Profet Jeremaiago Po Elalubo Buku22mps_tbl

Jeremaiago po te king dali te we bidi dabeba pusali

1Genuai Bidigo te tiwai po wali, “Jeremaia, nage te Juda kingo beba dulama, te po pusao,” wali.2“Nago te tama po wao, ‘Nage te Juda king, nage te king Devitgo duayali sia kingde dulalubao, nago te Genuai Bidigo po odao. Nage, te naga ofisa dabe dali, te nago we bidi dabe dali, dage tigidaligo te po odao.3Genuai Bidigo e tama po walio. Dagego te wiegi yai doloba pai kolesaga naga iyąo. Te bidi me deligo gasa bidigo nai wi selama, agabolo sęgę mawai yai baso da, teda dagego aga tau selama, agai te sęgę silimainao. Dagego te tiana wai dabeba dwai sę igimio, te wilawe we dabeba dwai sę igio, te dage dali bidibo gasa tǫ kantri we bidiba me te dwai sę igio. Tama dagego te bulu we bidi dabe odolali me ela munamu dao.4Te dagego eno po wali pobaso da, teda sesemane sogo te king dabe Devitgo hanide pedaludaibao. Tama te king dabe te hosde me karisde dugulama, te kingo be oboba iba soyu, eda asiyu yaibao, te augwa sę eyu tiaibao. Te ofisa dabe me te we bidi dabe te king dali bilaibao.5Tialima, dagego eno po wali pisąbaso da, teda ena Genuai Bidi, eno mu po ena nogide digi obao, teda eno te nago genuai wiegi yai be mu dolaibao,’ te po te Juda king bidibolo pusao,” te po wai dao.6“Ena Genuai Bidi, eno te Juda kingo bede po elalubao.Be, eno suali, te wiegi yai mu yai,te distrik Gileat me te bulu du pesage Lebanon tiwaielalubao.Tiali goli, eno nage te olo tǫ pedalubo tiwai yaibao,te tǫ wa pai pesage, me te bidi mu meni yai tauntiwai elalueibao.7Te eno bidi dabe tagala palama,te nage dolagasomainogo yaibao.Augwaligo te sigi hwą dabe seselama,te nago wiegi yai ni nami sida gelama,tama te ni nami dabe te siaba sąwaibao,” wali.
8“Tama nosali, te gasa tǫ kantri we bidi dabe hauwa te badu bilagasaibao. Tama augwaligo te Jerusalem sulama, augwa haside hanalua peyu, te tiwai po waibao, ‘Magi baso Genuai Bidigo te tobage kolesaga te genuai taunba yaliwe?’9Te augwade digi po wei ponoyu, te tiwai po waibao, ‘Te page e tama elalubao. Te hanigo te Genuai Bidi augwa Godigo dąų walali bomo yai po tudiba munama, tama augwa te gasa god dabe wali pelama, augwaliba lotu obaso, te tiwai sę yai dao.’ Augwaligo te po waibao.”

Te we bidi dabego te king Joahasba gela usu ma wai

10Dage Juda, te king Josaia isalio,tiali goli dagego agade hobede ebo gela wagimio.Te dagego aga ogwa Joahasde dwai gela obaso,te usu yaibao.Magi baso meni, Joahasgo da tagalalio,te aga page buluba ma begasa me asogobe dao.11Joahasgo gasa nogi Salum, agai te Josaiago pesage hasegelali, te aga aya, tama te Juda king pedelali. Tialima, Joahasgo te Jerusalem taga soalio. Genuai Bidigo Joahasde homu kone palama, te tiwai po wali, “Te bidi ma begasa asogobeo.12Te boi bidi dabego aga te gasa tǫ kantriba sela palio. Te agai aga tǫ kantri me sugobeo. Menio. Te aga te gasa tǫ kantride isaibao,” te po wali.

