1Whakamārietia, whakamārietia tāku iwi,e ai tā tō koutou Atua.2Kōrero i runga i te whakamārie ki Hiruhārama,karanga ki a ia,kua mutu tāna whawhai,kua murua tōna hē;i haere rua hoki tā te ringa o Ihowāki a ia hei utu mō ōna hara katoa.3He reo nō tētahi e karanga ana:“Whakapaia e koutou i te koraha te huarahi o Ihowā,whakatikaia i te tītōhea he ara nui mō tō tātou Atua.4Ko ngā raorao katoa ka whakarewaina ake,ko ngā maunga katoa me ngā pukepuke, ka whakapāpakutia iho;ko ngā wāhi kōpikopiko ka meinga kia tika,ko ngā wāhi taratara kia papatairite.5Ka whakapuakina anō te korōria o Ihowā,ā, ka kite ngātahi ngā kikokiko katoa;he mea kōrero hoki tēnei nā te māngai o Ihowā.”6I mea mai te reo o tētahi, “Karanga!”Ā, ka mea tētahi, “Ko te aha kia karangatia e ahau?”“He tarutaru ngā kikokiko katoa,ā, ko tōna pai katoa, rite tonu ki te puāwai o te pārae.7Ko te tarutaru ka maroke, ko te puāwai ka memenge,nō te mea e hāngia ana e te Wairua o Ihowā;he pono, he tarutaru te iwi.8Ko te tarutaru e maroke, ko te puāwai e memenge;ko te kupu ia a tō tātou Atua, tū tonu.”9E koe, e te kaikawe o te rongo pai ki Hiona,e piki ki te maunga tiketike.E koe, e te kaikawe o te rongo pai ki Hiruhārama,whakaarahia tōu reo, kia kaha;whakaarahia, kaua hei wehi;kōrero atu ki ngā pā o Hūrā,“Nanā, tō koutou Atua!”10Nanā, ka haere mai te Ariki, a Ihowā, i runga i te kaha,ka whakahaerea anō tōna kīngitanga e tōna ringa;nā, ko te utu mōna kei a ia anō,kei tōna aroaro te wāhi māna.11Ka rite ki tā te hēpara tāna whāngai i tāna kāhui,ka whakaminea ngā reme e tōna ringa,ka hikitia ki tōna uma,ka āta ārahina ngā mea e whakangote ana.12Nā wai i mēhua ngā wai ki te kapu o tōna ringa,he whanganga ringaringa anō tāna rūri mō ngā rangi.Whaowhina ake e ia te puehu o te whenua ki te mēhua,ko ngā maunga, pāunatia ana e ia ki te pāuna ringaringa,ko ngā pukepuke ki te pāuna papa?13Nā wai tā te Wairua o Ihowā i tika ai?Ko wai rānei tāna kaiwhakatakoto whakaaro hei whakaako i a ia?14Ko wai tōna hoa whakatakoto whakaarohei tohutohu i a ia ki te ara o te whakawā,hei whakaako i a ia ki te mātauranga,hei whakakite i te ara o te mōhio ki a ia?15Nanā, ko ngā iwi, ānō he pata wai i roto i te pere!Ki tā te whakaaro he puehu ririki rātou i te pāuna;nanā, ko ngā motu, maua ake e ia, he mea ririki rawa te rite.16E kore anō e ranea a Repanōna mō te ahi,me ngā kararehe hoki o reira, e kore e ranea hei tahunga tinana.17Ko ngā iwi katoa, he kore noa iho i tōna aroaro;iti iho rātou i te kāhore,he horihori kau i tōna whakaaro.18Nā, ka whakaritea e koutou te Atua ki a wai?He aha hoki te āhua e whakaahuatia ai ia e koutou?19Ko te whakapakoko, nā te kaimahi ia i whakarewa,nā te kaitahu i whakakikorua ki te kōura,ā, hangā ana mō reira he mekameka hiriwa.20Ko te tangata, he rawakore rawa ia ki te hoatu whakahere pērā,whiriwhiria ana e ia he rākau e kore e pirau;rapua ana e ia he kaimahi mōhio māna,hei hanga i tētahi whakapakoko e kore e nekenekehia.21Kāhore ianei koutou i mōhio?Kāhore koutou i rongo?Kāhore ianei i kōrerotia ki a koutou i te tīmatanga?Kāhore ianei koutou i mātau i ngā whakatūranga rā anō o te whenua?22Ko ia te noho ana i runga i te porohita o te whenua,ā, ko ō reira tāngata, ānō he māwhitiwhiti;ko ngā rangi, horahia ana e ia ānō he kākahu tauārai,horahia ana e ia ānō he tēneti hei nohoanga;23ko ngā rangatira, whakahokia iho e ia ki te kāhore;ko ngā kaiwhakawā o te whenua,meinga ana e ia hei mea horihori noa iho.24Āe rā, kāhore rātou i whakatōkia;āe rā, kāhore rātou i ruia;āe rā, kāhore tō rātou take i whai pakiaka ki te whenua;ka pupuhi hoki ia ki a rātou, ā, ka maroke rātou;ka rite ki te kakau wīti, ka kāwhakina e te paroro.25“Nā, ki tā koutou, kei tō wai he āhua mōku?Ka rite rānei ahau ki a wai?” e ai tā te Mea Tapu.26E ara ō koutou kanohi ki runga titiro ai:Nā wai ēnei mea i hanga?Nā wai ō rātou mano i whakaputa mai he mea tatau tonu;karangatia ana e ia ngā ingoa o rātou katoa,māroro rawa, pakari tonu te kaha;e kore tētahi e ngaro.27He aha koe i kōrero ai, e Hākopa,i mea ai, e Īharaira,“Kua hunā tōku ara ki a Ihowā,kua mahue i tōku Atua tōku whakawā”?28Kāhore koe i mōhio?Kāhore koe i rongo,ko te Atua onamata, ko Ihowā,ko te Kaihanga o ngā pito o te whenua.E kore ia e ngenge, e kore ia e māuiui?E kore tōna mātauranga e taea te rapu.29E hōmai ana e ia he kaha ki te hunga ngenge;ā, whakanuia ana e ia te pakari o te mea ngoikore.30Ahakoa ko ngā taitamariki, ka ngenge tonu, ka māuiui,ā, ko ngā taitama, ka hinga rawa.31Tēnā ko te hunga e tatari ana ki a Ihowā,puta hou ana he kaha mō rātou;kake ana rātou ki runga; ko ngā parirau, koia ānō kei o ngā ēkara;ka rere rātou, ā, e kore e māuiui;ka haere, ā, e kore e ngenge.
expand_more
The books couldn't be loaded. Check your connection and try again.