Read Ruka 1

Ruka1

¹Nā, i te mea he tokomaha kua anga ki te whakakaupapa i te kōrero o ngā mea kua whakatutukitia nei i waenganui i a tātou.²He mea whakarite ki ngā mea i hōmai ki a tātou e te hunga i kite ā-kanohi, i mahi hoki i te kupu.³Koia ahau i mahara ai, i te mea kua āta whakatakina iho e ahau ngā mea katoa i te tīmatanga mai, kia tuhituhi whakatepe atu ki a koe, e Tiopira, e te tangata pai rawa,⁴kia mātau ai koe ki te tūturutanga o ngā mea i whakaakona ai koe.

Ka Pānuitia te Whānautanga o Hoani Kaiiriiri

⁵Nō mua, nō ngā rā o Herora kīngi o Hūria, tērā tohunga, ko Hakaraia te ingoa, nō te wiki o Āpiata. Ko tāna wahine hoki nō ngā tamāhine a Ārona, ko Erihāpeti tōna ingoa.⁶He hunga tika hoki rāua i te aroaro o te Atua, kāhore he hē o tā rāua haere i runga i ngā kupu ako katoa, i ngā tikanga a te Ariki.⁷Nā, kāhore ā rāua tamariki, he pākoko hoki a Erihāpeti, ā, i taua wā kua maha haere rawa ngā rā o tētahi, o tētahi.

⁸Nā, tūpono tonu, i a ia e mahi ana i ā te tohunga mahi i te aroaro o te Atua i te takanga o tāna wiki,⁹e whakarite ana i ngā ritenga a ngā tohunga, ka taka māna te haere ki roto ki te whare tapu o te Ariki, tahu ai i te whakakakara.¹⁰Nā, i waho te nuinga katoa o te iwi e īnoi ana i te hāora whakakakara.

¹¹Ā, ka puta mai ki a ia tētahi anahera a te Ariki e tū ana i te taha matau o te āta whakakakara.¹²Nā, ka ohorere a Hakaraia i tōna kitenga i a ia, ā, tau ana te wehi ki a ia.¹³Otirā, ka mea te anahera ki a ia, “Kaua e wehi, e Hakaraia. Kua rangona hoki tāu īnoi, ā, ka whānau i tāu wahine, i a Erihāpeti, he tama māu, ā, ka huaina e koe tōna ingoa ko Hoani.¹⁴Ā, ka whiwhi koe i te hari me te harakoa; ā, he tokomaha hoki e hari i tōna whānautanga.¹⁵E nui hoki ia i te aroaro o te Atua. E kore ia e inu i te wāina, i te wai whakahaurangi rānei; ā, ka kī ia i te Wairua Tapu, mai anō o te kōpū o tōna whaea.¹⁶He tokomaha anō hoki o ngā tama a Īharaira ka whakatahuritia e ia ki te Ariki, ki tō rātou Atua.¹⁷Ka haere anō ia i tōna aroaro i runga i te wairua, i te mana, o Irāia, hei whakatahuri i ngā ngākau o ngā mātua ki ngā tamariki, i te hunga whakatuturi ki ngā whakaaro o te hunga tika; hei whakarite mō te Ariki i tētahi iwi i āta takā mōna.”

¹⁸Nā, ko te meatanga a Hakaraia ki te anahera, “Mā te aha ka mātau ai ahau ki tēnei mea? He koroheke nei hoki ahau, kua maha haere hoki ngā rā o tāku wahine.”

¹⁹Nā, ka whakahoki te anahera, ka mea ki a ia, “Ko Kapariera ahau, kei te aroaro o te Atua tōku tūranga; kua tonoa mai hoki ahau ki te kōrero ki a koe ki te whakapuaki i tēnei rongo pai ki a koe.²⁰Nanā, ka noho puku koe, kāhore hoki e puta te kōrero i a koe, kia tae mai rā anō te rā e meatia ai ēnei mea, mōu kīhai i whakapono ki āku kupu, ka mana nei i te wā e rite ai.”

²¹Ā, tatari tonu te iwi ki a Hakaraia, me te mīharo anō i a ia e whakaroa ana i roto i te whare tapu.²²Ā, i tōna putanga mai ki waho, kīhai ia i āhei te kōrero ki a rātou; ā, ka mōhio rātou kua kite ia i tētahi putanga atua ki a ia i roto i te whare tapu. Hono tonu tāna waitohu ki a rātou me te wahangū anō.

