Jopgo Po Asęani Elalubo Buku17mps_tbl
1“Ena mu dolama, eno hoboludu ogwa wai bomomeni yai pedelama, tama ena isabo sogomaga mu yagasalio.Tama gų pagego ena teba asobo tonalubao.2Bidi dabe ena bagua selama dolaluyu,tama ena posobo po wabo.Tama eno augwaligo te dwai kolesaga augwa ebo suali.3God, ena digi eno nago po tų ebode ugwabaela hologobeo.Bidi me deli bidibadi bogo ena pesage hasegelama,tama po tų ebode agai e tama omai,eno dwai sę me yai menio po omainu.Tama nosali da, eno dwai sę me ebo si da,teda te bidigo eno pesage selama,tama nage dali po tų dodolamainu.Te tobage kolesaga yabo bidi mu meni ena tau siyu.Tama tibaso, naga digi naga bidigagalama, tama eno pesage sao.4Eno e abagi dedego ena tau sogobeo. Magi baso meni.Nago augwaligo homu kolesaga paliama,tama augwali megi kuna konebo meni.Tama augwaligo ena aiyaba elaluabo homu naga ebo.Tama tiyu yaide, nago augwaligoena aiyaba elalumainu sula tagalamo. Menio.5God, nago polo po me kone palao.Te bidi mego aga abagigo mone dabe sabo homudeaga abagi olo dali po tų ela mobaso da,teda te bidi aga dali, aga wai puluba dali siaugwa te yali dwai kolesagadedene nosali saibao,” wali.6“Megi da, Godigo ena sęgę mobaso sulama,tama we bidi augwaligo eno gesabidiba pesą sąbo.Tama tigidali bulu badu ena posobo po weyu,e tama wabo,‘Suao. Jopgo dwai kolesaga mu yai digi,tama aga dwai nai mu te dolobao,’augwaligo te po obao.7Ena homu sęgę mu elama,tama ena gela genina mu obao.Tama tego eno gedu bǫ delama,tama eno bugagia tonogobeo.Tama ena dili pulu hą mu yali.8Te doloba pai bidi dabe augwalimagi naide dwai sę me isąwai bidi dabeaugwaligo e nai eno tigide pedalobosulama, augwali noma salio.Tama augwaligo suali,dwai bidi dabe bugagia bidibo suali.Tama augwaligo augwalide homu sębę mu yali.9Tiali goli, tagala. Te doloba pai bidi dabego augwadwagi yai kolesaga tagalogobeo. Menio.Augwa doloba pai kolesaga naga yainubomo mu yaibao,” wali.10“Abagi dede, megi da, dage hodaluama, po ma wao.Tiali goli, eno dagego po odobo sogo da,teda eno homugo e tama tiaibao.Dage me deli dwagi yai kolesaga dali,homu kolesaga meni yai te yaba waibao.11Eno bidibo ula pąde mu tama sia sainu ebao.Tigidali nai dabe eno godolo elama yainu yali sę dabe,megi da, eno ma egobeo.12Ena hulia sai madi me bidibao.Tama eno abagi dedego menio po wali.Nage ulade bidiba wali.Augwaligo te po wali, ‘Nage moni homu igi.Pąde ula yaibao,’ wali.Tiali goli, eno suali da, moni hulia sai mu elalubo.13Isai bidi dabego bulu naga eno tonaluyu,tama te da eno be elalubo ąǫ igi sogo da,teda ena dwai bidigi dao.Tama ena te bulude pila muyu,tama huli sesabigo ena mesega sai elalugi da.14Tama eno te gų page e tama nogi yaibao, ‘Eno aya.’Tama dwasianu osogane dabego eno tigi tuaiba.Teda eno augwali e tama nogi yaiba,‘Eno ida dali, abe dali si,’ wagi da.15Tama eno homugo tama tidali,nosali te sęgę sia selama,ena bugagia bidaiba homu idali,teda eno olo dali tonaluidali.Tama dego ena bugagia ma bidaiba po waibawe?16Tama ena isilama,te isibo bidi dabego buluba aiya dulubo si da,teda eno homugo ena bugagiabidabo sunumi elaluaibawe?”Jopgo te po wali.