1Ā, i kite anō ahau i te ringa matau o tērā e noho rā i runga i te torōna, he pukapuka kua oti te tuhituhi a roto, ā, tua hoki, he mea hīri ki ngā hīri e whitu.2Ā, i kite ahau i tētahi anahera kaha e karanga ana, he nui te reo, “Ko wai e tika ana hei whakatuwhera i te pukapuka, hei wāwāhi i ōna hīri?”3Ā, kīhai i taea e tētahi i te rangi, i te whenua rānei, i raro rānei i te whenua, te whewhera i te pukapuka, te titiro rānei ki reira.4Nā, nui atu tōku tangi, nō te mea kīhai i kitea tētahi e tika ana hei whewhera i te pukapuka, hei titiro iho rānei ki reira.5Nā, ka mea mai tētahi o ngā kaumātua ki ahau, “Kaua e tangi, nā, kua riro te wikitōria i te Raiona o te hapū o Hūrā, i te Pūtake o Rāwiri, māna e whakatuwhera te pukapuka, e wāwāhi ōna hīri e whitu.”6Ā, i kite anō ahau, nā, i waenganui o te torōna, o ngā mea ora hoki e whā, i waenganui anō hoki o ngā kaumātua, he Reme e tū ana, te āhua kei tō te mea i whakamatea, e whitu ōna haona, e whitu ngā kanohi; ko ngā wairua e whitu ēnei o te Atua, kua tonoa nei puta noa i te ao.7Nā, ka haere atu ia, ka tango i te pukapuka i roto i te matau o tērā e noho rā i runga i te torōna.8Ā, nō ka tango ia i te pukapuka, ka hinga iho ngā mea ora e whā, me ngā kaumātua e rua tekau mā whā, ki te aroaro o te Reme, he hāpa i tētahi, i tētahi o rātou, me ngā oko kōura kī tonu i ngā mea kakara, ko ngā īnoi ērā a te hunga tapu.9Nā, ka waiata rātou i te waiata hou, ka mea:“Pai tonu koe hei tango i te pukapuka,hei wāhi i ōna hīri;i whakamatea hoki koe,ā, hokona ana mātou e koe hei hunga mā te Atua ki ōu toto,i roto i ngā hapū, i ngā reo,i ngā huihuinga tāngata, i ngā iwi katoa.10Ā, meinga ana rātou e koe hei kīngi,hei tohunga ki tō mātou Atua;ka kīngi anō rātou ki runga ki te whenua.”11Nā, i kite ahau, i rongo hoki ahau i te reo o ngā anahera maha i ngā taha katoa o te torōna, o ngā mea ora hoki, o ngā kaumātua. Nā, ko tō rātou tokomaha kei ngā mano tekau mano tekau, me ngā mano mano;12nui atu tō rātou reo ki te mea mai:“Pai tonu te Reme i whakamateahei tango i te kaha, i te taonga, i te mātauranga,i te mana, i te hōnore, i te korōria, i te whakapai!”13I rongo anō ahau ki ngā mea hanga katoa o te rangi, o te whenua, i raro anō hoki i te whenua, ki ērā hoki i te moana, ki ngā mea katoa o reira, e mea ana,“Waiho atu i tēnei e noho nei i runga i te torōna, i te Reme hoki,te whakapai, te hōnore, te korōria, te kahaā ake ake!”14Nā, ka mea ngā mea ora e whā, “Āmine!” Ā, ka hinga iho ngā kaumātua, ka koropiko.
expand_more
The books couldn't be loaded. Check your connection and try again.