Godigo Nogi Ugwaba Sabo Tęąbi Po Wabo Buku Dabe9 / mps_tbl
Te Devitgo asęani balia po me deli dao.
Bidigo te Godigo doloba pai kolesagade te Godiba usu da weyu, gedu haluasa po wali
1God, eno nageba usu da weyu,gedu haluasa po mu obao.Eno te we bidi augwaliba te nagomidigi sabo wiegi yai sę tigidali yali po waibao.2Eno nageba homu koneama,tama eno te wiegi yai homupemene ebo balia waibao.Te Ugwade Bidibo God mu, te eno balia weyu,nago nogi ugwaba saibao.3Te eno boi bidi dabego nage sulama, tama wi pai.Augwali tulaluama, tama mu isalio.4Nage te jas tiwai te siade dulalu,tama nago te doloba pai po tų ebao.Nago eno kolesaga osola suyu, dagalali,te nago suali, eno magi sę me deli ebeo.5Nago po odisiąwai bidi hani dabe,te Israel hani isąwai hani dabe, te nago po tų ilali.Nago te dwai sę ebo bidi dolali,tama te bidi mego augwalibate homu kone munu me ma egobeo,augwa hani nogi mu miyą saibao.6Awe, te boi bidi dabe sesemane doludubadi usu nanio.God, nago te augwaligo hanu dabe dolama,tama te mena bidi me deligote augwaliba homu kone ma egobeo.Mu menio.7Tiali goli, God te sesemane king bididubadi usu yai.Agai te po tų yabo sisi yai dao.8Mu tama, agai te tǫde we bidi tonalubo,tama agai bomai po te doloba pai mu da.Agai te tigidali we bidigo kolesagadagalubo sę te deli tigi poai sęgo naga dagalubo dao.9God te bomai be me deli tiwai.Te bidi dabe te boi bidide sęgę sobaso,augwa te agaba aselama, bidagasobo dao.Te sęgę sabo augwa te agaba pelama,te geme dualalubo dao.10God, te nageba asobo we bidite nago augwali tudiba munu me mugobeo.Tama tibaso, te nage koneani bidi dabegoda, te nageba konealubo homu dąų mu wabo dao.11Genuai Bidi God te Saion hanude king bidibao.Dagego te aga nogi ugwaba siyu, te tęąbi waiyąo.Tama dagego te tigidali Israel haniisąwai bidiba po hanilama weyu,te agai yali tigidali bomai sę po waiyąo.12Magi baso meni, Godigo te denetolobo bidi homugo konebo da.Tama agai te augwaligo gela wabote homugo me gegeda palugobeo.Agai te augwaliba dwai dene mabobidi dabeba te dwai dene wei ponobo dao.13Genuai Bidi, nago enaba te olo mutau sabo wiegi yai kolesaga yao.Te boi bidi dabego enabate dene me sęgę mabo, te nago suao.Te pąde ena isainu ebadi goli,tiali goli nage asiyu, ena dąų walao,te ena bugagia bidimainogo tiao.14Tama tiyu, eno te nago yali sę po tigidali weyu,tama eno nago nogi ugwaba saibao.Ena te Saion hanu sunumide dolalu,tama te nago ena ma sali po weyu,te wiegi yai homu pemene yaibao.15Te Genuai Bidigo po odisąbo Israelhani isąwai bagego te tǫ dedage diginama,te da kalabus emainu yali.Tiali goli, augwa digi teba tulaluai.Augwaligo te da tola somainu yabo bonogągą geme muani, tiali goli,te bono gągągo augwa digi ma tola sai.16Awe, te tama tebogo te God agaikolesaga te bidi dabebate po tų ebo sogo ola mawai dao.Te dwai sę ebo bidi dabego te gasa bidi dolabo sę yali,tiali goli te naigo begelama, te augwa digi ma dolai.17Te dwai bidi dabe, me te God tudiba mubo we bidihani dabe, te tigidali isimainu ebo dao.18Me ma, Godigo te magi doado bagemeni yai bidi dabe te sesemane sogo homukone palubo me tagalobeo.Mu tama, Godigo te genuai sęgę elalubobidi dabe tau siyu, te augwa konealubo homute odolali me tagalugobeo.19Genuai Bidi, nage asao.Te tǫde bidi dabego nage ela soyu,te poligi soabo bidi dabe te nago megogolamuo.Nago po odisąbo Israel hani isąwai bidi dabete nago po tųde augwali dodolama,tama augwa kolesaga dagalamainao.20Genuai Bidi, nago augwali dwai wi ilao.Nago te we bidi dabe augwali gę nomainu ilao,augwali te osogo bidibo tiwai konemainu ilao.