²³Ā, ka rite ngā rā hei minitatanga māna, ka hoki ia ki tōna whare.²⁴Nā, muri iho i aua rā ka hapū tāna wahine, a Erihāpeti, ā, e rima ngā marama i whakangaro ai i a ia, ā, i mea ia,²⁵“Ko tā te Ariki tēnei i mea ai ki ahau, i ngā rā i titiro mai ai ia, ki te whakamutu i tōku tāwainga i roto i ngā tāngata.”

Ka Pānuitia te Whānautanga o Īhu

²⁶Nā, i te ono o ngā marama ka tonoa a Kapariera, te anahera, e te Atua ki tētahi pā o Karirī, ko Nahareta te ingoa,²⁷ki tētahi wāhina i taumautia mā tētahi tangata, ko Hōhepa te ingoa, nō te whare o Rāwiri; ko te ingoa o te wāhina ko Meri.²⁸Nā, ko tōna haerenga ki roto, ki a ia, ka mea, “Tēnā koe, e te wahine kua manakohia nei; kei a koe te Ariki, ko koe te manaakitia i roto i ngā wāhine.”

²⁹Otirā, he nui tōna oho ki taua kupu, ka whakaaroaro ki te tikanga o tēnei ohatanga.³⁰Nā, ka mea te anahera ki a ia, “Kei wehi koe, e Meri; kua paingia hoki koe e te Atua.³¹Nanā, tērā koe e hapū, ka whānau he tama, ā, ka huaina e koe tōna ingoa ko Īhu.³²Ka nui ia, ka kīia hoki ko te Tama a te Runga Rawa; ā, ka hoatu ki a ia e te Ariki, e te Atua, te torōna o Rāwiri, o tōna pāpā.³³Hei kīngi hoki ia mō te whare o Hākopa ake ake; e kore anō e mutu tōna rangatiratanga.”

³⁴Nā, ka mea a Meri ki te anahera, “E pēheatia tēnei, kāhore nei hoki ahau e mōhio ki te tāne?”

³⁵Nā, ka whakahoki te anahera, ka mea ki a ia, “Ka tae te Wairua Tapu ki runga ki a koe, ka taumarumaru iho te kaha o te Runga Rawa ki runga ki a koe; nō reira hoki ka kīia te mea e whānau mai he tapu, ko te Tama a te Atua.³⁶Nā, ko tōu whanaunga, ko Erihāpeti, kua hapū hoki ia i tōna rūruhitanga, he tama; ā, ko te ono tēnei o ngā marama ki a ia, i kīia rā he pākoko.³⁷Kāhore hoki he kupu i ahu mai i te Atua i kore e whai mana!”

³⁸Anō rā ko Meri, “Inā, te pononga a te Ariki; kia pērātia ahau me tāu i kōrero ai.” Ā, mawehe atu ana te anahera i a ia.

Ka Tono a Meri i a Erihāpeti

³⁹Nā, ka whakatika a Meri i aua rā, ā, haere kaikā ana ki te whenua pukepuke ki tētahi pā o Hūrā;⁴⁰ā, ka tomo ki te whare o Hakaraia, ka oha ki a Erihāpeti.⁴¹Ā, nō te rongonga o Erihāpeti, i te oha a Meri, ka koiri te tamaiti i roto i tōna kōpū; nā, kua kī a Erihāpeti i te Wairua Tapu.⁴²Ā, he nui tōna reo ki te karanga, ka mea, “Ka manaakitia koe i roto i ngā wāhine, ka manaakitia anō te hua o tōu kōpū.⁴³Nō hea hoki tēnei ki ahau, kia haere mai te whaea o tōku Ariki ki ahau?⁴⁴Nā, pā kau mai te reo o tāu oha ki ōku taringa, ka oho te tamaiti i tōku kōpū i te hari.⁴⁵Ka koa anō ia e whakapono ana, ka whakaritea hoki ngā mea i kōrerotia ki a ia e te Ariki.”

Te Waiata Whakawhetai a Meri

⁴⁶Ā, ka mea a Meri,“Ka whakanui tōku wairua i te Ariki;⁴⁷e hari ana tōku wairua ki te Atua, ki tōku Kaiwhakaora;⁴⁸mōna i titiro ki te iti o tāna pononga;tā te mea hoki kātahi ahau ka kīia e ngā whakatupuranga katoae haere ake nei, he wahine hari.⁴⁹He nui hoki ngā mahi a te Mea Kaha ki ahau.He tapu hoki tōna ingoa;⁵⁰he mahi tohu tāna ki te hunga e wehi ana ki a ia,ki tēnei whakatupuranga, ki tēnei whakatupuranga.⁵¹Kua whakaputaina he kaha e ia, arā e tōna ringa;nāna te hunga whakakake i marara ai, i te whakaaro o ō rātou ngākau.⁵²Kua whakatakā e ia ngā piriniha i ō rātou torōna,ā, whakateiteitia ake ana te hunga iti.⁵³Kua whakakīia e ia te hunga mate hiakai ki ngā mea pai;kua tonoa kautia atu te hunga taonga.⁵⁴Kua tautokona e ia a Īharaira, tāna pononga,he whakamahara hoki ki tāna mahi tohu.⁵⁵Ki a Āperahama rātou ko tāna whānau ake tonu atu,pērā hoki me tāna i kōrero ai ki ō tātou mātua.”

