Romans9
1Ăñ ngơi pơp ngơ ngăn mŏng Yang Tŏng Tlĕh. Ăñ so ngơi huôk — nuih nhăm ăñ ĕh lăm nư̆k ta ăñ mŏng Yang Ngăt Găl —2hư̆n jêng, yơng ta ăñ, mau pơp nguôt nư̆ng ram jêh iên tăl pơp ji kôr so dơi dư̆t mŏng nuih nhăm ăñ.3Bơ yơng ăñ khơñ ngăn ăñ yơh jêng nêh nai tăm păh, tăm tlăh băh Yang Tŏng Tlĕh yơng băh ŏh mi ăñ ji, hư̆n jêng nêh uôn lan ăñ ji hui si lŏng săk;4hên hư̆n jêng uôn lan I-sra-el, jêh iên lĕ mơt pơp hên dơi jêng pơp brêh ñjêng kuôn ruông, guh ang, grăp pơp tŏng guôp, bruă nai jao pơp bhiên, pơp kôh mpŭ, jêh iên grăp pơp ƀuôn;5hên dơi mau măt băh băl pang yo, jêh iên Yang Tŏng Tlĕh trôh băh hên — (hư̆n jêng hui si lŏng săk) — Khua Yang jêng Mtao gao hĭn lĕ mơt, hư̆n jêng Yang Trôk năng nơ nei tăl trôh hui hai. A-men.6Ƀê̆ dăh so tuôm mau pơp jêng pơp ngơi Yang Trôk di jêh nga pơp yuôm. Bơ yơng so geh lĕ mơt nêh trôh băh băl I-sra-el, hư̆n jêng băl I-sra-el.7Ăt so geh ya đơ lĕ mơt băl kuôn so ta kơi hư̆n jêng pôl nhuôr A-bra-ham di. Ƀê̆ dăh jêng, “Yơng băh kăn I-săk, pôl nhuôr me di jrăng dơi kuôl năn.”8Hư̆n jêng ŏh kuôn hui si lŏng săk, lĕ mơt băl hư̆n so geh jêng ŏh kuôn Yang Trôk. Mlih ta iên, ŏh kuôn pơp ƀuôn di hư̆n dơi ngơp klăh di pôl nhuôr.9Bơ yơng ho jêng pơp ƀuôn: “Mŏng nuk ho, Ăñ jrăng trôh, jêh iên jrăng mau ju nau kuôn tlau ta de Sa-ra.”10Jêh iên so mau băh gu klăh iên, ƀê̆ dăh de Rê-ƀê-ka ăt iên ya de jai trơ triêu yơng băh ju nau nêh, hư̆n jêng kăn I-săk, pang yo băl băn —11bơ yơng mŏng mông ñăm de lai săk, ăt ñăm tuôm mhŏ ju mta pơp găl mdăh pơp djŏh ya, no di pơp khơñ Yang Trôk di hui si pơp săč ruăh Yang di dơi ĕh gŭk kjăp,12so geh yơng băh bruă mhŏ, ƀê̆ dăh yơng băh Mtao kuôl ndơm — pơp jêh dơi ăn de gư̆t, hư̆n jêng: “Kăn kuôn mi jrăng jêng dư̆k ta kăn kuôn ŏh.”13Trĭp klăh di pơp jêh čih: “Ăñ khăp ta Ya-kôp, ƀê̆ dăh Ăñ hao nuih ta Ê-sau.”14Kơt iên, đô̆ nă băn jrăng ngơi? Năng ai mau pơp so geh tŏng mŏng Yang Trôk lăh? Pơp hư̆n so dơi mau ƀă.15Bơ yơng Khua Yang ngơi ta Mô-ih, klăh iêu: “Ăñ jrăng lăm ƀlang nuih băn dhư̆ ta lĕ mơt nêh tơm ăñ jrăng lăm ƀlang nuih băn dhư̆, jêh iên Ăñ jrăng tlŏng đač ta lĕ mơt nêh tơm Ăñ khơñ tlŏng đač.”16Hư̆n yơh so geh yơng băh nêh tơm čŏng khơñ, ăt so geh yơng băh nêh tơm dhul tŏ dhul o, ƀê̆ dăh hư̆n jêng hui si Yang Trôk, Mtao lăm ƀlang nuih tlŏng đač.17Bơ yơng Ră Ƀrăh ngơi ta kăn Pha-ra-ôn klăh iêu: “Yơng băh pơp khơñ ho yơh Ăñ jêh lăm ndŏk me tŏng tê̆, no di băh me Ăñ dơi lăm ƀlang pơp myang Ăñ ji, jêh iên khă bi năn Ăñ dơi nai têh sơm mŏng grăp dôn teh.”18Hư̆n yơh, Khua Yang lăm ƀlang nuih băn dhư̆ yơng ta nêh tơm Khua Yang