phuangla now Filistin masiuüa hawmh naawmrawm kown chekhai,now tuk Thurai dowi miuüa kowh chamauüa napiaw kown chekhai.21Gilboa hungma mawngmauüa low,nang tui lah, uang lah enni luk kowi hang pacham kla lah,nakowi kowh süng kowi dow luprak hang pacham phaw lah.Tawngplawng kowchow panow tasen kiakma miuüa kowh kawngma ringkawra piak mih dow nakowi chekhai,Sawl kowh kawngma kowi dow sau hown nasawkah kown nadowi bowt chekhai.22Jonathan kowh salangba dow krawi paw maru sak reng,Sawl kowh saidawng dow krawi sai maru reng chekhai.Amatchi dow ransu-uüa kowh vi krawi hawk pe reng chekhai,amatchi dow tasen kiakma miuüa kowh buk krawi sawt reng chekhai.23Sing uowi reng tak khe Sawl hai Jonathan iüah kowi dow lainowmma maru sakrauah khai,kowng khe paw amatchi dow alangma nadowi chekhai.Amatchi dow uamu iowk lak-e iowm lang len,now krangsi lak-e paw lang kür iüah chekhai.24Israel masiuüa low, Sawl vüi kowi kar büa diah;aia dow asung khakma mih uan aringma mih pe khup enni khai,dan pe kuh mih uan klangiungma mih hown tawng enni khai.25Tasen kiakma miuüa dow tasenra kowi kowng khai bowt!Jonathan kowh uak dow hungh luk kowi takuak hüah khai.26Aw ang tainau Jonathan, en rakowi lainowmma ang sak nga khai,ang dow lainowmma sakrau en khai.En kowh sakraura dow ang tut-e asung uowima chekhai.Nami dow masiuüa kowi kowh sakrau mih lak-e lang pankri chekhai.27Tasen kiakma miuüa dow tasenra kowi kowng khai bowt!Amatni kowh saidawng hai reh ün paw hing piak khai bowt.
The Seed Company