⁵⁶Nā, tata tonu ki te toru marama a Meri e noho ana ki a ia, ā, hoki ana ki tōna whare.

Te Whānautanga o Hoani Kaiiriiri

⁵⁷Ā, ka rite te tāima o Erihāpeti, e whānau ai; nā, ka whānau he tama.⁵⁸Ā, ka rongo te hunga e noho tata ana, me ōna whanaunga, kua whakanuia e te Ariki tōna aroha ki a ia; nā, ka hari tahi me ia.

⁵⁹Ā, i te waru o ngā rā ka haere mai rātou ki te kokoti i te tamaiti; ka mea kia huaina e rātou ko Hakaraia, ko te ingoa o tōna pāpā.⁶⁰Nā, ka whakahoki tōna whaea, ka mea, “Kāhore; engari me hua ia ko Hoani.”

⁶¹Nā, ko tā rātou meatanga ki a ia, “Arā, kāhore tēnei ingoa i huaina ki tētahi o ōu whanaunga.”⁶²Nā, ka ui rātou ki tōna pāpā, he mea waitohu, ko wai tāna e pai ai kia huaina ki a ia.

⁶³Ka mea ia ki tētahi papa tuhituhi, ā, ka tuhituhi, ka mea, “Ko Hoani hei ingoa mōna.” Ā, mīharo ana rātou katoa.⁶⁴Nā, whai reo tonu iho tōna māngai, ka matara tōna arero, ka kōrero ia, ka whakapai ki te Atua.⁶⁵Ā, tau ana te wehi ki te hunga katoa e noho tata ana ki a rātou, ka kōrerotia ēnei mea katoa puta noa i te whenua pukepuke katoa o Hūria.⁶⁶Nā, ka rongoātia ēnei mea e te hunga katoa i rangona ai ki roto ki ō rātou ngākau, ka mea, “He tamaiti aha ianei tēnei?” I a ia hoki te ringa o te Ariki.

Te Poropititanga a Hakaraia

⁶⁷Nā, kua kī a Hakaraia, tōna pāpā, i te Wairua Tapu, ka poropiti, ka mea:⁶⁸“Kia whakapaingia te Ariki, te Atua o Īharaira!Kua titiro mai hoki ia, kua hoko i tāna iwi.⁶⁹Kua whakaarahia ake e ia he haona whakaora mō tātou,i roto i te whare o Rāwiri, o tāna pononga.⁷⁰Ko tāna hoki ia i kōrerotia e te māngai o āna poropiti tapu,nō te tīmatanga mai anō o te ao;⁷¹hei whakaora i a tātou i ō tātou hoa whawhai,i te ringa anō o te hunga katoa e kino ana ki a tātou;⁷²hei whakaputa i te mahi tohu ki ō tātou tūpuna,hei whakamahara ki tāna kawenata tapu.⁷³Ki te oati i oati ai ia ki a Āperahama, ki tō tātou tupuna,⁷⁴kia tukua mai e ia ki a tātouhe ora i te ringa o ō tātou hoa whawhai,kia mahi wehikore tātou ki a ia,⁷⁵i runga i te tapu, i te tika, ki tōna aroaro,i ngā rā katoa e ora ai tātou.

⁷⁶“Ā, ko koe, e tama, ka kīia ko te poropiti a te Runga Rawa.E haere hoki koe i te aroaro o te Ariki,hei whakapai i ōna ara;⁷⁷hei whakamātau i tāna iwi ki te ora,i ō rātou hara e murua ana.⁷⁸He mea hoki nā te aroha, nā te mahi tohu a tō tātou Atua;nā reira hoki i puta mai ai te pūaotanga o runga ki a tātou,⁷⁹hei whakamārama i te hunga e noho ana i te pōuri,i te ātārangi hoki o te mate,hei whakatika i ō tātou waewae ki te huarahi o te rangimārie.”

⁸⁰Nā, ka tupu taua tamaiti, ā, ka kaha haere tōna wairua; ā, noho ana i ngā koraha, taea noatia te rā e whakakitea ai ia ki a Īharaira.