Jeremaiago te king Jehoiakimba po pusali po wai

13Genuai Bidigo po ma weyu, te tama po wali,“Te aga wiegi yai genuai be sę yabo homu ebo bidiagaba te Genuai Bidigo sęgę pedalumainogoyaibao,magi baso meni, agai dwai kolesaga te we bididabeba yali.Aga be te genuai mu, tama te be habu ugwadu elalubao.Te aga abagi dabego agai te sę yali.Tiali goli, agai mone augwalibolo me mabeo. Menio.Augwaligo sę olo naga yai dao.14Agai te tama po waibao, ‘Eno te be moni bage sęyaibao.Tama te bede te genuai be habu ugwadu elalueibao.’Agai te be windo genuai nigilama,te agai te wiegi yai ni nami sida dabe selama,te be daga badu payali.Tama aga te wiegi yai mama yai pengo au ilibo dao.”15“King, nago te ni nami sida hauwa elalu,tama tego nage te wiegi yai king pedelaiba homueba, agawe?Nago aya aga te nai me ąį tuyu, pemene yali.Tialima, agai doloba pai kolesaga te we bidi dabebayalio.Tama tibaso, aga bidali wiegi yai yai dao.16Te doado bage meni yai bidi,me te doado bage sǫą pali bidi dabe,te sogo augwali te po tųba pedalubaso,agai augwaligo po te doloba pai kolesagade dagalali.Tama te tigidali we bidi te bugagia dugulaluali.Ena Genuai Bidi, eno po dolo obao,te ena konea pali bidigo ebo kolesagamu te tama dao.17Tialima, nagade digi, naga homu elama,te nago sesemane sogo te tobage nai dabe pesaelama,tama nago te nai dabe sainogo tibo kolesaga ebao.Tama nago te magi dwai sę isąwai bidi dabe odolalielibao.Tama nago te we bidi elaluama,te augwaliba dwai sę ebo dao,” wali.
18Te pagede naga tama Genuai Bidigo homude te Jehoiakim kone palali, te Josaiago ogwa, te Juda king bidai. Tama Genuai Bidigo te tama po wali,
“Te Jehoiakim isibaso da,teda te we bidi dabego agade te homu dene ebo gelame wagobeo,te po weyu, ‘Hobede mu ebao, eno amao,’te ‘Hobede mu ebao, eno abeo,’ te wagobeo.Te augwa homu dene ebo gela weyu, te po me wagobeo,‘Te eno genuai bidi hobede mu ebao,’‘Te dago king homu dene mu ebao,’po me wagobeo.19Menio. Te augwaligo agai tigi te bidi dabego teisai donki tigi sela sąbo tiwai yaibao.Te augwaligo aga kekasa pelama,aga te Jerusalem genuai obo bulu badu olo sągipaibao,” wai dao.

Genuai Bidigo bomai po te Jerusalemde elaluali

20Genuai Bidigo te tiwai po wali,“Jerusalem, nage te Lebanon genuai bulu du dabebaholobadi,te bulu Basanba, me te bulu du Abarimba meholama,te bomonama i weyu, hobedai gela wao.Magi baso meni, te nago abagi da wali bidi tigidali,te augwali dolali dao.21Te nage bugagia bidibo sogo,te nago doado bage hauwa elalubo sogo,eno po nagebolo mobadi, tialima, nago te tama powai,‘Eno nago po odobo hagela ebao,’ wali.Sesemane sogo nago eno po sela sąwani.Nago kolesaga te tiwai, te nage gesi ogwa bidide dąįelasa,te megi e sogoba usu nagasali dao.22Te boi bidi dabe te bomai wali asobo tiwai elama,te nago tobolu bidi dabe sela paibao.Tama te boi bidi dabego nago abagi dabe selama,te digibulu buluba kalabus igi paibao.Te tama tebo sogo, te naga yali dwai kolesagade haledwai mu yaibao.23Augwaligo nago be te wiegi yai Lebanon ni sidagosę yani,tama nage bugagia dugulaluali.Tialima, hobede ya, te nago dene te wego wai amenainogo dene ebo tiwai ebaso,te nage dwai gela mu waibao,” wali.

Genuai Bidigo po te king Jehoiakinba pusali

24“Ena sesemane sogo bididubo Genuai Bidi, eno po dolo nage Jehoiakinbaobao, te Jehoiakimgo ogwa, te Juda king dao. Te nage eno dolo nogode mubo ring me deli tiwai te eno nage godolo mu igi da, tagala, te eno nage sela sągi da.25Tama nage dolabo bidi dabeba nage mawaibao, te nago augwalide wi ebo bidi dabeba mawaibao. Te Babilon king Nebukatnesar me, aga ami bidi daliba maiabo po obao.26Eno te nage naga ida dali selama, te dage si gasa tǫ kantriba sąwaibao. Te tǫ kantri te dage sigo page bulu mu meni ebadi, tialima, dage si tede bididubadi, te dage si isiboba usu naibao.27Dagego te duga page buluba asabo homu godolo mu yaibao, tialima, dage usu munu ma egobe dao,” wali.28Jeremaiago te tiwai po wai,“Magi basowe? Te bidi Jehoiakin te tǫgo nigai dwaitagalai sospen sene alua pai tiwai te bidigo godoloisąbo homu ebo ąǫ eba, agawe?Magi baso Genuai Bidigo aga,te aga wai puluba dabe dali,te augwaligo konesiąwai tǫ kantri me delibasąwaibawe?29Israel tǫ, Israel tǫ, nago Genuai Bidigo po odao.30Genuai Bidigo te tama po wali,‘Te bidide po te tiwai asęao.Te bidi te wai meni yai bidi tiwai elaluali.Tigidali sę agai ebo te wiegi yai me pedalugobeo.Magi baso meni, te aga wai hani dabe me deligo te agasę yali pesage selama,te Devitgo sia kingde dulalu, te tǫ kantri Judatonalugobeo,’” wai.
expand_more
Search