khơñ, ƀê̆ dăh Khua Yang lăm krăk dăng nuih nhăm nêh tơm Khua Yang khơñ.19Kơt iên ŏh mi jrăng lăh ăñ: “Ndă iên, pơp mhŏ Khua Yang hôm ƀuăh ñjăm? Bơ yơng nêh tơm dơi no di tăm dăng ta pơp khơñ Yang Trôk di?”20Wơ nêh hư̆n, mŏng pơp brêh ho me jêng nêh tơm no di tăm dăng ta Yang Trôk? Dơi ya pơp nai lăm ñjêng ĕh jrăng ngơi ta nêh muôn ĕh: “Pơp mhŏ me muôn ăñ klăh iêu ho” lăh?21Mdăh nêh muôn dlăh so mau pơp dơi tŏng teh uk, no di lăm ñjêng ju mblăm pơp băh ƀơn klŏ uk, wăt di lăh pơp ho ñăt thêm ta bruă yuôm bhăn, jêh iên pơp tŏ ñăt thêm ta bruă so yuôm.22Ƀê̆ dăh ndă di Yang Trôk, khơñ lăm nư̆k pơp hao nuih Yang di jêh iên lăm ƀlang pơp myang Yang di, jêh sŏk nuih nhăm băn dhư̆ ram gir ăt yơng ta nhông nai thêm ñăt ta pơp hao nuih, jêh prăp prê ta pơp rai lêk;23jêh iên no di Khua Yang dơi lăm ƀlang pơp ndrŏng săh guh ang Yang di tŏng lĕ mơt pơp thêm ñăt mŏng pơp tlŏng đač hư̆n jêng pơp Khua Yang prăp prê ta pơp guh ang —24wăt di lăh ta lĕ mơt băl băn jêng nêh jêh Khua Yang kuôl ndơm, so mau čuôm gu băh băl Yo Thaĭ, ƀê̆ dăh băh băl uôn lan ta ling, ñjêng đô̆ nă?25Klăh di Khua Yang jêh ngơi mŏng ră Ô-sê, klăh iêu:“Ăñ jrăng kuôl nêh so geh jêng uôn lan Ăñ, jêng ‘uôn lan Ăñ’,jêh iên nêh so năng khăp khơñ jêng ‘năng khăp khơñ’.26Jêh iên pơp jrăng mau ta iên hư̆n jêng pơp ngơi têh sơm ta hên, klăh iêu: ‘Pu me so geh jêng uôn lan Ăñ’,ta tŭk hư̆n yơh, hên jrăng dơi nai kuôl jêng ‘băl kuôn tlau Yang Trôk khăng brêh.’”27Jêh iên kăn Ê-sai ôr tĕh yơng ta uôn lan I-sra-el, klăh iêu:“Wăt di lăh nŏh kuôn so I-sra-el di ŏk ndrơm klăh di kiêk dak sĭ,ƀê̆ dăh čuôm gu ju khăn hôm ĕh pơ pat dơi tlĕh,28bơ yơng Khua Yang jrăng lăm nư̆k pơp ngơi Yang di ta dôn teh,nư̆m nơn jêh iên mhăč rŏk.”29Jêh iên klăh di Ê-sai jêh ngơi luôr:“Ndă di Yang Trôk grăp pôl ka han di so wêh thêm ñăt ta băn ƀơn pôl nhuôr,hư̆n năng ai băn jêh ĕh ñjêng ndrơm klăh di uôn Sô-đôm,jêh iên ăt ñjêng ndrơm klăh di uôn Gô-mô-rơ.”30Kơt iên, năn pơp băn jrăng ngơi? Hư̆n jêng uôn lan ling lač, hư̆n jêng lĕ mơt nêh so tư̆ng juôi pơp geh tŏng, hư̆n jêh dơi mau pơp geh tŏng, ƀê̆ dăh pơp geh tŏng hư̆n yơng băh pơp đăo.31Bơ băl uôn lan I-sra-el, jăng jai hên tư̆ng juôi pơp bhiên pơp geh tŏng di, ƀê̆ dăh so dơi trôh ta pơp bhiên hư̆n.32Yơng băh năn pơp? Hư̆n jêng so mau yơng băh pơp đăo, ƀê̆ dăh klăh di yơng băh bruă mhŏ. Hên jêh ĕh păk jŏng ta bôk mau pơp lăm đô̆,33ndrơm klăh di jêh čih:“Ăn dlăng ho, Ăñ ăn ta Si-ôn ju mlăm bôk mau pơp lăm đô̆ jêh iên bôk mau ram jêng pơp păk bông,nêh tơm đăo ta bôk mau hư̆n jrăng so geh pơp prêng.”
FAR EAST BROADCASTING COMPANY