Read ROMA 10

ROMA10

¹E ōku tēina, ko tā tōku ngākau i wawata ai, ko tōku īnoi hoki ki te Atua mō rātou, kia whakaorangia rātou.²E whakaae ana hoki ahau ki a rātou, he ngākau nui tō rātou ki te Atua, otiia, ehara i te mea mōhio.³I a rātou hoki e kūware ana ki tā te Atua tika, e whai ana kia whakaūkia ko tō rātou ake, kīhai rātou i ngohengohe ki te tika a te Atua.⁴Ko te Karaiti hoki te tukunga iho o te ture hei tika mō ngā tāngata whakapono katoa.

Te Whakaoranga mō ngā Tāngata Katoa

⁵Kua tuhituhia hoki e Mohi, “Ko te tangata e whakarite ana i tā te ture tika, ka ora ia i reira.”⁶Ko te kupu ia tēnei o tō te whakapono tika, “Aua e mea i roto i tōu ngākau, ‘Ko wai hei kake ki te rangi?’ ” Arā, ki te tiki atu i a te Karaiti ki raro.⁷Ko wai rānei hei heke iho ki te hōhonu? Arā, ki te tiki atu i a te Karaiti i roto i te hunga mate.⁸E pēhea ana oti? “E tata ana ki a koe te kupu, kei tōu māngai, kei tōu ngākau.” Ko ia tēnei, ko te kupu o te whakapono e kauwhau nei mātou;⁹arā, ki te whakaae tōu māngai ko Īhu te Ariki, ā, ki te whakapono tōu ngākau nā te Atua ia i whakaara ake i te hunga mate, e ora koe.¹⁰Mā te ngākau hoki kia whakapono ka tika ai; mā te māngai kia whakaae ka ora ai.¹¹E mea ana hoki te karaipiture, “Ko ngā tāngata katoa e whakapono ana ki a ia e kore e meinga kia whakamā.”¹²Kāhore hoki he rerekētanga o te Hūrai, o te Kariki; ā, ko taua Ariki anō te Ariki o te katoa, ā, e hua ana āna taonga ki te hunga katoa e karanga ana ki a ia.¹³“E ora hoki ngā tāngata katoa e karanga ana ki te ingoa o te Ariki.”

¹⁴Nā, me pēhea tā rātou karanga ki a ia, ki te kāhore i whakapono ki a ia? Me pēhea hoki tā rātou whakapono ki a ia, ki te kāhore i rongo ki a ia? Me pēhea hoki e rongo ai, ki te kāhore he kaikauwhau?¹⁵Ā, me pēhea e kauwhau ai, ki te kāhore e tonoa? Ko te mea ia i tuhituhia, “Anō te ātaahua o ngā waewae o te hunga kawe mai i te rongo whakahari o ngā mea papai!”¹⁶Otirā, kāhore rātou katoa i ngohengohe ki ngā rongo whakahari. E mea ana hoki a Ihāia, “E te Ariki, ko wai i whakapono ki tā mātou whakaatu?”¹⁷Inā, nā te rongo te whakapono, ā, ko te rongo nā te kupu a te Karaiti.

¹⁸Otiia, ko tāku kupu tēnei, “Kāhore rānei rātou i rongo?” Koia rā ia,“Kua puta atu tō rātou reo ki te whenua katoa,ā rātou kupu hoki ki ngā tōpito o te ao.”

¹⁹Ko tāku kupu ia tēnei: Kāhore ianei a Īharaira i mōhio? Nā Mohi te kupu tuatahi:“Māku koutou e whakaoho kia haeki te hunga ehara i te iwi;ka meinga e ahau te iwi pōauauhei whakaoho i a koutou ki te riri.”

²⁰Ā, ka māia rawa a Ihāia, ka mea,“Kua kitea ahau e te hunga kīhai i rapu i ahau;kua whakakitea ahau ki te hunga kīhai nei i ui ki ahau.”

²¹Ko tāna kupu ia mō Īharaira,“Pau noa te rā i totoro atu ai ōku ringaki te iwi tutū ki te iwi whakahāwea.”