Profet Aisaiago Po Asęai Buku50mps_tbl

1Genuai Bidigo te Israel we bidi dabeba tetiwai po wali,“Taun Jerusalem te duga ida tiwai elalubao.Dagego homugo eno aga tudiba mubao homu eyu,te bidigo we sabo kolesaga bolama,te sai we mu sela sąbo tiwai homu eba, agawe?Te dagego tama homu ebaso da,teda te tama po wali pepa mena elalubawe,eno aga mu sela sąwaniwe?Tama me, te eno bidi me delide negeli sali me elalubeo.Te tama homu dagego magi baso ebawe,eno wai dabe eno dage te gasa bidi dabeba te olo sęebo bidi tiwai ilama, tagala paliyu,eno te negeli sali dodolabo mone saliwe? Mu menio.Te dagego dwai sę hauwa ena haliga sębę ilibaso,eno te Jerusalem tudiba munama,tama eno dage te gasa bidi dabego nogoba muaidao.”
2“Eno dage gegagasali sogo,magi baso eno te bidi me deli bidibo subewe?Te eno dage i wali sogo,magi baso dagego eno i wali wei ponobewe?Dagego homugo te eno dage ma sabobomo meni da homu yali da, agawe?Odao. Eno te po obaso,te tamu ąį tigidali mu sula saibao.Eno te po obaso, te genuai soabo ąįte masigi sane olo elalueibao.Te sųgų dabe isilama, kugumini dwai yaibao.3Tama eno te dagalu me sisi mu emainu eyu,te aga bidi isaide te wego homu dene ebasogudubo ugwa tiwai yaibao.Mu tama, eno te tobage sę yabo homuelalubao,” Genuai Bidigo te po wali.

Te bidi dabego Genuai Bidigo sę bidiba dwai sę yali po wai

4God Genuai Bidigo enabolote wiegi yai po wabo kolesaga ola mawai,tama eno te wiegi yai po te bomo meni yai we bididabego haliga dąų walu, waibao.Tigidali sogo kigamude agai enabolo te wiegi yai gesi sępo ola mawainu ebo po odabo homu godolo muebo dao.5Genuai Bidigo eno olo dalama,te agai po odomainu yali, te eno agade hagoma eyu,te agai enaba mawainu ebo sędete habu bulu me kilasa pabeo.6Ena te bidi dabego keloago tudide elama,eno penane nisi gudumainu yalio.Te augwaligo enaba dwai posobo po weyu,eno gesabidiba pesą sąyu yali,eno ena gesabidi te augwaliba dualubeo.7Te augwaligo dwai po wabogoena aiyaba me elalugobeo,magi baso meni, God Genuai Bidigo ena tau sabodao.Te ena digi ena dąų walama, te ena sę yali.Eno te tiwai koneani, eno ebo sędete ena hale me sogobe homu ebao.8God pąde bidiyu, te agai te po waibao,eno dwai sę me ebeo.Te bidi me deligo ena po tų ilabo homu eba, agawe?Teda agai ena te po tųba odasa pelama,te agai ena po tų ilabo po pusumainao wali.9God Genuai Bidigo ena tau siyu,tama dego te po weyu,eno dwai sę me yalio waibawe?Ena po kisilama wali hani bage,augwali te ugwa asobago togolama silibo tiwai muyaibao.
10Dage te Genuai Bidi dologoba pelama,te agai sę bidigo po wali pabo hani dabe,dage wi me igimio.Te dage hulide biliyu, te dage ula meni yai,te dage konealubo homu Godiba dąų wao,te Genuai Bidigo dage tonalu, agai dage tau saibao.11Tiali goli, dage te Genuai Bidibakonealubo homu dąų wasiąbo hani dabe,te duga digi isi ula ilama,te dage be hulia side bidibo bage,dagego te sole dabe domonama,tego duga pabo sunumidu te sole uladu pao.Tiali goli, Genuai Bidigo te dage bidigi pabo pesage dąįilali, te genuai dene sabo pesage dao.
expand_more
Search