Read Ehekiera 32

Ehekiera32

He Tangi mō Parao me Īhipa

¹Nā, i te tekau mā rua o ngā tau, i te tekau mā rua o ngā marama, i te tuatahi o ngā rā o te marama, ka puta mai te kupu a Ihowā ki ahau, i mea:²“E te tama a te tangata, kia ara tōu tangi mō Parao kīngi o Īhipa, mea atu hoki ki a ia:Ko tōu rite kei te kūao raiona o ngā iwi;otiia, e rite ana koe ki te tarakona o ngā moana;i kōkiri mai anō koe me ōu awa,pōkarekare ana ngā wai i ōu waewae,poke ana i a koe ō rātou awa.”

³Ko te kupu tēnei a te Ariki, a Ihowā:“Ka horahia e ahau tāku kupenga ki runga ki a koe,he huihuinga hoki nō ngā iwi maha;ā, ka riro ake koe i a rātou i tāku kupenga.⁴Ka waiho anō koe e ahau ki runga ki te whenua,ka ākiritia atu anō koe ki te mata o te pārae,māku anō e mea kia nohoia koe e ngā manu katoa o te rangi,kia mākona anō ngā kīrehe o te whenua katoa i a koe.⁵Ka takoto anō i ahau ōu kikokiko ki runga ki ngā maunga,ka whakakīia anō ngā awaawa ki a koe e tiketike nā.⁶Ka whakamākūkūria anō e ahau ki ōu toto te whenua e kau nā koe,ā, tutuki noa ki ngā maunga;ka kī anō hoki ngā awa i a koe.⁷Ā, ka oti koe te tinei e ahau,ka hīpokina e ahau te rangi,ka whakapōuritia anō hoki ngā whetū o reira;ka hīpokina e ahau te rā ki te kapua,e kore anō e titi te atarau.⁸Nā, ko ngā whakamārama katoa e mārama nei te rangi,ka whakapōuritia e ahau ki runga ki a koe,ka hoatu anō e ahau he pōuri ki runga ki tōu whenua,e ai tā te Ariki, tā Ihowā.⁹He maha anō ngā iwi e mamae ō rātou ngākau i ahau,ina meinga e ahau kia tae atu tōu whakangaromanga ki ngā iwi,ki ngā whenua kīhai i mōhiotia e koe.¹⁰Inā, he maha ngā iwi e meinga e ahau kia ketekete ki a koe,ka nui anō te wehi o ō rātou kīngi, ina whakaaro ki a koe.Ua wherikoriko tāku hoari ki tō rātou aroaro,hono tonu anō tō rātou wiri, ia tangata, ia tangata,i te wehi mō tōna oranga anō,i te rā e hinga ai koe.

¹¹“Nō te mea ko te kupu tēnei a te Ariki, a Ihowā:Tērā e tae atu te hoari a te kīngi o Papurōna ki a koe.¹²Ka meinga e ahau ōu mano tini,te hunga nanakia o ngā iwi,rātou katoa kia hinga i ngā hoari a ngā mārohirohi.Ā, ka pāhuatia e rātou ngā mea whakaī o Īhipa,ka ngaro anō ō reira mano tini katoa.¹³Ka ngaro anō i ahau ō reira kararehe katoai te taha o ngā wai maha;e kore anō e pōkarekare i te wae tangata ā muri ake nei,e kore anō e ngarungaru i te wae kararehe.¹⁴Ko reira ahau mea ai i ō rātou wai kia purata,ka meinga anō e ahau ō rātou awa kia rite ki te hinu te rere, e ai tā te Ariki, tā Ihowā.¹⁵Kia meinga e ahau te whenua o Īhipa hei ururua,ā, kore iho ngā tini mea o te whenua,kia patua anō e ahau te hunga katoa e noho ana i reira,kātahi rātou ka mōhio ko Ihowā ahau.

¹⁶“Ko te tangi tēnei e tangihia ai ia e rātou, ka tangihia ia e ngā tamāhine a ngā iwi. Ka tangihia ia e rātou, arā a Īhipa rātou ko ōna mano tini, e ai tā te Ariki, tā Ihowā.”

