Read Waiata 94

Waiata94

Ko te Atua te Kaiwhakawā o te Katoa

¹E Ihowā, e te Atua, e te kairapu utu;e te Atua, e te kairapu utu, tīaho mai!²E ara, e te Kaiwhakawā o te whenua;hoatu te utu e rite ana ki te hunga whakakake.³Kia pēhea te roa, e Ihowā, o te hunga kino nei,kia pēhea te roa o te hunga kino e whakamanamana ana?

⁴Kei te kōrero whakatū rātou, kei te kōrero whakahī;kei te kōrero whakapehapeha ki a rātou ngā kaimahi katoa i te kino.⁵Mongamonga noa tāu iwi i a rātou e Ihowā;e tūkinotia ana e rātou tōu kāinga tupu.⁶E patua ana e rātou te pouaru, te manene;e kōhuru ana i te pani,⁷ā, e mea ana, “E kore a Ihowā e kite;e kore e maharatia e te Atua o Hākopa.”

⁸Kia mātau, e ngā pōauau o te iwi;āhea anō koutou whai mahara ai, e ngā kūware?⁹Ko te kaiwhakatō o te taringa, e kore rānei ia e rongo?Ko te kaihanga o te kanohi, e kore ianei ia e kite?¹⁰Ko te kaipapaki o ngā iwi e kore rānei ia e papaki,arā ko te kaiwhakaako nei i te tangata kia mōhio?¹¹E mātau ana a Ihowā ki ngā whakaaro o te tangata,he mea teka noa.

¹²Ka hari te tangata e pākia ana e koe, e Ihowā;e whakaakona ana i roto i tāu ture.¹³Kia mārie ai tōna ngākau i a koe i ngā rā o te hē,ā, keria noatia iho te poka mō te tangata kino.¹⁴E kore hoki a Ihowā e panga i tāna iwi,e kore anō e whakarere i tōna kāinga tupu.¹⁵Engari e hoki te whakawā ki te tika;ā, e arumia e ngā tāngata ngākau tika katoa.

¹⁶Ko wai tōku hei whakatika ake ki te hunga kino?Ko wai tōku hei tū ake ki ngā kaimahi i te hara?¹⁷Mehemea kaua a Ihowā hei āwhina mōku,pēnei kua noho kupukore noa atu tōku wairua.¹⁸I tāku meatanga, “Ka paheke tōku waewae,”nā tāu mahi tohu, e Ihowā, ahau i tautoko ake.¹⁹I ōku whakaaronga maha i roto i tōku ngākauko āu whakamārie tōku oranga ngākau.

²⁰Tērā rānei e whakahoa ki a koe te torōna o te kino,e whakatakoto nei i te mahi nanakia hei ture?²¹Kei te whakahuihui rātou ki te poke i te wairua o te tangata tika,e mea ana kia heke te toto harakore.²²Ko Ihowā ia tōku pā teko;ko tōku Atua hei kōhatu piringa mōku.²³Ā, nāna i whakahoki tō rātou kino ki runga ki a rātou,ā, tērā ia e whakangaro i a rātou i roto i ō rātou kino;mā Ihowā, mā tō tātou Atua rātou e whakangaro.