1 Krungchakuüa5
1Jakawb kowh chapa ta Reuben dow a-pa changla masi mih narma hown taphua taiua khai. Naiawng rakowi Reuben dow aia kowh chapa ta rah ka dowi chekhai. Akung kowi nami chapa ta rah dow anaumow Josef kowh chapauüa kowi Thurai peta khai. Naiawng rakowi aia kowi dow Israel krungchakuüa pungmadawng kowi chapa ta pahai klowkla dowi chekhai.2Amatni tainau krungchak pungmadawng kowi lang kür mih dow Juda krungchak chowdiah, now Juda krungchak hownia aluchow paw klota khowk chowdiah. Nachenganchepaw chapa ta rah ka mih dow Josef chekhai.3Jakawb chapa ta Reuben kowh chapauüa dow Hanawk, Pallu, Hezrawn hai Karmi büah chekhai.4Joel kowh chapa dow Semaia chekhai. Semaia kowh chapa Gawg, Gawg kowh chapa Simei,5Simei kowh chapa Mika, Mika kowh chapa Reaia, Reaia kowh chapa Baal, now Baal kowh chapa dow Bera chekhai. Bera dow Reuben krungchakuüa kowh aluchow chekhai. Aia kowi dow Asuria pren mang Tiglat-Pileser mih khümla khai.7Reuben krungchak ming dow amatni chowlowkkow krungchak taken iawng krungchakuüa ming tang bowih kowi arui uowi chekhai. Amatni pungmadawng kowi kowh lang pankri miuüa dow Jeiel, Zekaria hai Azaz kowh chapa Bela büah chekhai. Azaz dow Sema kowh chapa chekhai, now Sema dow Joel kowh chapa chekhai. Amatni dow Arawer marow hownia Nebo marow hai Baal-Meawn marow mowr uowi büah khai.9Now satlawt pra kowh Iufratis aw hownia süngrüp süngkangma pra kowh mangla mih tiama mowr uowi büah khai. Tawngplawng kowchow panow Gilead süng kowi dow amatni kowh tawncher hu mih nowm khowk chekhai.10Sawl chowm mang mih khin khe Reuben krungchakuüa dow Hagrituüa kowi senah hanow kowngta büah khai. Amatni dow Gileaduüa süng satlawt prakowi kowh Hagrituüa kowh arah maten powngta pe hanow nakowi uowi büah khai.11Gad krungchakuüa dow Reuben krungchakuüa hown kowh tatang klowk mih Basan pren kowi kowh Saleka marow mowr uowi büah khai.12Amatni pungmadawng kowi kowh lang pankri mih dow Joel chekhai. Now Joel kung kowi dow Safam, Janai hai Safat büah chekhai. Amatni kowh uowi rah dow Basan pren kowi chekhai.13Amatni kowh tasin taken miuüa dow Mikael, Mesulam, Seba, Jorai, Jakan, Zia hai Eber büah chekhai. Naiawngün ranit ia mih dow amatni chowlowkkow krungchak kowi kowh aluchow chekhai.14Amatni dow Hur kowh chapa Abihail krungchak maru-uüa chekhai. Hur kowh pa dow Jaroa, Jaroa kowh pa dow Gilead, Gilead kowh pa dow Mikael, Mikael kowh pa dow Jesisai, Jesisai kowh pa dow Jado, now Jado kowh pa dow Buz chekhai.15Abdiel chapa Ahi dow amatni krungchak kowi kowh aluchow chekhai. Now Abdiel dow Guni kowh chapa chekhai.16Gad krungchakuüa dow Gilead pren kowi, Basan pren kowi hai nakowi kowh marow kowi krawi uowi büah khai. Nami klen kowi Sarawn süng kowi kowh tawncher thing rah maten kowi ün krawi uowi büah khai.17Maiawngün krungchakuüa ming dow krungchakuüa ming tang bowih kowi arui uowi chekhai. Naiawng ming tang bowih kowi ruiah mih dow Juda pren mang Jotham hai Israel pren mang Jeroboam iüah chowm mang mih khin khe chekhai.18Reuben krungchak, Gad krungchak hai Manase krungchak dawnglang hownia dow tasen kiakma mih siphaiuüa uowi 44,760 ia chekhai. Naiawngün maru-uüa dow kawngma, saidawng hai salangba tawngkeng akiakma kangowh chekhai.19Amatni dow Hagar chenchap Jeturuüa, Nafisuüa hai Nodabuüa hown tasen khai.20Naiawngün maru-uüa hown tasen mih khin khe amatni dow chup Thurai khai, now Thurai dow amatni awr lüah mih hawt sünta pe khai. Amatni dow Thurai luk kowi neplawng nesak khai rakowi amatni kowi dow Thurai tawi khowngah khai. Hagar chenchap hai aia prakowi kowh tawi tangi mih maru-uüa maten kowi dow Thurai mih amatni rut kowi apta pe khai.21Amatni dow Hagar chenchap kowh Ut 50,000 pum, ruapur 250,000 pum hai kawrngaramchük 2,000 pum pawta pe khai, now maru iun 100,000 ia khümla büah khai.22Nami klen kowi ransu-uüa kowng mih paw ahuma tak chekhai. Tawngplawng kowchow panow nami tasenra uang ting mih dow Thurai kamrütra hownia kowh chekhai. Reuben krungchak, Gad krungchak hai Manase krungchak dawnglang dow nar kowi takhang mih khin uang ting dowi mowr Basan pren kowi uowi büah khai.23Manase krungchak dawnglang dow maru iun akawmma chekhai. Naiawng rakowi amatni dow Basan pren hownia Bal-Hermawn hungh, Senir hungh hai Hermawn hungh mowr krawi uowi büah khai.24Amatni krungchak kowi kowh aluchowuüa dow Efer, Isi, Eliel, Azriel, Jeremia, Hodavia hai Jadiel büah chekhai. Naiawngün tasen akürma miuüa dow aming anang pawma mih maru-uüa chekhai.25Nachenganchepaw amatni dow amatni pipu-uüa kowh Thurai kaah sakowm dowi mih lup chang büah khai. Amatni dow Thurai piakah mih chenchapuüa kowh thuraiuüa kowi cham tawi chupiia khai.26Naiawng rakowi Israeluüa kowh Thurai mih Asuria pren mang Tiglat-Pileser kowi amatni luk kowi towkah kunmarau khai. Tiglat-Pileser kowh ming uowi lowk tak mih dow Pul chekhai. Now Tiglat-Pileser dow Reubenuüa, Manase krungchakuüa dawnglang hai Gaduüa kowi khümla hanow Hala, Habawr, Hara süng kowi hai Gozan aw pang kowi ün pawla khai. Now amatni dow kawmat paw nakowi uowi reng tak chekhai.
The Seed Company