O Yohanes15
1O Yesus wotemoli, <<Ngoi neena harage de o anggur ma gou-goungu ma roehe, de 'ai Dea una geena harage de ma anggur ma baili ma dutu.2Moi-moi o anggur ma jaga nage Ngoio'a ge 'aihowo-howo'ua geena 'ai Dea waoto, de ma jaga nage 'ihowo-howo'o geena 'ai Dea wodeberehi, la ma howo'o 'iholoioli 'ilepe.3Ngini nioberehio'au hababu o do-doto'o nage tini'ula-'ula'au ngini'a.4Ngini halingou tatapu niorimoi de Ngoi, de Ngoi tatapu torimoi de de ngini. Harage de o 'angguroli na'o 'a ma jaga geena 'aidadiwa ihowo'o. Ho na'o 'imau 'ihowo'o geena halingou 'uwa 'imahipidili ma roeho'a. 'Ogeenali de ngini idadi niadiai o haala ma owa-owa na'o ngini 'a tatapu niorimoi de de Ngoi.5Ma gou-goungu Ngoi harage de o 'anggur ma roehe, de ngini ma jaga-jaga. O nyawa nage tatapu yorimoi de de Ngoi de Ngoi torimoi de ona, ona geena harage de o angguru ma jagali nage ma howo'o 'a o lepe'a. Hababu 'a de ngoiwa, ngini 'animado-do'oawa.6O nyawa nage 'ayotatapuwa yorimoi de de Ngoi, ma Jou ma Dutu aha wo'iumo harage de ma jaga-jaga ge 'aiba-baragunawa de aha 'itoolenge, geena'a de aha yatoomu ho yaumo o u'u'a.7Na'o ngini tatapu niorimoi de de Ngoi de 'ai do-doto'o naga nia hininga'a, o'iau naga bato niomau, niogaaho'ou 'Ai Dea'a, geena aha nimadama'e.8Na'o ngini niodiai 'ilepe yaowa-owa harage de o jaga-jaga ge ma howo'o 'ilepe geena 'ai Dea wihilamo'o. Ma ngeomo geena, ngini 'igou-goungu niodadi 'ai Ni-nii'i.9Harage 'ai Dea woihibohono Ngoi, 'ogeenali ma Ngoi tinihibohono ngini. Geenau ho 'ai dora ngini'a niohi-hininga de 'uwa nimahimada.10Na'o ngini niodinii'i 'ai pareta moi-moi, ngini tatapu niamao 'ai dora. Harage Ngoi tatapu tamao 'ai Dea awi dora, hababu todinii'i awi pareta moi-moi.11Moi-moi neena Tohingahu ngini'a, la o garago ge naga Ngoio'a ngini ma niamaoli, de tingini nia garago idadi 'itotomo.12Neenadau tinihulo-ulo'o geena la: Nima'adora moi de moi, harage Ngoi tinidora ngini'a.13O dora nage iholoi 'iamo'o geena la yo'ihihalamata manga manai hiadono ngaro yohongene ma 'ayomode'e.14Ngini geena to ngoi 'ai ma-manai, na'o la ngini niodinii'i 'ai pareta.15Ngini 'atinihi'aho'uawau 'ai gilaongo, hababu o gilaongo 'ayana'owa o'iau nage naga manga tuanga awi di-dibanga. Ngini tinihiaho'o o giamanai, hababu moi-moi nage toihenino 'ai Dea'a, tohingahuo'au ngini'a.16'A nginiwa niili'i Ngoi, ma ena ngoi tiniili'i ngini de tinihulo'o niotagi niadiai 'ai 'arajaanga la de ma howo'o'a, de ma howo'o ge itongohono 'ahiado-adoni'a. La 'ai Dea aha niwi'ula o'iau naga bato nioga'aho'o una'a de to Ngoi 'Ai 'uaha.17Neenanau to ngoi 'ai behehongo ngini'a: Nimahi'abohono moi de moi.>>18O Yesus wotemoli, <<Na'o la o nyawa o dunia'a nibuhulu ngini'a, nioda-danganono, itihila'au ngoino 'ibuhulu.19Na'o la ngini harage de o nyawa o dunia'a nage 'ayongau-nga'uwa, maraio'au ona aha nihibohono harage de toona manga nyawa. Ma Ngoi tiniili'o'au o dunia'a neena ma ngale ninii'i Ngoino, ho ngini 'animaterowau de ona. Geenau ho ona nibuhulu ngini'a.20Nioda-danganono o'iau naga gee tohidemo'au ngini'a, <O gilaongo oiwa 'iholoi yodaduie de manga tuangi'a.> Na'o ona 'ihangihara'au Ngoi, ona ma aha inihangiharali ngini'a. Na'o ona yodinii'i 'ai do-doto'o, ona ma aha yodinii'i tingini nia do-doto'o.21Geena moi-moi aha ona yodiai ngini'a, hababu ngini to Ngoi 'ai ni-nii'i, de hababu ona 'awina'owa 'Una nage woihulo-hulo'o Ngoi.22Na'o Ngoi 'atainowa de 'atohidemowa ma Jou ma Dutu awi dodoto'o ona'a, ona geena manga baradoha oiwa. Ma neena ona 'aidadiwau yotemo na'o ona 'ayohi'ana'owa o baradoha.23O nyawa nage Ngoino 'ibuhulu, geena wibuhulu 'ai Dea'a.24Ngoi tadiao'au o haala 'ihera-heranga manga biono'a nage 'amoiwahi o nyawa ma homoa yodiai. Na'o 'atadiaiwa 'ogeena, geena ona 'ayobaradohawa. Ma neena ngaro ona yama'e'au, ma ona 'ibuhulu Ngoino de 'ai Dea'a.25Ma geena halingou 'ogeenau imote'e o'iau naga gee 'ihitulihu'u to ona manga hu'umu ma bo'uo'a geena la: <Ona 'ibuhulu Ngoino ma hababu oiwa.>26Ngoi aha tinihidingoto ngini'a o Du-duhunu 'ai Deano, geenala o Omaha 'Iofi-ofi, nage wi'ula o do-doto'o iti-tiai ma Jou ma Dutuno. Na'o Ena 'iboa, Ena aha 'ihiha'ihi ma ngale Ngoi.27De ngini ma halingou nihiha'ihi mangale Ngoi, hababu ngini de de Ngoi 'a ma di-dihila'ahi.>>
The Seed Company