2 Krungchakuüa15
1Thurai kowh lümla dow Obed kowh chapa Azaria luk kowi uang ting khai.2Nakhowk khe Azaria dow mang Asa hown nakowtakrum kownkow kowkowi khai. Now aia tek pe Asa mih, “Aw Asa, aw Juda hai Benjamin krungchakuüa maten, ang laiklow sünta büa diah. CHAKRAMANG tut-e enni uowi mowr CHAKRAMANG paw enni tut-e natawi uowi kown. Aia kowi che enni krawi cham khai hanow aia kowi enni nakrum kown. Tawkchedow aia kowi che enni nuata khai hanow aia paw nanuata enni kown.3Israeluüa hown dow Thurai ching tawi uowi dowi mih akrama khowk chekhai: Amatni tut-e dow Thurai lai tüngsang mih uamowuüa hai Thurai kowh ari aiang uowi dowi chekhai.4Nachenganchepaw akrat pusa hown amatni uowi mih khin khe dow CHAKRAMANG Israeluüa kowh Thurai prakowi uang plan büah hanow Thurai kowi krawi cham büah khai, now amatni dow Thurai kowi krum büah khai.5Nami khin khe dow cham mang cham kat kown mih mapaw thaulang dowi chekhai. Tawngplawng kowchow panow arah maten kowi dow mapaw thaulangra uowi dowi chekhai.6Chenchapuüa mih lowkkowlowk chenchap kowi tachang anowng apowng khai, now marow ün lowkkowlowk marow krawi tapiak khai. Naiawng rakowi amatni kowi dow piakra maiow hown Thurai towkah ngare khai.7Tawkchedow enni mih sakkhawtma uowiah büa diah, hangkow sak piak büa diah. Enni changah mih lup sung dow enni naka kown taih,” pakhai.8Risi Azaria kowh naiawngün laiklow tata hanow Asa dow ka sakkraingra khai. Now aia dow Juda hai Benjamin süng hownia, aia powngah mih Efraim hungma mawng süng kowi kowh marow ün hownia suiiai kaniaima mih arup aren maten piakta bowk khai. Now aia dow CHAKRAMANG kim kimpuk re-e kowh towah mih CHAKRAMANG kowh phuchuara rawah khai.9Nami kung kowi Asa dow Juda hai Benjamin süng maru maten kowi arasang kuaah lawmah khai. Nami klen kowi aia dow Efraim, Manase hai Simiawn krungchak maru-uüa kowi paw kuala khai. Tawngplawng kowchow panow Asa tut-e CHAKRAMANG Thurai tawi uowi mih tuk hanow Israel hownia kowh maru dow powt hanow Juda pren mang Asa prakowi akawmma uang tawi tabawng khai.10Naiawngün maru-uüa Jerusalem marow kowi uang takua talawm mih dow Asa chowm mang mih laitanga ning nga kowi kowh sum la khe chekhai.11Nami khin khe amatni dow amatni uang rupla mih uanh hownia chiala 700 pum hai ruapur 7,000 pum CHAKRAMANG vüi phuchua büah khai.12Now amatni dow takham se tek mih, “Sak maiow hown CHAKRAMANG anging pipu-uüa kowh Thurai kowi anging nacham kown;13aiuk asowm lah, kachakuüa masiuüa lah CHAKRAMANG Israeluüa kowh Thurai low iawng uowi dowi mih kowi dow nasaita kown,” pabüah khai.14Naiawng hai amatni dow howla se hai tumla baw se CHAKRAMANG tut-e atün atünma kham sawi büah khai.15Nami sawi kham rakowi Juda prenchakuüa maten dow awmrawm khai. Tawngplawng kowchow panow nami sawi kham dow sak maiow hown kowh amatni khamah mih chekhai. Amatni dow Thurai kowi cham büah khai rakowi Thurai kowi ka büah khai. Now CHAKRAMANG dow bowkbowk prakowi amatni kowi peah thaulangra khai.16Mang Asa pa kowh u Maka dow suiiai kaniaima mih Asera limpu thawp khai rakowi aia kowi dow mangra hownia Asa klata khai. Now nami Asera limpu dow kripta naknak hanow Kidrawn lawngrawi kowi cham pawla now cham tikah khai.17Asa dow Israel pren kowi kowh arah kroma mih kowi kowh chupiiara piakta dowi chepaw chownglawng prat CHAKRAMANG luk kowi kowh aia kowh ringkawra saktuak mih atekma chekhai.18Thurai vüi kowi kowh a-pa Abija matchi lang towah mih kuh, tai hai akeng mih uanh Thurai chup kim kowi aia kowpawla khai.19Asa chowm mang mih 35 ning mowr dow katpaw tasen dowi bowt chekhai.
The Seed Company