Read Ehekiera 30

Ehekiera30

Te Tangi mō Īhipa

¹I puta mai anō te kupu a Ihowā ki ahau, i mea:²“E te tama a te tangata, poropiti, mea atu, Ko te kupu tēnei a te Ariki, a Ihowā:Auē koutou, ‘Taukiri e, taua rā nei!’³Kua tata mai hoki te rā,te rā o Ihowā kua tata mai,he rangi tukupū,ko te wā ia o ngā iwi.⁴Ā, ka tae mai te hoari ki Īhipa,ka nui anō te mamae o Etiopia,ina hinga ngā tūpāpaku ki Īhipa;ā, ka riro atu i ā rātou ōna mano,ka wāhia hoki ōna tūranga.

⁵Ko Etiopia, ko Putu, ko Ruru, ko te iwi whakauru katoa, ko Kupu, ko ngā tāngata anō o te whenua o te kawenata, ka hinga ngātahi rātou i te hoari.⁶Ko te kupu tēnei a Ihowā:Ka hinga anō ngā kaiāwhina o Īhipa;ka riro iho anō te whakapehapeha o tōna kaha;ka hinga rātou i te hoari i reira,i te taumaihi atu o Hewene,e ai tā te Ariki, tā Ihowā.

⁷“Ka noho kau noa iho rātou i waenganui o ngā whenua tūhea,ka tū anō ōna pā i waenganui i ngā pā kua ururuatia.⁸Ā, ka mōhio rātou ko Ihowā ahau,ina tukua e ahau he ahi ki Īhipa,ina whakamōtītia ōna kaiāwhina katoa.

⁹“I taua rā ka haere atu ngā karere i tōku aroaro i runga i ngā kaipuke, ki te whakawehi i ngā Etiopiana kāhore nei e ohooho. Ka nui anō tō rātou mamae, ka rite ki tō te rā o Īhipa; nanā, te haere mai nei!

¹⁰“Ko te kupu tēnei a te Ariki, a Ihowā:Ka meinga anō e ahau te ringa o Nepukareha kīngi o Papurōnahei whakamutu i ngā mano tini o Īhipa.¹¹Ka kawea mai ia, rātou anō ko tōna iwi,ko te hunga nanakia o ngā iwi, ki te huna i te whenua.Ka maunu anō ā rātou hoari ki Īhipa,ā, ka kapi te whenua i te tūpāpaku.¹²Ka maroke anō ngā awa i ahau,ka hokona atu anō te whenua ki te ringa o te hunga kino.Ka ururua anō i ahau te whenua, me ōna tini mea,mea rawa ki te ringa o ngā tautāngata;nāku, nā Ihowā te kupu.

¹³“Ko te kupu tēnei a te Ariki, a Ihowā:Ka ngaro i ahau ngā whakapakoko,ka mutu anō i ahau ngā whakaahua o Nopo.Kore ake e mea mai he rangatira i te whenua o Īhipa;ka tukua anō e ahau he wehi ki te whenua o Īhipa.¹⁴Ka ururua anō i ahau a Pātoro,ka tukua he ahi ki Toana,ka mahia anō e ahau he whakawā ki Nō.¹⁵Ka ringihia anō e ahau tōku weriweri ki Hini,ki tō Īhipa kaha;ka hātepea atu anō e ahau ngā mano tini o Nō.¹⁶Ka tukua anō e ahau he ahi ki Īhipa;ka nui noa atu te mamae o Hini,ka haehaea pūtia a Nō;ka whai hoariri anō a Nopo i ia rā, i ia rā.¹⁷Ka hinga ngā taitama o Āwene, o Pipehete i te hoari;ā, ka riro ēnei pā i te whakarau.¹⁸Ka whakapōuritia anō te rā ki Tehapaneheina pakaru i ahau ngā ioka o Īhipa ki reira;ā, ka mutu i roto i a ia te whakapehapeha o tōna kaha.Ko ia anō ka taupokina e te kapua,ka riro āna tamāhine i te whakarau.¹⁹Heoi, ka mahia e ahau he whakawā ki Īhipa;ā, ka mōhio rātou ko Ihowā ahau.”

He Kauwhautanga ki a Parao

²⁰Nā, i te tekau mā tahi o ngā tau, i te marama tuatahi, i te whitu o ngā rā o te marama, ka puta te kupu a Ihowā ki ahau, i mea:²¹“E te tama a te tangata, kua whati i ahau te ringa o Parao kīngi o Īhipa; nanā, kāhore i takaia hei meatanga iho mō te rongoā, kāhore i meatia iho te tākai hei takai, e kaha ai ki te pupuri hoari.²²Mō reira ko te kupu tēnei a te Ariki, a Ihowā: Nanā, hei hoariri ahau mō Parao kīngi o Īhipa, ka whati anō i ahau ōna ringa, te mea kaha, te mea anō i whati; ka meinga anō e ahau te hoari kia marere i tōna ringa.²³Ka marara anō i ahau ngā Īhipiana ki roto ki ngā tauiwi, ka tītaria ki ngā whenua.²⁴Ka kaha anō i ahau ngā ringa o te kīngi o Papurōna, ka hoatu anō e ahau tāku hoari ki tōna ringa; ka whati ia i ahau ngā ringa o Parao, ā, nō te tangata i werohia ngā auē e auē ai ia ki tōna aroaro.²⁵Ā, ka kaha i ahau ngā ringa o te kīngi o Papurōna, ā, ka tukua iho ngā ringa o Parao; ā, ka mōhio rātou ko Ihowā ahau, ina hoatu e ahau tāku hoari ki te ringa o te kīngi o Papurōna, ā, ka whakatorona atu e ia ki runga ki te whenua o Īhipa.²⁶Ka marara anō i ahau ngā Īhipiana ki roto ki ngā iwi, ka tītaria ki ngā whenua; ā, ka mōhio rātou ko Ihowā ahau.”