He Apakura mō Īhipa

¹⁷Nā, i te tekau mā rua o ngā tau, i te tekau mā rima o ngā rā o te marama, ka puta mai te kupu a Ihowā ki ahau, i mea:¹⁸“E te tama a te tangata, auē ki te mano tini o Īhipa, makā iho rātou, a ia, me ngā tamāhine a ngā iwi nunui, ki ngā wāhi o raro rawa o te whenua, rātou ko te hunga e heke ana ki te rua.¹⁹‘He ātaahua rawa koe i a wai? Heke iho, takoto tahi koutou ko te hunga kokotikore.’²⁰Ka hinga rātou ki waenga i te hunga i patua ki te hoari. Kua tukua atu ia ki te hoari; tōia atu me ōna mano tini katoa.²¹Ka kōrero mai ngā tāngata kaha o ngā mārohirohi ki a ia i roto i te rēinga, rātou ko ōna kaiāwhina: ‘Kua heke rātou ki raro, kei te takoto rātou, te korikori, arā ngā kokotikore, he mea patu ki te hoari.’

²²“Kei reira anō a Ahuru rātou ko tōna hui katoa; ko ōna urupā, kei tētahi taha ōna, kei tētahi taha; he mea patu katoa, kua hinga i te hoari.²³Ko ōna urupā, he mea mahi ki ngā pito rawa o te rua. Ko tōna rōpū anō kei tētahi taha o tōna urupā, kei tētahi taha; he mea patu katoa rātou, kua hinga i te hoari, te hunga i puta ai te wehi ki te whenua o te hunga ora.

²⁴“Kei reira a Erama, rātou ko ōna mano tini i tētahi taha o tōna urupā, i tētahi taha. Ko rātou katoa he mea patu, kua hinga i te hoari, he hunga kua heke kokotikore atu ki ngā wāhi o raro rawa o te whenua, he hunga i mea i tō rātou wehi kia puta ki te whenua o te hunga ora. Heoi, kei te mau te whakamā o rātou, o te hunga anō e heke ana ki te rua.²⁵Kua hangā te takotoranga mōna ki roto ki te hunga i patua, mō rātou anō ko ōna mano tini katoa. Ko ōna urupā kei tētahi taha ōna, kei tētahi taha; he kokotikore rātou katoa, he mea patu ki te hoari. I puta hoki tō rātou wehi ki te whenua o te hunga ora, heoi kua mau te whakamā o rātou, o te hunga anō e heke ana ki te rua; kua tukua atu ia ki roto ki te hunga i patua.

²⁶“Kei reira a Meheke, a Tūpara, rātou ko ōna mano tini katoa; ko ōna urupā kei tētahi taha ōna kei tētahi taha, he mea kokotikore rātou katoa, he mea patu ki te hoari; i puta anō tō rātou wehi i mua ki te whenua o te hunga ora.²⁷E kore anō rātou e takoto i roto i ngā mārohirohi o ngā kokotikore kua hinga, kua heke ki te rēinga me ā rātou patu anō o te whawhai. I whakatakotoria anō e rātou ā rātou hoari ki raro i ō rātou māhunga, ā, kei te mau ō rātou kino ki ō rātou wheua; ko te hunga hoki tēnā i wehi ai ngā mārohirohi o te whenua o te ora.

²⁸“Otiia, ka whatia koe i roto i te hunga kokotikore, ka takoto tahi hoki koutou ko te hunga i patua ki te hoari.

²⁹“Kei reira a Ēroma, ōna kīngi, ōna rangatira katoa i tukua nei i runga i tō rātou mārohirohi ki roto ki te hunga i werohia e te hoari. Ka takoto tahi rātou ko ngā kokotikore, rātou anō ko te hunga e heke ana ki te rua.

³⁰“Kei reira ngā ariki o te raki, rātou katoa, me ngā Haironi katoa i heke nei i roto i te hunga i patua; whakamā iho rātou i te wehi i tupu mai i tō rātou mārohirohi, ā, takoto kokotikore ana rātou i roto i te hunga i patua ki te hoari, me te mau te whakamā o rātou, o te hunga anō e heke ana ki te rua.

³¹“E kite a Parao i a rātou, ā, ka whai whakamārietanga ki āna mano tini katoa i patua ki te hoari – a Parao rātou ko tāna ope katoa, e ai tā te Ariki, tā Ihowā.³²Nō te mea kua tukua e ahau tōna wehi ki te whenua o te hunga ora; ā, ka whakatakotoria ia ki roto ki te hunga kokotikore, rātou ko te hunga i patua ki te hoari – a Parao rātou ko āna mano tini, e ai tā te Ariki, tā Ihowā.”