Te dagego nai tubo habu seliba wida, teda te dwai kolesaga ebo me habu selao wali po
1Genuai Bidigo enabolo te tiwai po wali,“Nago genuai po dągą mu olama, i wao,dua digi i me wagio.Nago bomonama i wabo, te bu wabo nai biugelbu wabo tiwai yao.Te eno we bidi dabeba weyu, te Jekopgo hani dabe,te augwa dwai sęgę me dwai kolesaga po wao,” po wali.2“Mu tama, te tigidali sogode augwate enaba lotu wabo kolesaga eyu,te eno homu kolesaga osola sueinu yali.Te augwaligo enaba hanalu,te augwaliba doloba pai kolesaga yao weyu,te augwali pąde bidibaso,te augwali wiegi yai pemene yaibao wali.Tiali goli, te hani dabego tibo po mu wai.Augwaligo te eno bomo yai po tudiba munama,te augwa dwai kolesaga naga ebo sę yai dao.3Augwaligo enaba te tiwai po wali,‘Genuai Bidi, dago te nai habu selama,te dena digi aiyaba elalubo nago suali,tiali goli magi baso nago te datau sabo sę isąbawe?’”“Tiali goli, ena Genuai Bidi,eno augwaliba te tiwai po wei ponani,‘Te tigidali side dagego te nai habu selebo sogo dąį ilali,dagego te duga naide digi naga homu kone palama,te dagego duga sę ebo bidi dabeba dwai sę ebo dao.4Dagego te po weyu, te dage nai habu selama,enaba gedu haluasa po waibao wai.Tiali goli, dagego kolesaga te gasagi yai tedali mu yalio.Dagego te wado elama, hwįyu, nogo sugunama,te gasa bidi gesabidide eliyu ebo dao.Dagego te dwai kolesaga te dagego nai habu selama,bidibo sogo ebaso da,teda eno dagego gedu haluasa po wabo me odogobeo.5Te dagego homugo eno dagego te tigidali sidenai habu selebo kolesaga ebodete eno dage godolo eba homu eba, agawe?Dagego te homu dene ebo ugwa munama,te duga tobolu te tǫba basigulu,te waligo awi dili basiasa pabo tiwai eyu,te dage sia keli daide piyu, te duga digi aiyaba elalu,te gasa tobage kolesaga me yali.Tama dagego homugo dagego te tobage kolesaga ebodeeno dageba bugai haliga eba homu yaibao, agawe?Mu menio.”6“Eno te tobage kolesaga godolo homu me ebeo.Eno homugo dagego te hanianidwai kolesaga mu ebo habu selama,te gasa we bidi dabe elaluama,te dolobo kolesaga me habu selao.Te we bidi dabe te hobedagia kalabuside bidiyu,dagego augwali te bono me sengo kęnani,tama augwali te bulmakau tiwaidagego te ni nami augwa dogonide kęnama,te duga sę emainu ebo tiwai eyu tonalubao.Te dagego augwaliba wiegi yai kolesaga eyu,te augwali olo pomainu tagala palao.7Eno godolo homu ebo kolesaga e tiwai dao.Eno homugo dagego te nasi ebobidi dabeba nai mao homu ebao.Te magi nai doado bage meni yai bidite dagego aga piabo be meni yai subo sogo,eno homugo dagego augwali te dugabeba odasa pao homu ebao.Te dagego te bidi aga tigi bea sabo ugwa meni yaisubaso,te eno homugo dagego augwaliba ugwa maiąo homuyali.Tama eno homugo te duga deli kaneme sibite augwa sęgę elalubo sogo,te augwali tudiba munamo dao.”8“Te dagego eno godolo homu ebo kolesaga ebaso da,teda polo tama te eno dagede elalubodwai sęgę sia somainu yaibao,te kigamude nanobo giliga ulagote hulia sai elaluali hola sabo tiwai yaibao.Te eno dage usu ma ilaibao.Te ena, doloba pai kolesaga ebo God,ena dage asobodu polasa paibao.Te ena dage tudibadu nosali me te enogenuai bomo ula dali asu,te dage bugagia tonalueibao.9Te dagego enaba gedu haluasa po weyu, i wabo sogo,te ena Genuai Bidi, eno te dagegogedu haluasa po wabo odoyu, tau saibao.Te ena dage dali bidibo, dagego koneaibao.Te dagego gasa bage dabe aiyaba elaluama,te augwaliba nogo tų eyu, po dwai wabo tagalama,10te dagego suali,te bidi dabe te doado bage menai dabe sǫą pai elalubo subaso, te dagego augwalihomu dene mu elama,te augwali sǫą pali nai mobaso da,teda eno dage wiegi yai bugagia ilaibao.Te eno dageba wiegi yai sogo pedalumainu elama,te bomo yai giliga ula tiwai eyu,te be hulialuali hola sabo tiwai ebo dao.11Te ena Genuai Bidi, te sesemane sogo eno dagebugagia tonalu,te dage bilibo dodolama,te dagego homugo wei homu ebonai dabe usu nama mawaibao.Megi dage te ąį meni yai tǫde bidibo tiwai ebao,tiali goli eno dage wiegi yai bomaiwe bidi pedalumainu yaibao.Tama dage te gi tǫ ili ąį hauwa elalubo tiwai elama,te sula sisąbo ulu ąį tiwai elalueibao.12Tama te dolali taun dabe dagego ma nigaibao.Dagego te be dabe te polobadu sę yaielaluali pesagede ma sę yaibao.Tama dage nogi augwaligo te tiwai waibao,‘Te taun obo dabe ma dodolobo hani dabe’,me ‘Te augwali te sunumi dabe me be dabebugagia ma dodolobo hani dabe dao,’ waibao,” wali.
Te dagego Sabat side bomai po bugagia wali pobaso da, te dage bugagia mu bidaibao
13Genuai Bidigo te tiwai po wali,“Dagego te Sabat side bomo yai po boligio,te eno side ena digi dąį ilali.Te dagego duga sę dabe digi te side yabo homu me igio.Dagego te Genuai Bidi eno side,te ena godolo homu mu elama, te duga genuai sideda homu kone palao.Te dage me tedela pįsama, te duga sę me isiąma,te haniani olo po me minamo dao wali.14Dagego te tobage yabo kolesaga dolo wali pobasoda, teda te Sabat side dagego Genuai Bidi,enade wiegi yai pemene umabo mu yaibao.Te eno dage te polobadu te duga bulaiwąį nǫųba bomai po dąų weyu,te bidao wali bulu du pesagede bugagia bidaibao,te Jekop, te aga haniba dali mawai.Te dage nai hauwa elalu, te dage bugagia mu bidiyu,te magi nai deli me sǫą pogobeo.”Te po te Genuai Bidigo pedauwalide digi asai dao.